Sitaram Yechury Death: സിപിഎം ജനറൽ സെക്രട്ടറി സീതാറാം യെച്ചൂരി അന്തരിച്ചു

സീതറാം യെച്ചൂരി (Image Courtesy : PTI)

ന്യൂഡൽഹി:  സിപിഎം ജനറൽ സെക്രട്ടറി സീതാറാം യെച്ചൂരി ( 72) അന്തരിച്ചു. ഡൽഹി എയിംസിൽ ഒരു മാസത്തിലേറെയായി ശ്വാസകോശ സംബന്ധമായ അസുഖത്തെ തുടർന്ന് ചികിത്സയിലായിരുന്നു അദ്ദേഹം. 1974-ൽ എസ്എഫ്ഐ അംഗമായി പാർട്ടി പ്രവർത്തനം ആരംഭിച്ച യെച്ചൂരി മൂന്ന് തവണ ജെഎൻയു സ്റ്റുഡൻസ് യൂണിയൻ പ്രസിഡൻ്റായിരുന്നു. 1986-ൽ എസ്എഫ്ഐ ഒാൾ ഇന്ത്യ പ്രസിഡൻ്റും ആയിരുന്നു.

2005 മുതൽ 2015 വരെ തുടർച്ചയായി മൂന്ന് തവണ അദ്ദേഹം സിപിഎം ജനറൽ സെക്രട്ടറിയായിരുന്നു.  2018 ൽ വീണ്ടും ആ സ്ഥാനത്തേക്ക് വീണ്ടും തിരഞ്ഞെടുക്കപ്പെട്ടു.  2005 മുതൽ 2017 വരെ രാജ്യസഭാംഗമായും യെച്ചൂരി സേവനമനുഷ്ഠിച്ചിട്ടുണ്ട്. 2021-ൽ, യെച്ചൂരിയുടെ മകൻ ആശിഷ് യെച്ചൂരി 34-ആം വയസ്സിൽ കോവിഡ് -19 ൻ്റെ രണ്ടാം തരംഗത്തിനിടെ മരിച്ചു.

തെലുങ്ക് ബ്രാഹ്മണ ദമ്പതികളായിരുന്ന സർവ്വേശ്വര സോമയാജുല യെച്ചൂരിയുടെയും കൽപ്പാക്കത്തിന്റെയും മകനായി മദ്രാസിൽ ജനിച്ച അദ്ദേഹം പ്രാഥമിക വിദ്യാഭ്യാസത്തിനു ശേഷം ഡൽഹി സെന്റ്‌ സ്റ്റീഫൻസ് കോളേജിൽ നിന്നും ബിരുദവും. 1975-ൽ ജവഹർലാൽ നെഹ്‌റു സർവ്വകലാശാലയിൽ നിന്നും സാമ്പത്തിക ശാസ്ത്രത്തിൽ ബിരുദാനന്തര ബിരുദം നേടി.  1992 മുതൽ അദ്ദേഹം സിപിഎം പോളിറ്റ് ബ്യൂറോ അംഗമാണ്.