Actor Vijay: സ്ക്രീനിലല്ല ഇനി നേരിട്ട് അരസിയൽ; തമിഴക വെട്രി കഴകം പാർട്ടിക്ക് തിരഞ്ഞെടുപ്പ് കമ്മിഷന്റെ അംഗീകാരം

vijay

ചെന്നൈ: വിവാദങ്ങൾക്കിടെ തമിഴക വെട്രി കഴകം പാർട്ടിക്ക് തിരഞ്ഞെടുപ്പ് കമ്മിഷന്റെ അംഗീകാരം ലഭിച്ചു. നടൻ വിജയ് തന്നെയാണ് വിവരം പങ്കുവച്ചത്. ഇനി തിരഞ്ഞെടുപ്പ് രാഷ്ട്രീയത്തിലേക്ക് ഇറങ്ങുകയാണെന്നും വിജയ് കൂട്ടിച്ചേർത്തു. ഫെബ്രുവരി രണ്ടിനാണ് പാർട്ടി അംഗീകാരത്തിന് വേണ്ടി അപേക്ഷ സമർപ്പിച്ചത്. കേന്ദ്ര തിരഞ്ഞെടുപ്പ് കമ്മിഷന് മുമ്പാകെയാണ് അപേക്ഷിച്ചത്. തുടർന്ന് നടത്തിയ നിയമപരമായ പരിശോധനകൾക്ക് ശേഷം കേന്ദ്ര തിരഞ്ഞെടുപ്പ് കമ്മിഷൻ അംഗീകാരം നൽകിയെന്ന് വിജയ് പ്രതികരിച്ചു.

ആദ്യവാതിൽ തുറന്നെന്നും ഇനി വിവിധ മേഖലകളിൽ വിജയം കൈവരിക്കാനാകുമെന്നും വ്യക്തമാക്കി. പാർട്ടിയുടെ ആദ്യ സമ്മേളനം ഉടൻ പ്രഖ്യാപിച്ചേക്കുമെന്നാണ് സൂചന. രണ്ടാഴ്ച മുമ്പാണ് പാർട്ടിയുടെ ഔദ്യോഗിക പതാക പുറത്തിറക്കിയത്. ഇത് ഏറെ വിവാദങ്ങൾക്ക് തിരികൊളുത്തിയിരുന്നു. മുകളിലും താഴെയും കുങ്കുമ നിറവും മധ്യത്തിൽ മഞ്ഞ നിറവുമാണ് കൊടിയുടേത്, മധ്യത്തിൽ ഇരു വശങ്ങളിലുമായി രണ്ട് ആനകളും ഉണ്ട്.

ജനാധിപത്യം, മതേതരത്വം, സാമൂഹ്യനീതി എന്നിവയിൽ ഉറച്ചനിൽകുമെന്ന് പറഞ്ഞ വിജയ് ഇന്ത്യൻ ഭരണഘടനയിൽ വിശ്വാസമുണ്ടെന്നും കൂട്ടിച്ചേർത്തു. പാർട്ടി രൂപീകരിച്ച ശേഷമുള്ള ആദ്യ രാഷ്ട്രീയ ചടങ്ങിലാണ് പതാക പുറത്തിറക്കിയത്.

2026-ലെ തമിഴ്‌നാട്‌ നിയമസഭാ തിരഞ്ഞെടുപ്പ് ലക്ഷ്യമിട്ടുള്ള നീക്കമാണ് വിജയ് നടത്തുന്നതെന്നാണ് നിലവിലുള്ള അഭ്യൂഹങ്ങൾ. ഈ വർഷം ഫെബ്രുവരിയിലാണ് വിജയ് തമിഴക വെട്രി കഴകമെന്ന പാർട്ടി പ്രഖ്യാപിച്ചത്. തന്റെ സിനിമ യാത്ര നിർത്തുകയാണെന്നും 2026ൽ നടക്കാനിരിക്കുന്ന തമിഴ്നാട് നിയമസഭ തെരഞ്ഞെടുപ്പാണ് ലക്ഷ്യമെന്നും പ്രസ്താവനയിലൂടെ താരം അന്ന് അറിയിച്ചിരുന്നു.

പാർട്ടി പ്രഖ്യാപിച്ചത് മുതൽ വിജയും, വിജയ് ആരാധക സംഘടനയായ വിജയ് മക്കൾ ഇയക്കവും സാമൂഹിക പ്രവർത്തനങ്ങളിൽ സജീവമാണ്. ഇതിന്റെ ഭാഗമായി തമിഴക വെട്രി കഴകം, മികച്ച പ്രകടനം കാഴ്ചവെച്ച 10, 12 ക്ലാസുകളിലെ വിദ്യാർത്ഥികൾക്ക് അവാർഡ് നൽകിയിരുന്നു.