Kerala Gold Price: വീണ്ടും ‘പൊന്‍മല’ കയറ്റം, സ്വര്‍ണവില ഠപ്പേന്ന് മുകളിലേക്ക്‌; ആശ്വാസക്കാലം കഴിഞ്ഞു?

സ്വര്‍ണവില

നാല് ദിവസത്തെ ഇടവേളയ്ക്ക് ശേഷം സംസ്ഥാനത്ത് സ്വര്‍ണവില വീണ്ടും വര്‍ധിക്കുന്നു. ഇന്ന് 92,000 രൂപയാണ് പവന് നിരക്ക്. 91,720 രൂപയായിരുന്നു മുന്‍നിരക്ക്. 280 രൂപയാണ് വര്‍ധിച്ചത്. ഗ്രാമിന് 11,500 രൂപയാണ് ഇന്നത്തെ നിരക്ക്. ഈ മാസം 21ന് സ്വര്‍ണവില സര്‍വകാല റെക്കോഡിലെത്തിയിരുന്നു. അന്ന് 97,360 രൂപയായിരുന്നു ഒരു പവന്റെ വില. തുടര്‍ന്ന് നാല് ദിവസങ്ങളായി നിരക്ക് ക്രമേണ കുറഞ്ഞുവരികയായിരുന്നു. 21-95,760, 22ന് രാവിലെ-93,280, 22ന് ഉച്ചയ്ക്ക്-92,320, 23-91,720 എന്നിങ്ങനെയാണ് നിരക്ക് കുറഞ്ഞത്. എന്നാല്‍ ഇന്ന് നിരക്ക് നേരിയ തോതില്‍ വര്‍ധിച്ചത് സ്വര്‍ണവില വീണ്ടും കുതിച്ചുയരുന്നതിന്റെ സൂചനയാണോ എന്നാണ് ആശങ്ക.

ഗോള്‍ഡ് ഇടിഎഫിലെ ലാഭമെടുപ്പായിരുന്നു കഴിഞ്ഞ ദിവസങ്ങളില്‍ വില ഇടിവിന് സഹായിച്ചത്. ഇതിനൊപ്പം ഡോളര്‍ നേരിട്ട തകര്‍ച്ചയും ഗുണമായി. യുഎസ്-ചൈന വ്യാപാര സംഘര്‍ഷത്തിന് അയവ് വരുമെന്ന സൂചനകളും ഗുണകരമാണ്. മലേഷ്യയില്‍ വച്ച് ഇരുരാജ്യങ്ങളും വ്യാപാര ചര്‍ച്ചകള്‍ നടത്തുമെന്നാണ് റിപ്പോര്‍ട്ട്. ചൈനയുടെ വൈസ് പ്രീമിയര്‍ ഹെ ലൈഫങിന്റെ നേതൃത്വത്തിലുള്ള പ്രതിനിധി സംഘം ഇന്ന് മുതല്‍ 27 വരെ മലേഷ്യ സന്ദര്‍ശിക്കുന്നുണ്ട്.

ഈ സന്ദര്‍ശനത്തില്‍ സാമ്പത്തിക, വ്യാപാര ചര്‍ച്ചകള്‍ നടത്തുമെന്ന് ചൈനീസ് വാണിജ്യ മന്ത്രാലയം അറിയിച്ചു. ഈ ചര്‍ച്ചയില്‍ സമവായമായാല്‍ സ്വര്‍ണവില വീണ്ടും കുറഞ്ഞേക്കും.സമവായമായില്ലെങ്കില്‍ കാര്യങ്ങള്‍ തകിടം മറിയും.

Also Read: Gold: വിപണിയിൽ മാത്രമല്ല, ഗൂഗിളിലും സ്വർണം തന്നെ താരം; നാട്ടുക്കാർക്ക് അറിയേണ്ടത് ഈയൊരു കാര്യം!

അന്താരാഷ്ട്ര സംഘര്‍ഷങ്ങള്‍ സ്വര്‍ണവിലയ്ക്ക് എപ്പോഴും കുതിപ്പ് പകരുന്ന ഘടകമാണ്. ഗാസയിലെ സംഘര്‍ഷവും, റഷ്യ-യുക്രൈന്‍ പോരുമാണ് സമീപകാലങ്ങളില്‍ സ്വര്‍ണവില വര്‍ധനവിന് കരുത്ത് പകര്‍ന്നത്. ഇതില്‍ ഗാസയിലെ സംഘര്‍ഷത്തിന് അയവ് വന്നത് ആശ്വാസകരമാണ്. എന്നാല്‍ റഷ്യ-യുക്രൈന്‍ പോര് കരുത്ത് പ്രാപിക്കുന്നത് വെല്ലുവിളിയാണ്. യുഎസ് ഫെഡ് റിസര്‍വ് പലിശനിരക്ക് കുറയ്ക്കുമെന്ന് തന്നെയാണ് ഏറ്റവും ഒടുവില്‍ ലഭിക്കുന്ന സൂചനകള്‍. പ്രതീക്ഷിക്കുന്നതുപോലെ അടിസ്ഥാന പലിശനിരക്ക് കുറച്ചാല്‍ സ്വര്‍ണവില പിടിവിട്ട് ഉയരുമെന്ന് ഉറപ്പാണ്.