Divya Deshmukh: ചരിത്ര വിജയം, ലോക ചെസ് കിരീടം നേടി ദിവ്യ ദേശ്മുഖ്
Divya Deshmukh: ഇതാദ്യമായാണ് രണ്ട് ഇന്ത്യൻ താരങ്ങൾ ചെസ് ലോകകപ്പിന്റെ ഫൈനലിൽ ഏറ്റുമുട്ടുന്നത്. മുൻ ലോക വനിത ചാമ്പ്യൻ ചൈനയുടെ ടാൻ സോംഗിയെ തോൽപ്പിച്ചാണ് ദിവ്യ ഫൈനലിൽ എത്തിയത്.
Divya Deshmukh
വനിത ചെസ് ലോകകപ്പിൽ ചരിത്ര വിജയവുമായി ഇന്ത്യയുടെ ദിവ്യ ദേശ്മുഖ്. ജോർജിയയിലെ ബറ്റുമിയിൽ നടന്ന ഫൈനലിൽ ഇന്ത്യക്കാരിയായ കൊനേരു ഹംപിയെ ടൈ ബ്രേക്കറിൽ 2.5-1.5 എന്ന സ്കോറിൽ പരാജയപ്പെടുത്തിയാണ് ദിവ്യ വിജയം നേടിയത്.
വെറും പത്തൊമ്പത് വയസ് മാത്രം പ്രായമുള്ള ദിവ്യ ലോക ചെസ് കിരീടം നേടുന്ന ആദ്യ ഇന്ത്യക്കാരിയാണ്. ഫൈനലിലെ രണ്ട് ക്ലാസിക്കൽ മത്സരങ്ങളും സമനിലയിൽ (1-1) അവസാനിച്ചതിനെ തുടർന്ന്, ടൈബ്രേക്കിന് മത്സരം റാപ്പിഡിലേക്ക് കടക്കുകയായിരുന്നു. എന്നാൽ ടൈ ബ്രേക്കറിലെ ആദ്യ മാച്ചും സമനിലയിലായിരുന്നു. രണ്ടാം റാപ്പിഡ് ഗെയിമിലാണ് ദിവ്യ കിരീടം ചൂടിയത്.
ഈ ചരിത്ര വിജയത്തോടെ ഇന്ത്യയുടെ 88ാം ഗ്രാൻഡ്മാസ്റ്ററായും കിരീടം നേടുന്ന നാലാമത്തെ ഇന്ത്യൻ വനിതയായും ദിവ്യ മാറി.ഹംപി, ആർ. വൈശാലി, ഹരിക ഡി എന്നിവരാണ് നേരത്തെ ഗ്രാൻഡ്മാസ്റ്റർ പട്ടം സ്വന്തമാക്കിയിട്ടുള്ളത്. ഇതിന് പുറമേ അടുത്ത വനിതാ കാൻഡിഡേറ്റ്സിനും ദിവ്യ ദേശ്മുഖ് യോഗ്യത നേടി.
ഇതാദ്യമായാണ് രണ്ട് ഇന്ത്യൻ താരങ്ങൾ ചെസ് ലോകകപ്പിന്റെ ഫൈനലിൽ ഏറ്റുമുട്ടുന്നത്. മുൻ ലോക വനിത ചാമ്പ്യൻ ചൈനയുടെ ടാൻ സോംഗിയെ തോൽപ്പിച്ചാണ് ദിവ്യ ഫൈനലിൽ എത്തിയത്.
