Marie Curie Scholarship: 90 ലക്ഷത്തിന്റെ മേരിക്യൂറി സ്കോളർഷിപ് ഇത്തവണ കേരളത്തിലേക്ക്…അഭിമാനമായി കൽപറ്റക്കാരി മാളവിക

കല്പറ്റ: ശാസ്ത്ര മേഖലയിൽ ഉള്ളവർക്ക് ഏറെ സുപരിചിതമാണ് മേരി ക്യൂറി ഗവേഷണ സ്കോളർഷിപ്പ്. അന്താരാഷ്ട്ര തലത്തിലുള്ള ഈ സ്കോളർഷിപ്പിനു ഇത്തവണ അർഹയായിരിക്കുന്നത് ഒരു ഇന്ത്യക്കാരിയാണ് അതിലുപരി ഒരു മലയാളി ആണ്.

90 ലക്ഷം രൂപയുടെ ഈ സ്കോളർഷിപ്പ് നേടിയിരിക്കുന്നത് വയനാട്ടിലെ കൽപ്പറ്റ സ്വദേശിന് എം.എൻ. മാളവികയാണ്. പഠന മികവിനാണ് മാളവികയ്ക്ക് ഈ സ്കോളർഷിപ്പ് ലഭിച്ചിരിക്കുന്നത്. ഗ്രീസിലെ ഫൗണ്ടേഷൻ ഫോർ റിസർച്ച് ആൻഡ് ടെക്നോളജിയിൽ സോഫ്റ്റ് മാറ്റർ ഫിസിക്സാണ് മാളവികയുടെ ഗവേഷണമേഖല. സ്‌ട്രക്ച്ചർ ആൻഡ് ലേസർ (ഐ.ഇ.എസ്.എൽ.) വിഷയത്തിലാണ് അവർ ഗവേഷണം ചെയ്യുന്നത്.

സ്കോളർഷിപ്പിന്റെ വഴി

കൊളോഡിയൽ ജെല്ലുകളുടെ സ്വഭാവം മനസ്സിലാക്കുകയും നിയന്ത്രിക്കുകയും ചെയ്യുന്നതിനുള്ള വഴി തിരയുകയാണ് മാളവിക തന്റെ ​ഗവേഷണത്തിലൂടെ. ഗ്രീസിലെ ക്രീറ്റിലുള്ള ഫൗണ്ടേഷൻ ഫോർ റിസർച്ച് ആൻഡ് ടെക്നോളജിയിൽ ഇവർക്ക് പ്രവേശനം ലഭിച്ചു. അക്കാദമിക മികവിന്റെയും അഭിമുഖത്തിന്റെയും അടിസ്ഥാനത്തിൽ ലഭിച്ച വ്യക്തിഗത സ്കോറാണ് മാളവികയെ സ്കോളർഷിപ്പിന് അർഷയാക്കിയത്.

ബിരുദാനന്തര ബിരുദ പഠനകാലത്ത് ഒരു പ്രോജക്ടിന്റെ ഭാഗമായി ഡൽഹിയിലെത്തിയപ്പോഴാണ് ഇവർ ആദ്യമായി മേരി ക്യൂറി സ്കോളർഷിപ്പിനെക്കുറിച്ച് കേൾക്കുന്നത്. താൽപര്യം തോന്നി കൂടുതൽ അന്വേഷിച്ചപ്പോൾ നേടണം എന്ന ആ​ഗ്രഹം കഠിനമായി തോന്നി. അന്നു മുതൽ ഇത് നേടിയെടുക്കാൻ ശ്രമം തുടങ്ങുകയായിരുന്നു.

ALSO READ – ഐബിപിഎസ് അഡ്മിറ്റ് കാർഡ് എത്തി, പരീക്ഷ നവംബറിൽ, ഡൗൺലോഡ് ചെയ്യുന്നത് ഇങ്ങനെ…

പുണെയിലെ സി.എസ്.ഐ.ആർ. നാഷണൽ കെമിക്കൽ ലബോറട്ടറിയിലെ പ്രോജക്ട് അസോസിയേറ്റ് ആയിരിക്കെയാണ് മേരി ക്യൂറി സ്കോളർഷിപ്പ് ലഭിക്കുന്നത്. കണ്ണൂർ സർവകലാശാലയിൽ നിന്ന് ഫിസിക്സിൽ ബിരുദാനന്തര ബിരുദം നേടിയ മാളവികയുടെ ബിരുദ പഠനം സുൽത്താൻ ബത്തേരി സെയ്ന്റ് മേരീസ് കോളേജിലായിരുന്നു. 10-ാം ക്ലാസുവരെ കല്പറ്റ സെയ്ന്റ് ജോസഫ്സ് കോൺവെന്റ് സ്കൂളിലാണ് പഠിച്ചത്.

പിണങ്ങോട് ഡബ്ല്യു.ഒ.എച്ച്.എസ്.എസിലായിരുന്നു പ്ലസ്ടു. റിട്ട. കെ.എസ്.ഇ.ബി. സബ് എൻജിനിയർ പിണങ്ങോട് മേക്കാട്ടില്ലത്ത് നാരായണന്റെയും അധ്യാപികയായ എൻ.ബി. സുനിതയുടെയും മകളാണ്. സഹോദരി എം.എൻ. കൃഷ്ണ മംഗലാപുരത്ത് എം.എസ് സി. സൈക്കോളജി പഠിക്കുന്നു.