Iran-US Conflict: അമേരിക്കയുമായി ചര്ച്ചയ്ക്ക് ഇറാന് തയാറെടുക്കുന്നു; കരാര് പുനഃസ്ഥാപിക്കണമെന്ന് പ്രസിഡന്റ്
Iran US Deal: Tehran Ready to Return to June Agreement Says President: കരാര് വീണ്ടും പ്രാബല്യത്തില് കൊണ്ടുവരണമെന്ന് ചൈന ആവശ്യപ്പെട്ടതിന് പിന്നാലെയാണ് ഇറാന് പ്രസിഡന്റ് നിലപാട് വ്യക്തമാക്കിയത്. ചൈനയുടെ സമീപനത്തോട് ഇറാന് യോജിക്കുന്നുവെന്നും ജൂണില് രൂപപ്പെട്ട ധാരണയിലേക്ക് മടങ്ങേണ്ടത് പ്രധാനമാണെന്നും പെസഷ്കിയാന് അഭിപ്രായപ്പെട്ടു.
മസൂദ് പെസഷ്കിയാന്
ടെഹ്റാന്: അമേരിക്കയുമായുണ്ടാക്കിയ കരാര് പുനഃസ്ഥാപിക്കാന് ഇറാന് തയാറാണെന്ന് പ്രസിഡന്റ് മസൂദ് പെസഷ്കിയാന്. കഴിഞ്ഞ ജൂണില് ഇരുരാജ്യങ്ങളും തമ്മില് ഉണ്ടാക്കിയ ധാരണ പുനരുജ്ജീവിപ്പിക്കണമെന്ന ചൈനയുടെ നിലപാടിനെ ഇറാന് പിന്തുണയ്ക്കുന്നതായും പെസഷ്കിയാന് വ്യക്തമാക്കി. ജൂണില് അമേരിക്കയും ഇറാനും തമ്മില് ഉണ്ടാക്കിയ ധാരണയുടെ അടിസ്ഥാനത്തില് കൂടുതല് ചര്ച്ചകള് മുന്നോട്ടുകൊണ്ടുപോകാനായിരുന്നു പദ്ധതി. എന്നാല് പിന്നീട് ഇരുരാജ്യങ്ങളും തമ്മിലുള്ള സംഘര്ഷം രൂക്ഷമായതോടെ കരാര് നടപ്പാക്കാനുള്ള ശ്രമങ്ങള് നിലച്ചിരുന്നു.
കരാര് വീണ്ടും പ്രാബല്യത്തില് കൊണ്ടുവരണമെന്ന് ചൈന ആവശ്യപ്പെട്ടതിന് പിന്നാലെയാണ് ഇറാന് പ്രസിഡന്റ് നിലപാട് വ്യക്തമാക്കിയത്. ചൈനയുടെ സമീപനത്തോട് ഇറാന് യോജിക്കുന്നുവെന്നും ജൂണില് രൂപപ്പെട്ട ധാരണയിലേക്ക് മടങ്ങേണ്ടത് പ്രധാനമാണെന്നും പെസഷ്കിയാന് അഭിപ്രായപ്പെട്ടു.
അതിനിടെ, അമേരിക്കയും ഇറാനും തമ്മിലുള്ള സംഘര്ഷം അവസാനിപ്പിക്കുന്നതിനുള്ള നയതന്ത്ര ശ്രമങ്ങള് മാസങ്ങളായി തുടരുകയാണ്. ഐക്യരാഷ്ട്രസഭ പൊതുസഭയുടെ സമ്മേളനത്തിനിടെ ചര്ച്ചകള് പുനരാരംഭിക്കുമെന്ന പ്രതീക്ഷ ഉണ്ടായിരുന്നെങ്കിലും ഇതുവരെ കാര്യമായ പുരോഗതി ഉണ്ടായിട്ടില്ല.
യുഎന് പൊതുസഭയില് നടത്തിയ പ്രസംഗത്തില് അമേരിക്കയ്ക്ക് മുന്നില് ഇറാന് വഴങ്ങില്ലെന്ന നിലപാടാണ് പെസഷ്കിയാന് സ്വീകരിച്ചത്. എന്നാല് പിന്നീട് ഒരു അഭിമുഖത്തില് യുദ്ധം തുടരാന് ഇറാന് താല്പര്യമില്ലെന്നും സംഘര്ഷം അവസാനിപ്പിക്കേണ്ടത് അമേരിക്കയുടെ തീരുമാനത്തെ ആശ്രയിച്ചിരിക്കുമെന്നും അദ്ദേഹം പറഞ്ഞു.
Also Read: യു.എസ് ഉപരോധം: ഇറാനിയൻ എയർലൈനുകളുടെ വിമാന സർവീസുകൾ പൂർണ്ണമായും നിർത്തിവെച്ച് യു.എ.ഇ
അമേരിക്കന് പ്രതിനിധി സ്റ്റീവ് വിറ്റ്കോഫും പ്രസിഡന്റ് ഡൊണാള്ഡ് ട്രംപിന്റെ മരുമകന് ജാരഡ് കുഷ്നറും ഉള്പ്പെടെയുള്ളവരുമായി ഇറാന് വിദേശകാര്യ മന്ത്രി അബ്ബാസ് അരാഖ്ചിയും ന്യൂയോര്ക്കില് വെച്ച് കൂടിക്കാഴ്ച നടത്തിയിരുന്നു. എന്നാല് ഈ ചര്ച്ചയില് നിന്ന് ഉടന് തന്നെ നിര്ണായക ധാരണയിലേക്ക് എത്താന് കഴിഞ്ഞിട്ടില്ല.
അതേസമയം, ഹോര്മുസ് കടലിടുക്ക് തുറക്കുന്നതും അമേരിക്കയുമായുള്ള ആണവ ചര്ച്ചകള് പുനരാരംഭിക്കുന്നതും ഉള്പ്പെടെയുള്ള വിഷയങ്ങളില് ഇറാന് വ്യവസ്ഥകള് മുന്നോട്ടുവെച്ചിട്ടുണ്ട്. അമേരിക്ക സൈനിക സമ്മര്ദം കുറയ്ക്കുകയും ഇറാനെതിരായ ഉപരോധങ്ങളും അതുമായി ബന്ധപ്പെട്ട നിയന്ത്രണങ്ങളും സംബന്ധിച്ച് നടപടികള് സ്വീകരിക്കുകയും ചെയ്താല് ഹോര്മുസ് കടലിടുക്ക് തുറക്കാനുള്ള സാധ്യതയുണ്ടെന്നാണ് ഇറാന്റെ പക്ഷം.
ജൂണ് ധാരണയിലേക്ക് മടങ്ങാനുള്ള ഇറാന്റെ പുതിയ നിലപാട് അമേരിക്കയുമായുള്ള നയതന്ത്ര ചര്ച്ചകള്ക്ക് വീണ്ടും വഴിതുറക്കുമോയെന്നാണ് ഇനി ശ്രദ്ധിക്കേണ്ടത്. ഇക്കാര്യത്തില് അമേരിക്കയുടെ പ്രതികരണം വന്നിട്ടില്ല.
English Summary
Iranian President Masoud Pezeshkian said Tehran is willing to return to the June agreement with the United States. His remarks come amid ongoing diplomatic efforts and tensions between Iran and the US.
