Dubai Access Club: അഞ്ച് വർഷത്തെ ടൂറിസ്റ്റ് വിസ, 2000 ദിർഹത്തിൻ്റെ ആനുകൂല്യങ്ങൾ; ‘ദുബായ് ആക്സസ് ക്ലബ്’ പദ്ധതിക്ക് ആർക്കെല്ലാം അപേക്ഷിക്കാം ?
Everything You Need to Know About Dubai Access Club: പദ്ധതിയിൽ അംഗത്വം ലഭിക്കുന്നവർക്ക് ലഭിക്കുന്ന അഞ്ച് വർഷ കാലാവധിയുള്ള മൾട്ടിപ്പിൾ എൻട്രി ടൂറിസ്റ്റ് വിസ ഉപയോഗിച്ച് പുതിയ വിസയെടുക്കാതെ തന്നെ അഞ്ച് വർഷത്തിനുള്ളിൽ എത്ര തവണ വേണമെങ്കിലും ദുബായിലേക്ക് യാത്ര ചെയ്യാം. കൂടാതെ ഒരു വർഷത്തിൽ പരമാവധി 90 ദിവസം വരെ തുടർച്ചയായി ദുബായിൽ തങ്ങാനും ഇതിലൂടെ സാധിക്കും
ദുബായിലേക്ക് സ്ഥിരമായി യാത്ര ചെയ്യുന്ന വിനോദസഞ്ചാരികൾക്കായി അഞ്ച് വർഷത്തെ മൾട്ടിപ്പിൾ എൻട്രി വിസ ഉൾപ്പെടെ നിരവധി ആനുകൂല്യങ്ങളുമായി പുതിയ പദ്ധതി അവതരിപ്പിച്ചിരിക്കുകയാണ് ദുബായ് ടൂറിസം. ‘ദുബായ് ആക്സസ് ക്ലബ്’ എന്ന് പേരിട്ടിരിക്കുന്ന ഈ പദ്ധതി, പ്രത്യേക ക്ഷണം ലഭിക്കുന്നവർക്ക് മാത്രം അംഗമാകാൻ കഴിയുന്ന ഒന്നാണ്. ദുബായ് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്‌സ് അഫയേഴ്‌സിൻ്റെ അംഗീകാരത്തോടെ വിസ അനുവദിക്കുന്ന ഈ പദ്ധതിയിലേക്കുള്ള രജിസ്ട്രേഷൻ ഇപ്പോൾ ആരംഭിച്ചിട്ടുണ്ട്.
പദ്ധതിയിൽ അംഗത്വം ലഭിക്കുന്നവർക്ക് ലഭിക്കുന്ന അഞ്ച് വർഷ കാലാവധിയുള്ള മൾട്ടിപ്പിൾ എൻട്രി ടൂറിസ്റ്റ് വിസ ഉപയോഗിച്ച് പുതിയ വിസയെടുക്കാതെ തന്നെ അഞ്ച് വർഷത്തിനുള്ളിൽ എത്ര തവണ വേണമെങ്കിലും ദുബായിലേക്ക് യാത്ര ചെയ്യാം. കൂടാതെ ഒരു വർഷത്തിൽ പരമാവധി 90 ദിവസം വരെ തുടർച്ചയായി ദുബായിൽ തങ്ങാനും ഇതിലൂടെ സാധിക്കും. വിസയ്ക്ക് പുറമെ, ദുബായിലെ പ്രധാന ഹോട്ടലുകൾ, വിനോദസഞ്ചാര കേന്ദ്രങ്ങൾ, മാളുകൾ എന്നിവിടങ്ങളിൽ ഉപയോഗിക്കാൻ കഴിയുന്ന 2,000 ദിർഹം വരെയുള്ള ക്രെഡിറ്റ് പോയിൻ്റുകളും അംഗങ്ങളെ കാത്തിരിക്കുന്നുണ്ട്.
അൽസാദ കാർഡ് ഉടമകൾക്ക് ലഭിക്കുന്ന പ്രത്യേക വിലക്കിഴിവുകളും ദുബായിൽ വിമാനമിറങ്ങുമ്പോൾ തന്നെ ‘du’ നൽകുന്ന സൗജന്യ പ്രീപെയ്ഡ് സിം കാർഡും ഈ പദ്ധതിയുടെ മറ്റ് പ്രധാന ആകർഷണങ്ങളാണ്. തിരഞ്ഞെടുത്ത കോർപ്പറേറ്റ് കമ്പനികളിലെ ജീവനക്കാർക്കും പ്രമുഖ ലോയൽറ്റി പ്രോഗ്രാം അംഗങ്ങൾക്കുമാണ് ഈ ക്ലബ്ബിലേക്ക് പ്രധാനമായും ക്ഷണം ലഭിക്കുക. എമിറേറ്റ്സ് എയർലൈൻ, എമാർ ഹോസ്പിറ്റാലിറ്റി, ജുമൈറ ഗ്രൂപ്പ്, മാരിയറ്റ്, ഹിൽട്ടൺ, ഹയാത്ത് തുടങ്ങിയ കമ്പനികളിലെ ജീവനക്കാർക്ക് തങ്ങളുടെ ഐഡിയും ഔദ്യോഗിക ഇമെയിലും ഉപയോഗിച്ച് വിസിറ്റ് ദുബായ് വെബ്സൈറ്റിലൂടെ അപേക്ഷിക്കാം.
എമിറേറ്റ്സ് സ്കൈവാർഡ്സ്, യു ബൈ എമാർ, ഹിൽട്ടൺ ഓണേഴ്സ്, മാരിയറ്റ് ബോൺവോയ് തുടങ്ങിയ ലോയൽറ്റി പ്രോഗ്രാമുകളിൽ അംഗത്വമുള്ളവർക്കും അപേക്ഷ നൽകാം. ഈ രണ്ട് ലിസ്റ്റിലും ഉൾപ്പെടാത്തവർക്കായി ഫോമിൽ ‘Others’ എന്ന ഓപ്ഷനും ഉൾപ്പെടുത്തിയിട്ടുണ്ട്. അംഗത്വത്തിനും വിസയ്ക്കുമായി 4,032.50 ദിർഹമാണ് അപേക്ഷാ ഫീസ്. നിലവിൽ യു.എ.ഇയിൽ ഉള്ളവരാണ് അപേക്ഷിക്കുന്നതെങ്കിൽ 650 ദിർഹം അധികമായി നൽകേണ്ടിവരും.
English Summary
Dubai launched the invitation-only Dubai Access Club, offering frequent visitors a five-year multiple-entry tourist visa, a free SIM card, and up to 2,000 dirhams in hotel and retail credits.
