Seema Haider: ‘ഞാന്‍ ഇന്ത്യയുടെ മരുമകളാണ്, എന്നെ ഇവിടെ ജീവിക്കാൻ അനുവദിക്കണം’;സീമാ ഹൈദര്‍

Seema Haider

ന്യൂഡൽഹി: പബ്ജി ​ഗെയിമിലൂടെ പരിചയപ്പെട്ട് പ്രണയത്തിലായ യുവാവുമായി ജീവിക്കാൻ ഇന്ത്യയിലെത്തി പാക്കിസ്ഥാൻ യുവതി സീമ ഹൈദരിനെ ആരും മറന്ന് കാണില്ല. ഉത്തർപ്രദേശിൽ തന്റെ ഭർത്താവിനും കുട്ടികൾക്കുമൊപ്പം കഴിയുകയാണ് സീമ. സ്വന്തമായി യൂട്യൂബ് ചാനൽ നടത്തി സന്തോഷ ജീവിതം നയിക്കുന്ന സീമ ഹൈദർ വീണ്ടും വാർത്തകളിൽ ഇടം പിടിച്ചിരിക്കുകയാണ്. പഹൽഗാം ഭീകരാക്രമണത്തിന്റെ പശ്ചാത്തലത്തിൽ പാക്കിസ്ഥാൻ പൗരന്മാരെല്ലാം ഇന്ത്യ വിടണമെന്ന നിർദ്ദേശം എത്തിയതോടെയാണ് സീമ വീണ്ടും ചർച്ചയാകുന്നത്. എന്തു ചെയ്യുമെന്നറിയാതെ ആശങ്കയിലായ യുവതി ഇന്ത്യയിൽ ജീവിക്കാൻ അനുവദിക്കണമെന്ന് അഭ്യർഥിക്കുകയാണ്.

സോഷ്യൽ മീഡിയയിൽ പങ്കുവച്ച വീഡിയോയിലൂടെയാണ് സീമ ഹൈദറിന്റെ അഭ്യർഥന. താൻ ഇപ്പോൾ ഇന്ത്യയുടെ മരുമകളാണെന്നും ഇവിടെ ജീവിക്കാൻ അനുവദിക്കണമെന്നും അഭ്യർത്ഥിച്ച് കൊണ്ടാണ് വീഡിയോ പങ്കുവച്ചിരിക്കുന്നത്. പ്രധാനമന്ത്രി നരേന്ദ്ര മോദിയോടും യുപി മുഖ്യമന്ത്രി യോഗി ആദിത്യ നാഥിനോടും അഭ്യർഥിക്കുകയാണെന്നും സീമ സമൂഹമാധ്യമത്തിൽ പങ്കുവച്ച വിഡിയോയിൽ പറയുന്നു. താന്‍ പാക്കിസ്ഥാന്റെ മകളാണ്. എന്നാല്‍ ഇപ്പോള്‍ ഇന്ത്യയുടെ മരുമകളാണ്. ഞാനിപ്പോള്‍ ഇന്ത്യയിലെ അഭയാര്‍ഥിയാണെന്ന് പ്രധാനമന്ത്രി മോദിജിയെയും യുപി മുഖ്യമന്ത്രി യോഗിജിയെയും അറിയിക്കാന്‍ ആഗ്രഹിക്കുന്നുവെന്നാണ് സീമ വിഡിയോയിൽ പറയുന്നത്.

Also Read:‘പബ്ജി പ്രണയ നായിക’ സീമ ഹൈദറിനെ ഓര്‍മയില്ലേ? ഇപ്പോള്‍ യൂട്യൂബ് താരം, മാസം ഒരുലക്ഷം രൂപവരെ വരുമാനം

രണ്ട് വർഷം മുൻപാണ് യുപി സ്വദേശിയായ സച്ചിൻ മീണയെ അന്വേഷിച്ച് സീമ ഇന്ത്യയിൽ എത്തിയത്. നേപ്പാൾ വഴി ഇന്ത്യയിലെത്തിയ സീമ പാക്കിസ്ഥാനിലെ കറാച്ചി സ്വദേശിയാണ്. പബ്ജി വഴിയാണ് ഇരുവരും പ്രണയത്തിലായത്. എന്നാൽ സീമ നേരത്തെ വിവാഹിതയായിരുന്നു. ഈ ബന്ധത്തിൽ യുവതിക്ക് നാലു കുട്ടികളുണ്ട്. കുട്ടികളെയും കൂട്ടിയാണ് യുവതി ഇന്ത്യയിലെത്തിയത്. സച്ചിൻ–സീമ ദമ്പതികൾക്ക് ഒരു കുഞ്ഞുമുണ്ട്.