Land of Fragrances: ലാൻഡ് ഓഫ് ഫ്രാഗ്രൻസ് : ഇതാ ഇവിടെയാണ് ലോകത്തിന്റെ സുഗന്ധം മുഴുവനുള്ളത്
France perfume industry: പാരമ്പര്യത്തിലൂന്നിയ ഈ സുഗന്ധനിർമ്മാണ കലയാണ് ഫ്രാൻസിനെ ലോകത്തിലെ സുഗന്ധങ്ങളുടെ ശക്തികേന്ദ്രമാക്കി മാറ്റിയത്
വിലയേറിയ പെർഫ്യൂമുകൾ ലഭിക്കുന്ന നാട്, സുഗന്ധമുള്ള പൂന്തോട്ടങ്ങളുള്ള രാജ്യം, നൂറ്റാണ്ടുകൾ പഴക്കമുള്ള സുഗന്ധ പാരമ്പര്യം എന്നിവയാണ് ഫ്രാൻസിന് ഈ പേര് നേടിക്കൊടുത്തത്.
മധ്യകാലഘട്ടം മുതൽ തന്നെ ഇവിടെ സുഗന്ധദ്രവ്യങ്ങൾക്ക് വളരെയധികം പ്രാധാന്യം ലഭിച്ചിരുന്നു. സുഗന്ധതൈലങ്ങളും പെർഫ്യൂമുകളും ജനിക്കാനും അത് നിർമ്മിക്കുന്നത് ഒരു കലാരൂപമായി മാറാനുമെല്ലാം ഫ്രാൻസ് വലിയ പങ്ക് വഹിച്ചിട്ടുണ്ട്. ഇതിനു കാരണം അവിടുത്തെ കലാകാരന്മാരും സസ്യശാസ്ത്രജ്ഞരുമാണ്.
ഫ്രഞ്ച് റിവിയേരയിലെ ഗ്രാസ് (Grasse) ആണ് ലോകത്തിൻ്റെ പെർഫ്യൂം തലസ്ഥാനം. ജാസ്മിൻ, റോസ്, ഓറഞ്ച് ബ്ലോസം തുടങ്ങിയവ ലോകോത്തര പെർഫ്യൂമുകൾ നിർമ്മിക്കാനായി ഇവിടെ കൃഷിചെയ്യുന്നു. പണ്ട് തുകൽ കയ്യുറകളിൽ സുഗന്ധം ചേർത്തിരുന്ന കച്ചവടക്കാരിൽ നിന്നാണ് ഈ വ്യവസായം ആഢംബര പെർഫ്യൂമറിയിലേക്ക് വളർന്നത്. ഇന്ന്, പ്രകൃതിദത്ത പൂക്കളിൽ നിന്ന് സുഗന്ധം വേർതിരിച്ചെടുക്കുന്നതിൻ്റെ ആഗോള കേന്ദ്രമാണ് ഗ്രാസ്.
ഷാനൽ, ഡിയോർ, ഗർലെയ്ൻ തുടങ്ങിയ പ്രമുഖ പെർഫ്യൂം ബ്രാൻഡുകൾക്ക് ജന്മം നൽകിയതും ഫ്രാൻസാണ്. നോസ് (Noses) എന്നറിയപ്പെടുന്ന പ്രത്യേക വൈദഗ്ധ്യമുള്ള പെർഫ്യൂമർമാരെ ഇവിടെ പരിശീലിപ്പിക്കുന്നു. ഇവർക്ക് ആയിരക്കണക്കിന് സുഗന്ധങ്ങൾ തിരിച്ചറിയാൻ കഴിയും എന്നാണ് കരുതുന്നത്.
ഫ്രാൻസിലെ പെർഫ്യൂം മ്യൂസിയങ്ങളും വർക്ക്ഷോപ്പുകളും സന്ദർശകർക്ക് സുഗന്ധത്തിൻ്റെ ചരിത്രം അടുത്തറിയാനുള്ള അവസരം നൽകുന്നുണ്ട്. പാരമ്പര്യത്തിലൂന്നിയ ഈ സുഗന്ധനിർമ്മാണ കലയാണ് ഫ്രാൻസിനെ ലോകത്തിലെ സുഗന്ധങ്ങളുടെ ശക്തികേന്ദ്രമാക്കി മാറ്റിയത്
