India vs England: ‘സെഞ്ചുറി നേടിയതിന് ശേഷമുള്ള ഋഷഭ് പന്തിൻ്റെ ആഘോഷം അനാവശ്യം’; നിലപാടറിയിച്ച് താരത്തിൻ്റെ സർജൻ
Surgeon About Rishabh Pants Somersault Celebration: ഋഷഭ് പന്തിൻ്റെ സമ്മർസോൾട്ട് ആഘോഷം അനാവശ്യമായിരുന്നു എന്ന് താരത്തിൻ്റെ സർജൻ ഡോക്ടർ പർദിവാല. ഇംഗ്ലണ്ടിനെതിരെ സെഞ്ചുറി നേടിയ ശേഷമായിരുന്നു പന്തിൻ്റെ ആഘോഷം.
ഇംഗ്ലണ്ടിനെതിരെ സെഞ്ചുറി നേടിയതിന് ശേഷമുള്ള ഋഷഭ് പന്തിൻ്റെ ആഘോഷം അനാവശ്യമെന്ന് താരത്തിൻ്റെ സർജൻ. ആദ്യ ടെസ്റ്റിൻ്റെ ഒന്നാം ഇന്നിംഗ്സിൽ സെഞ്ചുറി നേടിയ ഋഷഭ് പന്ത് കുട്ടിക്കരണം മറിഞ്ഞാണ് (സമ്മർസോൾട്ട്) ഇത് ആഘോഷിച്ചത്. താരത്തിൻ്റെ ആഘോഷ വിഡിയോ വൈറലായിരുന്നു. (Image Credits - PTI)
സമ്മർസോൾട്ട് ആഘോഷം അനാവശ്യമായിരുന്നു എന്നാണ് അദ്ദേഹത്തിൻ്റെ സർജനായ ഡോക്ടർ പർദിവാല പറഞ്ഞത്. 2022ൽ നടന്ന വാഹനാപകടത്തിൻ്റെ ഭീകരതയിൽ തുടർന്ന് കളിക്കാനാകുമോ എന്ന് ഭയന്നിരുന്ന താരത്തെ ചികിത്സിച്ച് സുഖപ്പെടുത്തിയ ഡോക്ടറാണ് ഡോക്ടർ പർദിവാല.
"ഋഷഭ് പന്ത് ജിംനാസ്റ്റുകളെപ്പോലെയാണ് പരിശീലിച്ചത്. ശരീരം വലിപ്പമുണ്ടെങ്കിലും വഴക്കമുള്ളതാണ്. അതുകൊണ്ടാണ് കുറച്ചുനാളായി അദ്ദേഹം സമ്മർസോൾട്ട് ചെയ്യുന്നത്. പക്ഷേ, ഇംഗ്ലണ്ടിനെതിരെ സെഞ്ചുറി നേടിയതിന് ശേഷമുള്ള സമ്മർസോൾട്ട് അനാവശ്യമായിരുന്നു."- അദ്ദേഹം പറഞ്ഞു.
2022 ഡിസംബർ 30ന് ഡൽഹിയിൽ നിന്നും സ്വന്തം നാടായ റൂർകീയിലേക്കുള്ള യാത്രക്കിടെയാണ് ഋഷഭ് പന്തിൻ്റെ കാർ ഡിവൈഡറിൽ ഇടിച്ച് അപകടമുണ്ടായത്. അപകടത്തിൽ താരത്തിന് ഗുരുതര പരിക്കേറ്റിരുന്നു. അവിടെനിന്നാണ് ഡോക്ടർമാർ പന്തിനെ ചികിത്സിച്ച് സുഖപ്പെടുത്തിയത്.
ആദ്യ ടെസ്റ്റിൽ ഇന്ത്യ അഞ്ച് വിക്കറ്റിന് പരാജയപ്പെട്ടിരുന്നു. രണ്ട് ഇന്നിംഗ്സിലും സെഞ്ചുറി നേടാൻ ഋഷഭ് പന്തിന് സാധിച്ചു. രണ്ടാം മത്സരം ജൂലായ് രണ്ട് മുതൽ ബിർമിങ്ഹാമിലെ എഡ്ജ്ബാസ്റ്റണിലാണ് നടക്കുക. മത്സരത്തിൽ സ്റ്റാർ പേസർ ജസ്പ്രീത് ബുംറ കളിച്ചേക്കില്ലെന്ന് റിപ്പോർട്ടുകളുണ്ട്.
