Punalur Travel: പശ്ചിമഘട്ടത്തിൻ്റെ മടിത്തട്ടിലെ മരതകപ്പച്ച; മലയോര സൗന്ദര്യം നുകരാൻ പുനലൂരിലേക്ക് ഒരു യാത്ര

Punalur

കേരളത്തിന്റെ കിഴക്കൻ മലനിരകളുടെ സൗന്ദര്യം മുഴുവൻ ആവാഹിച്ചെടുത്ത നാടാണ് കൊല്ലം ജില്ലയിലെ പുനലൂർ. തൂക്കുപാലത്തിന്റെ തലയെടുപ്പും, കല്ലാടയാറിന്റെ താളവും, പശ്ചിമഘട്ടത്തിന്റെ തണുത്ത കാറ്റും പുനലൂരിനെ സഞ്ചാരികളുടെ പ്രിയപ്പെട്ട ഇടമാക്കി മാറ്റിയിരിക്കുകയാണ്. തമിഴ്‌നാടിന്റെ അതിർത്തിയോട് ചേർന്ന് കിടക്കുന്ന ഈ മലയോര പ്രദേശം ചരിത്രവും പ്രകൃതിയും ഒരേപോലെ കൈകോർക്കുന്ന വിസ്മയ കാഴ്ച്ചയാണ് ഓരോ യാത്രക്കാർക്കും സമ്മാനിക്കുന്നത്. വേനലിലും കുളിരേകുന്ന കാനന പാതകളും വെള്ളച്ചാട്ടങ്ങളും തേടി നമുക്ക് പുനലൂരിലേക്ക് ഒരു യാത്ര പോയാലോ.

പുനലൂരിൽ കണ്ടിരിക്കേണ്ട പ്രധാന കാഴ്ചകൾ

പുനലൂർ തൂക്കുപാലം: പുനലൂർ എന്ന് പറയുമ്പോൾ തന്നെ ആദ്യം മനസ്സിലേക്ക് ഓടിയെത്തുക തൂക്കുപാലമാണ്. 1877-ൽ ബ്രിട്ടീഷുകാർ നിർമ്മിച്ച ഈ അത്ഭുതം ഇന്നും തലയെടുപ്പോടെ ന​ഗര മദ്ധ്യത്തിൽ നിൽക്കുന്നു. കല്ലാടയാറിന് കുറുകെയുള്ള ഈ പാലത്തിലൂടെയുള്ള നടത്തം ആ​ഗ്രഹിച്ച് ദിവസേന നിരവധി ആളുകളാണ് എത്തുന്നത്.

തെന്മല ഇക്കോ ടൂറിസം: പുനലൂരിൽ നിന്ന് അല്പം മാറിയാണെങ്കിലും തെന്മല സന്ദർശിക്കാതെ മടങ്ങാനാവില്ല. ഇന്ത്യയിലെ ആദ്യത്തെ ആസൂത്രിത ഇക്കോ ടൂറിസം കേന്ദ്രമാണിത്. ബോട്ടിംഗ്, അഡ്വഞ്ചർ പാർക്ക്, മ്യൂസിക്കൽ ഫൗണ്ടൻ എന്നിവയാണ് ഇവിടുത്തെ പ്രധാന ആകർഷണങ്ങൾ.

ALSO READ: രണ്ട് നാടുകൾ, ഒരു സവിശേഷത: കുട്ടനാടും നെതർലൻഡ്‌സും തമ്മിലുള്ള ആ രഹസ്യബന്ധം അറിയാമോ?

പാലരുവി വെള്ളച്ചാട്ടം: പേര് സൂചിപ്പിക്കുന്നത് പോലെ പാൽ പതഞ്ഞൊഴുകുന്ന പോലെയുള്ള മനോഹരമായ വെള്ളച്ചാട്ടമാണിത്. പശ്ചിമഘട്ടത്തിന്റെ ഉൾവനങ്ങളിൽ നിന്നൊഴുകി വരുന്ന ഈ ജലധാരക്ക് ഔഷധഗുണമുണ്ടെന്നുപോലും വിശ്വസിക്കപ്പെടുന്നു.

ആര്യങ്കാവ് ശാസ്താ ക്ഷേത്രവും വനപാതയും: ശബരിമല ധർമ്മശാസ്താവിന്റെ അഞ്ച് പ്രധാന ക്ഷേത്രങ്ങളിലൊന്നാണ് ആര്യങ്കാവ്. കാടിനുള്ളിലൂടെയുള്ള ഡ്രൈവിംഗും ഇവിടുത്തെ പുരാതനമായ വാസ്തുവിദ്യയും സഞ്ചാരികളെ ഇവിടേക്ക് ആകർഷിക്കുന്നതാണ്.

യാത്ര പ്ലാൻ ചെയ്യുമ്പോൾ ശ്രദ്ധിക്കേണ്ടത്

എപ്പോൾ പോകണം: മഴക്കാലത്തിന് ശേഷമുള്ള സമയമാണ് (ഒക്ടോബർ മുതൽ മാർച്ച് വരെ) പുനലൂർ സന്ദർശിക്കാൻ ഏറ്റവും അനുയോജ്യമായ സമയം.

യാത്ര: കൊല്ലത്ത് നിന്ന് ചെങ്കോട്ടയിലേക്കുള്ള റെയിൽ പാതയിലൂടെയുള്ള യാത്ര അതിമനോഹരമാണ്. ഇന്ത്യയിലെ തന്നെ മികച്ച ‘ഗ്രീൻ റൂട്ട്’ ആണിത്.

ഭക്ഷണം: നാടൻ വിഭവങ്ങളും തമിഴ് രുചികൾ കലർന്ന ഭക്ഷണവുമാണ് കൂടുതൽ ഈ റൂട്ടിൽ ലഭിക്കുന്നത്.