Kerala school Holiday : മുണ്ടിനീര് പാരയായി, ഇവർക്കെല്ലാം കുറച്ചു ദിവസം അവധിയാണ്…
Holiday due to Mumps Outbreak: കൂടുതൽ കുട്ടികളിലേക്ക് രോഗം പടരുന്നത് തടയുന്നതിനുള്ള മുൻകരുതൽ നടപടിയുടെ ഭാഗമായാണ് അവധി പ്രഖ്യാപിച്ചിരിക്കുന്നത്.
School Holidays (2)
നീർക്കുന്നം: ആലപ്പുഴ ജില്ലയിൽ മുണ്ടിനീര് (Mumps) രോഗം വീണ്ടും വ്യാപിക്കുന്ന സാഹചര്യത്തിൽ രോഗം പടരുന്നത് തടയാൻ രണ്ട് സ്കൂളുകൾക്ക് 21 ദിവസത്തെ അവധി പ്രഖ്യാപിച്ച് ജില്ലാ കളക്ടർ ഉത്തരവായി. കഴിഞ്ഞ കുറച്ചു മാസങ്ങൾക്കിടെ ജില്ലയിലെ വിവിധ സ്കൂളുകളിൽ സമാനമായ രീതിയിൽ മുണ്ടിനീര് സ്ഥിരീകരിക്കുകയും ദീർഘകാല അവധി നൽകേണ്ട സാഹചര്യമുണ്ടാവുകയും ചെയ്തിട്ടുണ്ട്.
നീർക്കുന്നം എച്ച്.ഐ.എൽ.പി സ്കൂളിൽ രോഗം സ്ഥിരീകരിച്ചതിനെത്തുടർന്ന് നവംബർ 25 മുതൽ പ്രാബല്യത്തിൽ വരുന്ന രീതിയിൽ 21 ദിവസത്തെ അവധിയാണ് പ്രഖ്യാപിച്ചത്.
അതുപോലെ, മണ്ണഞ്ചേരി ഗവ. ഹൈസ്കൂളിലെ എൽ പി സെക്ഷനിലും മുണ്ടിനീര് രോഗം കണ്ടെത്തിയതിനെ തുടർന്ന് എൽ പി വിഭാഗത്തിന് നവംബർ 26 മുതൽ 21 ദിവസം അവധി നൽകിയിട്ടുണ്ട്.
കൂടുതൽ കുട്ടികളിലേക്ക് രോഗം പടരുന്നത് തടയുന്നതിനുള്ള മുൻകരുതൽ നടപടിയുടെ ഭാഗമായാണ് അവധി പ്രഖ്യാപിച്ചിരിക്കുന്നത്. ഈ അവധി ദിവസങ്ങളിൽ ക്ലാസുകൾ ഓൺലൈനായി നടത്താനുള്ള ക്രമീകരണങ്ങൾ ജില്ലാ വിദ്യാഭ്യാസ ഉപഡയറക്ടർ നിർവ്വഹിക്കണമെന്ന് കളക്ടറുടെ ഉത്തരവിൽ നിർദ്ദേശമുണ്ട്. കൂടാതെ, വിദ്യാലയങ്ങളിൽ രോഗം പടർന്നു പിടിക്കാതിരിക്കാനുള്ള പ്രതിരോധ നടപടികൾ ആരോഗ്യവകുപ്പും തദ്ദേശ സ്വയംഭരണ വകുപ്പും ചേർന്ന് നടത്തണമെന്നും ഉത്തരവിൽ എടുത്തുപറയുന്നു.
