Kerala Story: ‘ശാലിനി ഉണ്ണിക്കൃഷ്ണന്’ ദേശീയ അവാർഡ് കൊടുക്കാത്തതിൽ ദു:ഖമുണ്ട്; സുദീപ്തോ സെൻ

Kerala Story

ദി കേരള സ്റ്റോറി എന്ന ചിത്രത്തിന് വേണ്ടത്ര പരി​ഗണന ലഭിച്ചില്ലെന്ന് സംവിധായകൻ സുദീപ്തോ സെൻ. രണ്ട് ദേശീയ പുരസ്കാരങ്ങൾ ലഭിച്ചെങ്കിലും ചിത്രത്തിന് കൂടുതൽ അവാർഡുകൾ‌ കിട്ടാൻ അർഹതയുണ്ടെന്ന് അദ്ദേഹം പറഞ്ഞു. 71-ാമത് ദേശീയ ചലച്ചിത്ര പുരസ്കാരങ്ങളിൽ മികച്ച സംവിധായകൻ, മികച്ച ഛായാഗ്രഹണം എന്നീ രണ്ട് വിഭാ​ഗങ്ങളിൽ ചിത്രത്തിന് പുരസ്കാരം ലഭിച്ചിരുന്നു.

മികച്ച സംവിധായകനുള്ള പുരസ്കാരം ലഭിച്ചത് അപ്രതീക്ഷിത നേട്ടമായിരുന്നു. സാങ്കേതിക വിഭാ​ഗങ്ങളിലെ പുരസ്കാരമാണ് പ്രതീക്ഷിച്ചത്. രണ്ട് വർഷത്തിന് ശേഷവും ചിത്രം ചർച്ച ചെയ്യപ്പെടുമ്പോൾ അത് തീർച്ചയായും സാങ്കേതികമായി മികച്ചതായിരിക്കും. അതിനാൽ സാങ്കേതിക പ്രവർത്തകർക്ക് അവാർഡ് ലഭിക്കുമെന്ന് പ്രതീക്ഷിച്ചിരുന്നു.

ALSO READ: ‘കേരള സ്റ്റോറി ഇസ്ലാമോഫോബിക് സിനിമയല്ല, കണ്ടിട്ട് വിമർശിക്കൂ’; പ്രതികരണവുമായി സംവിധായകൻ

ഛായാ​ഗ്രഹകന് പുരസ്കാരം ലഭിച്ചു. പക്ഷേ തിരക്കഥാകൃത്തിനും നടി അദാ ശർമ്മയ്ക്കും മേക്കപ്പ് ആർട്ടിസ്റ്റിനും പുരസ്കാം ലഭിക്കാത്തതിൽ ചെറിയ ദു:ഖമുണ്ട്. എങ്കിലും ഈ ചിത്രത്തിലൂടെ തനിക്ക് ലഭിച്ച പുരസ്കാരങ്ങളിൽ സന്തുഷ്ടനാണെന്നും സുദീപ്തോ സെൻ ഹിന്ദുസ്ഥാൻ ടൈംസിന് നൽകിയ അഭിമുഖത്തിൽ പറഞ്ഞു.

കേരള സ്റ്റോറിക്ക് ദേശീയ അവാർഡ് ലഭിച്ചതിൽ വലിയ വിമർശനങ്ങൾ ഉയർന്നിരുന്നു. ദേശീയ പുരസ്കാര ജൂറി കേരളത്തെ അവഹേളിച്ചെന്നും ജനാധിപത്യ വിശ്വാസികൾ ഈ അനീതിക്കെതിരെ ശബ്ദമുയർത്തണമെന്നും മുഖ്യമന്ത്രി പിണറായി വിജയൻ പ്രതികരിച്ചു. കേരള സ്റ്റോറിക്ക് പുരസ്കാരം നൽകിയത് അം​ഗീകരിക്കാൻ കഴിയില്ലെന്നും ചലച്ചിത്ര പുരസ്കാരത്തെ രാഷ്ട്രീയവൽക്കരിക്കാൻ കഴിയില്ലെന്നുമായിരുന്നു പ്രതിപക്ഷ നേതാവ് വിഡി സതീശന്റെ പ്രതികരണം.