Ilayaraja Copyright: പകർപ്പവകാശ തർക്കം: ഇളയരാജയ്ക്ക് തിരിച്ചടി, സുപ്രീം കോടതി ഹർജി തള്ളി
Ilayaraja copyright issue: വർഷങ്ങളായി ഈ ഗാനങ്ങളുടെ അവകാശവുമായി ബന്ധപ്പെട്ട് ഓറിയന്റൽ റെക്കോർഡ്സുമായും എക്കോ റെക്കോർഡ്സുമായും ഇളയരാജ നിയമയുദ്ധത്തിലാണ്.
ന്യൂഡൽഹി: സംഗീത സംവിധായകൻ ഇളയരാജയുടെ പകർപ്പവകാശ തർക്കവുമായി ബന്ധപ്പെട്ട കേസ് ബോംബെ ഹൈക്കോടതിയിൽ നിന്ന് മദ്രാസ് ഹൈക്കോടതിയിലേക്ക് മാറ്റണമെന്ന അപേക്ഷ സുപ്രീം കോടതി തള്ളി. സോണി മ്യൂസിക് എന്റർടെയ്ൻമെന്റ് ഇന്ത്യ 2022-ൽ ബോംബെ ഹൈക്കോടതിയിൽ ഇളയരാജക്കെതിരെ ഫയൽ ചെയ്ത കേസാണ് മാറ്റണമെന്ന് ഇളയരാജ ആവശ്യപ്പെട്ടത്. ചീഫ് ജസ്റ്റിസ് ബി.ആർ. ഗവായ്, ജസ്റ്റിസുമാരായ കെ. വിനോദ് ചന്ദ്രൻ, എൻ.വി. അൻജാരിയ എന്നിവരടങ്ങിയ ബെഞ്ചാണ് ഹർജി പരിഗണിച്ചത്.
ഇളയരാജ മ്യൂസിക് ആൻഡ് മാനേജ്മെന്റ് പ്രൈവറ്റ് ലിമിറ്റഡ് ഇളയരാജയുടെ 536 സംഗീത സൃഷ്ടികൾ ഉപയോഗിക്കുന്നത് തടയണമെന്നാവശ്യപ്പെട്ടാണ് സോണി മ്യൂസിക് പരാതി നൽകിയത്. ഈ ഗാനങ്ങളുടെ അവകാശം ഓറിയന്റൽ റെക്കോർഡ്സിൽ നിന്നും എക്കോ റെക്കോർഡ്സിൽ നിന്നും തങ്ങൾ സ്വന്തമാക്കിയെന്ന് അവകാശപ്പെട്ടാണ് സോണി മ്യൂസിക് രംഗത്തെത്തിയത്.
വർഷങ്ങളായി ഈ ഗാനങ്ങളുടെ അവകാശവുമായി ബന്ധപ്പെട്ട് ഓറിയന്റൽ റെക്കോർഡ്സുമായും എക്കോ റെക്കോർഡ്സുമായും ഇളയരാജ നിയമയുദ്ധത്തിലാണ്. 2019-ൽ മദ്രാസ് ഹൈക്കോടതി ഒരു സംഗീതസംവിധായകൻ എന്ന നിലയിൽ ഇളയരാജയുടെ ധാർമ്മികവും സവിശേഷവുമായ അവകാശങ്ങൾ ശരിവച്ചിരുന്നു. ഇതിന് പിന്നാലെയാണ് ഈ ഗാനങ്ങളുടെ ഉടമസ്ഥാവകാശം തങ്ങൾക്കാണെന്ന് വാദിച്ച് സോണി മ്യൂസിക് രംഗപ്രവേശം ചെയ്തത്.
1,500 സിനിമകളിലായി 7,500-ൽ അധികം ഗാനങ്ങളുള്ള ഇന്ത്യയിലെ പ്രമുഖ സംഗീത സംവിധായകരിൽ ഒരാളാണ് ഇളയരാജ. പകർപ്പവകാശ ലംഘനത്തിനെതിരെ നിരവധി ചലച്ചിത്ര നിർമ്മാതാക്കളുമായി ഇളയരാജ നിയമപോരാട്ടത്തിലാണ്.
