NHAI Recruitment 2025: ദേശീയപാത അതോറിറ്റിയിൽ അവസരം; 60 ഒഴിവുകൾ, 1,77,000 വരെ ശമ്പളം, ഇന്ന് തന്നെ അപേക്ഷിക്കാം

പ്രതീകാത്മക ചിത്രം

നാഷണൽ ഹൈവേ അതോറിട്ടി ഓഫ് ഇന്ത്യ (എൻഎച്ച്എഐ) ഡെപ്യൂട്ടി മാനേജർ (ടെക്നിക്കൽ) തസ്തികയിലേക്ക് അപേക്ഷ ക്ഷണിച്ചു. ആകെ 60 ഒഴിവുകളാണ് ഉള്ളത്. നേരിട്ടുള്ള നിയമനമാണ്. താൽപ്പര്യമുള്ളവരും യോഗ്യരുമായ ഉദ്യോഗാർത്ഥികൾക്ക് ജൂൺ 9ന് വൈകുന്നേരം 6 മണി വരെ ഓൺലൈനായി അപേക്ഷിക്കാം.

ഡെപ്യൂട്ടി മാനേജർ തസ്തികയിലെ 60 ഒഴിവുകളിൽ ജനറൽ വിഭഗത്തിന് 27 ഒഴിവ്, എസ്‌സി 9, എസ്ടി 4, ഒബിസി നോൺ ക്രീമിലെയർ 13, ഇഡബ്ല്യുഎസിന് 7 എന്നിങ്ങനെയാണ് നൽകിയിരിക്കുന്നത്. അംഗീകൃത സർവകലാശാല / സ്ഥാപനത്തിൽ നിന്ന് സിവിൽ എഞ്ചിനീയറിംഗിൽ ബിരുദം നേടിയ ഉദ്യോഗാർത്ഥികൾക്കാണ് അവസരം. 2025ലെ ഗേറ്റ് സ്കോർ അടിസ്ഥാനത്തിലാണ് തിരഞ്ഞെടുപ്പ്. കൂടാതെ, പ്രമാണ പരിശോധന (ഡോക്യുമെന്റ് വെരിഫിക്കേഷൻ), വൈദ്യപരിശോധന എന്നിവയും ഉണ്ടാകും.

തിരഞ്ഞെടുക്കപെടുന്നവർ മൂന്ന് വർഷത്തിൽ കുറയാതെ സേവനമനുഷ്ഠിക്കാമെന്ന് കാണിച്ച് 5 ലക്ഷം രൂപയുടെ സർവീസ് ബോണ്ട് നൽകേണ്ടതുണ്ട്. അപേക്ഷകർക്കുള്ള ഏറ്റവും ഉയർന്ന പ്രായപരിധി 30 വയസ്സാണ്. എസ്‌സി/എസ്ടി ഉദ്യോഗാർത്ഥികൾക്ക് 5 വർഷവും, ഒബിസിക്ക് 3 വർഷവും, പിഡബ്ല്യുബിഡിക്ക് 10 മുതൽ 15 വർഷവും പ്രായപരിധിയിൽ ഇളവ് അനുവദിച്ചിട്ടുണ്ട്. വിമുക്തഭടന്മാർക്കും പ്രായപരിധിയിൽ 5 വർഷത്തെ ഇളവ് ലഭിക്കും. കൂടുതൽ വിവരങ്ങൾക്ക് എൻഎച്ച്എഐയുടെ ഔദ്യോഗിക വെബ്‌സൈറ്റ് സന്ദർശിക്കുക.

ALSO READ: നീറ്റ്-പിജി പരീക്ഷ ഓഗസ്റ്റ് 3 ന്, തീയതി നീട്ടാനുള്ള അപേക്ഷ അംഗീകരിച്ച് സുപ്രീം കോടതി

അപേക്ഷാ പ്രക്രിയ

• നാഷണൽ ഹൈവേ അതോറിറ്റി ഓഫ് ഇന്ത്യ (NHAI) യുടെ ഔദ്യോഗിക വെബ്‌സൈറ്റായ nhai.gov.in സന്ദർശിക്കുക.
• ഹോം പേജിൽ ലഭ്യമായ ‘ഡെപ്യൂട്ടി മാനേജർ (ടെക്നിക്കൽ) റിക്രൂട്ട്മെന്റ്’ എന്നത് തിരഞ്ഞെടുത്ത് ‘അപ്ലൈ ഓൺലൈൻ’ എന്നതിൽ ക്ലിക്ക് ചെയ്യുക.
• അപേക്ഷ ഫോം പൂരിപ്പിച്ച് ആവശ്യമായ രേഖകൾ സ്കാൻ ചെയ്ത് അപ്‌ലോഡ് ചെയ്യുക.
• അപേക്ഷ സമർപ്പിച്ച ശേഷം തുടരാവശ്യങ്ങൾക്കായി ഫോമിന്റെ ഒരു പകർപ്പ് പ്രിന്റൗട്ട് എടുത്ത് സൂക്ഷിക്കാം.