Thiruvananthapuram: തിരുവനന്തപുരം എങ്ങനെ ‘നിത്യഹരിത നഗരമായി’?; മഹാത്മാഗാന്ധി നൽകിയ ആ വിശേഷണത്തിന് പിന്നിലെ കഥ ഇതാ

Thiruvananthapuram

ഇന്ത്യയിലെ ‘നിത്യഹരിത നഗരം’ (Evergreen City of India) എന്ന ഖ്യാതിയോടെ തലയുയർത്തി നിൽക്കുന്ന നഗരമാണ് കേരളത്തിന്റെ ഹൃദയഭാ​ഗമായ തിരുവനന്തപുരം. പ്രകൃതി സൗന്ദര്യം, ശാന്തമായ അന്തരീക്ഷം, സുസ്ഥിരമായ വികസനം എന്നിവയാൽ സമ്പന്നമായ ഈ നഗരം പണ്ടുമുതൽക്കെ ഏവരുടെയും മനം കവരുന്നയിടമാണ്. പശ്ചിമഘട്ടത്തിന്റെ പച്ചപ്പിനും അറബിക്കടലിന്റെ നീലിമയ്ക്കും ഇടയിലായി സ്ഥിതി ചെയ്യുന്ന തിരുവനന്തപുരം, പ്രകൃതിയും ആധുനികതയും എങ്ങനെ കൈകോർക്കുന്നു എന്നതിന് മികച്ച ഉദാഹരണമാണ്.

വൃക്ഷങ്ങൾ നിറഞ്ഞ പാതകളും തീരദേശത്തെ കുളിർമയും ഈ നഗരത്തിന് ഒരു പ്രത്യേക മനോഹാരിത നൽകുന്നു. പണ്ടൊരിക്കെ ഗാന്ധിജിയാണ് ഈ നഗരത്തെ ‘നിത്യഹരിത നഗരം’ എന്ന് വിശേഷിപ്പിച്ചത്. ഇവിടുത്തെ മലനിരകളുടെയും താഴ്വരകളുടെയും പച്ചപ്പ് കണ്ടിട്ടാണ് അന്ന് അ​ദ്ദേഹം ആ വിശേഷണം നൽകിയത്. കോൺക്രീറ്റ് കെട്ടിടങ്ങൾ കുമിഞ്ഞു കൂടുന്ന മിക്ക ന​ഗരങ്ങളിൽ നിന്നും വൃത്യസ്തമായി പ്രകൃതിയെ ചേർത്തുപിടിക്കുന്ന ഈ നഗരം ശ്വസിക്കാൻ ശുദ്ധവായുവും ശാന്തമായ ജീവിതസാഹചര്യവും പ്രദാനം ചെയ്യുന്നു.

അടിസ്ഥാന സൗകര്യങ്ങൾ, മികച്ച ആരോ​ഗ്യ മേഖല, വിദ്യാഭ്യാസ സ്ഥാപനങ്ങൾ എന്നിവ തിരുവനന്തപുരത്തെ താമസിക്കാൻ ഏറ്റവും മികച്ച നഗരമാക്കി മാറ്റുന്നു. തലസ്ഥാന ന​ഗരം എന്നതിലുപരി, ലോകപ്രശസ്തമായ പത്മനാഭസ്വാമി ക്ഷേത്രം മുതൽ നീലക്കടൽ തിരതല്ലുന്ന കോവളം തീരം വരെ, ഈ നഗരം ഓരോ സഞ്ചാരിക്കും സമ്മാനിക്കുന്നത് വിസ്മയകരമായ കാഴ്ചകളാണ്.

ALSO READ: കടൽ കടന്നെത്തിയ വിജ്ഞാനം, വിളക്കത്തിരുന്ന പഠനം; പൊന്നാനി എങ്ങനെ മലബാറിൻ്റെ മക്കയായി?

ചരിത്രവും വിശ്വാസവും ഒത്തുചേരുന്ന ഇടങ്ങൾ

ശ്രീ പത്മനാഭസ്വാമി ക്ഷേത്രം: ലോകത്തിലെ ഏറ്റവും സമ്പന്നമായ ഈ ക്ഷേത്രം അതിന്റെ ശില്പഭംഗി കൊണ്ടും വിശ്വാസം കൊണ്ടും ഏവരെയും ആകർഷിക്കുന്നു. അനന്തപത്മനാഭൻ്റെ ദർശനം തേടി നിരവധി ആളുകളാണ് ഇവിടേക്ക് ഒഴുകിയെത്തുന്നത്.

കുതിരമാളിക (പുത്തൻമാളിക): പത്മനാഭസ്വാമി ക്ഷേത്രത്തിന് സമീപമുള്ള ഈ കൊട്ടാരം തിരുവിതാംകൂർ രാജഭരണത്തിന്റെ പ്രതാപം വിളിച്ചോതുന്നതാണ്. 19-ാം നൂറ്റാണ്ടിൽ തിരുവിതാംകൂർ മഹാരാജാവായിരുന്ന സ്വാതി തിരുനാൾ ബാലരാമവർമ്മയാണ് ഈ മനോഹരമായ കൊട്ടാരം നിർമ്മിച്ചത്.

കോവളം ബീച്ച്: വിദേശ സഞ്ചാരികളുടെ പ്രിയപ്പെട്ട കേന്ദ്രമായ കോവളത്തെ ലൈറ്റ് ഹൗസ് ബീച്ച് സൂര്യാസ്തമയം കാണാൻ ഏറ്റവും അനുയോജ്യമായ ഇടമാണ്.

പൊന്മുടി: നഗരത്തിന്റെ തിരക്കുകളിൽ നിന്ന് മാറി പ്രകൃതിയെ സ്നേഹിക്കാൻ പറ്റിയ അതിമനോഹരമായ സ്ഥലമാണ് പൊൻമുടി. മഞ്ഞു മൂടിയ കുന്നുകളും തേയിലത്തോട്ടങ്ങളും ആസ്വദിക്കാൻ പൊന്മുടിയിലേക്ക് യാത്ര പോകാവുന്നതാണ്.

വർക്കല പാപനാശം ബീച്ച്: കടലിനോട് ചേർന്ന് നിൽക്കുന്ന വലിയ ക്ലിഫുകളാണ് വർക്കലയുടെ പ്രത്യേകത. ദിവസേന കടലിൻ്റെ വിസ്മയ കാഴ്ച്ചകൾ തേടി നിരവധി ആളുകളാണ് ഇവിടേക്ക് എത്തുന്നത്.

മ്യൂസിയവും മൃഗശാലയും: ഇന്ത്യയിലെ തന്നെ ഏറ്റവും പഴക്കം ചെന്നതും മനോഹരവുമായ മൃഗശാലകളിൽ ഒന്നാണ് തിരുവനന്തപുരത്തേത്. ഇതിനോട് ചേർന്നുള്ള നേപ്പിയർ മ്യൂസിയം വാസ്തുവിദ്യയുടെ വിസ്മയമാണ്.

മാജിക് പ്ലാനറ്റ്: കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന ഏഷ്യയിലെ ആദ്യത്തെ മാജിക് അക്കാദമിയാണ് തിരുവനന്തപുരത്ത് സ്ഥിതി ചെയ്യുന്നത്.

മറ്റ് കാഴ്ചകൾ: വെള്ളായണി കായൽ, ആക്കുളം ടൂറിസ്റ്റ് വില്ലേജ്, ശംഖുമുഖം ബീച്ച് എന്നിവയും സന്ദർശകരുടെ പ്രിയപ്പെട്ട ഇടമായി മാറിക്കഴിഞ്ഞു.