Santosh Trophy 2025-26: ഏത് അസം? അസമൊക്കെ തീര്ന്നു; സന്തോഷ് ട്രോഫിയില് കേരളം സെമിയില്
Santosh Trophy 2025-26 Kerala vs Assam quarter final match: സന്തോഷ് ട്രോഫിയില് കേരളം സെമി ഫൈനലില് പ്രവേശിച്ചു. ക്വാര്ട്ടര് ഫൈനലില് അസമിനെ എതിരില്ലാത്ത മൂന്ന് ഗോളുകള്ക്ക് തകര്ത്താണ് കേരളം സെമിയിലെത്തിയത്. സെമി ഫൈനലില് പഞ്ചാബിനെ നേരിടും.
ദിബ്രുഗഡ്: സന്തോഷ് ട്രോഫിയില് അസമിനെ തകര്ത്ത് കേരളം സെമി ഫൈനലില് പ്രവേശിച്ചു. ഇന്ന് നടന്ന ക്വാര്ട്ടര് ഫൈനലില് അസമിനെ എതിരില്ലാത്ത മൂന്ന് ഗോളുകള്ക്ക് തകര്ത്താണ് കേരളം സെമിയിലെത്തിയത്. സെമി ഫൈനലില് കേരളം പഞ്ചാബിനെ നേരിടും. ക്വാര്ട്ടര് പോരാട്ടത്തില് കേരളം സമഗ്രാധിപത്യമാണ് പുറത്തെടുത്തത്. 17-ാം മിനിറ്റില് ക്യാപ്റ്റന് എം മനോജാണ് കേരളത്തിനായി ആദ്യ ഗോള് നേടിയത്.
45-ാം മിനിറ്റില് കേരളം ലീഡുയര്ത്തി. ഇത്തവണ മുഹമ്മദ് അജ്സലാണ് കേരളത്തിനായി വല കുലുക്കിയത് ഇതിനിടെ മത്സരത്തിലേക്ക് തിരികെയെത്താന് അസം കിണഞ്ഞ് ശ്രമിച്ചെങ്കിലും ഫലം കണ്ടില്ല. ഇഞ്ചുറി ടൈമില് ദില്ഷാദ് വല കുലുക്കിയതോടെ കേരളത്തിന്റെ ഗോള് നേട്ടം മൂന്നായി.
ഇതോടെ ആധികാരികമായ വിജയവുമായി കേരളം സെമിയിലെത്തി. ഏറെ പ്രതീക്ഷയോടെ സ്വന്തം നാട്ടില് ക്വാര്ട്ടര് ഫൈനലില് കളിക്കാനിറങ്ങിയ അസം പുറത്തുമായി. തുടക്കം മുതല് ഒടുക്കം വരെ ആക്രമണാത്മക ഫുട്ബോള് ശൈലിയാണ് കേരളം സ്വീകരിച്ചത്.
കേരളത്തിന്റെ കരുത്തിന് മുന്നില് ഒരിക്കല് പോലും വെല്ലുവിളി ഉയര്ത്താന് അസമിന് സാധിച്ചില്ല. കേരളത്തിന്റെ മുന്നേറ്റത്തെ തടയാനുള്ള അസമിന്റെ പ്രതിരോധ നിരയുടെ ശ്രമങ്ങള് പലപ്പോഴും പാളി. ഗോള്കീപ്പര് ഹജ്മലും മികച്ച പ്രകടനമാണ് പുറത്തെടുത്തത്. അറ്റാക്കിങും, പ്രതിരോധവും, മിഡ്ഫീല്ഡും മികച്ചുനിന്നു. ഇത്തവണ എട്ടാം കിരീട നേട്ടമാണ് കേരളത്തിന്റെ ലക്ഷ്യം. ഗ്രൂപ്പ് ചാമ്പ്യന്മാരായാണ് കേരളം ക്വാര്ട്ടറിലെത്തിയത്.
