Anoop John: ‘പലയിടത്തും രേണുവിന് ജോലി ശരിയാക്കി കൊടുത്തിരുന്നു, അവരെ വളഞ്ഞിട്ട് ആക്രമിക്കുകയാണ്’; അനൂപ് ജോൺ
Anoop John about Renu Sudhi: ജീവിച്ചിരുന്നപ്പോൾ ഇത്രയധികം ആരാധകർ ഉണ്ടായിരുന്നുവെങ്കിൽ സുധി ചേട്ടൻ വെറെ ലെവൽ എത്തുമായിരുന്നുവെന്ന് അനൂപ് ജോൺ. ഇപ്പോൾ സുധി ചേട്ടന്റെ ഭാര്യയെ വളഞ്ഞിട്ട് ആക്രമിക്കുകയാണെന്നും അദ്ദേഹം പറഞ്ഞു.
അനൂപ് ജോൺ, രേണു സുധി
മലയാളം ടെലിവിഷനിൽ ഏറെ ആരാധകരുള്ള ഹിറ്റ് ഷോയായിരുന്നു സ്റ്റാർ മാജിക്. പരിപാടിയിലെ പ്രധാനതാരമായിരുന്നു അന്തരിച്ച കൊല്ലം സുധി. ഇപ്പോഴിതാ കൊല്ലം സുധിയെ കുറിച്ചും അദ്ദേഹത്തിന്റെ ഭാര്യ രേണുവിനെ കുറിച്ചും സംസാരിക്കുകയാണ് ഷോയുടെ ഡയറക്ടർ അനൂപ് ജോൺ.
‘കൊല്ലം സുധി ചേട്ടന്റെ അഭാവം നികത്താൻ കഴിയില്ല. അദ്ദേഹം ആ ഷോയിൽ ഉണ്ടായിരുന്നപ്പോൾ പോലും അത്രയ്ക്ക് ആരാധകർ പുള്ളിക്ക് ഇല്ലായിരുന്നു എന്നതാണ് സത്യം. അദ്ദേഹം മരിച്ച ശേഷമാണ് ഇത്രയധികം ആളുകൾ ചേട്ടനെ ഇഷ്ടപ്പെട്ടിരുന്നത് എന്ന് മനസ്സിലാക്കുന്നത്. ജീവിച്ചിരുന്നപ്പോൾ ഇത്രയധികം ആരാധകർ ഉണ്ടായിരുന്നുവെങ്കിൽ ചേട്ടൻ വെറെ ലെവൽ എത്തുമായിരുന്നു.
സുധി ചേട്ടന്റെ നിഷ്കളങ്കതയാണ് എല്ലാവരും ഇഷ്ടപ്പെട്ടത്. അദ്ദേഹം വെറുതെ ഇരുന്നൊന്ന് ചിരിച്ചാൽ മാത്രം മതി. അത് കാണാൻ ഇഷ്ടം ഉണ്ടായിരുന്ന നിരവധി പേർ ഉണ്ടായിരുന്നു. ഒപ്പം കൂടുതൽ ചീത്ത വിളിക്കുന്നവരും ഉണ്ടായിരുന്നു. ഷോ നടക്കുന്ന സമയത്ത് എന്തിനാണ് ഇതിനകത്ത് സുധിയെ കൊണ്ടുവന്നിരിക്കുന്നത് എന്ന കമന്റുകൾ പോലും വന്നിട്ടുണ്ട്.
ഇപ്പോൾ സുധി ചേട്ടന്റെ ഭാര്യയെ വളഞ്ഞിട്ട് ആക്രമിക്കുകയാണ്. അവർ അവർക്ക് ഇഷ്ടമുള്ളത് പോലെ ജീവിക്കട്ടെ. ആരുടെയും ജീവിതത്തിലോ കരിയറിലോ കയറി ഇടപെടാൻ ആർക്കും അവകാശമില്ല എന്നാണ് ഞാൻ വിശ്വസിക്കുന്നത്. അവർക്ക് ജീവിക്കാൻ പൈസ വേണം.
പലയിടത്തുനിന്നും രേണുവിന് ജോലി ശരിയാക്കി കൊടുത്തിരുന്നു. പക്ഷേ അവർ അതിന് ഫിറ്റ് അല്ലെന്ന് പറഞ്ഞ് സ്വയം പോരുകയായിരുന്നു. ഇപ്പോൾ വീഡിയോസ് ഒക്കെ വന്നു തുടങ്ങി. അതിനെക്കുറിച്ച് എനിക്കൊന്നും അറിയില്ല. അഭിപ്രായം പറയാം. പക്ഷേ ആരും അവരുടെ ജീവിതത്തിൽ കയറി ഇടപെടേണ്ടതില്ല’ എന്നാണ് അനൂപ് ജോൺ പറഞ്ഞത്. ഇൻഫൈൻ പ്ലസ് എന്ന യൂട്യൂബ് ചാനലിന് നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം.
