La Niña In India: തണുപ്പ് ഇത്തവണ നേരത്തെയോ… ശൈത്യം കടുക്കുമോ … ലാ നിനയെപ്പറ്റി അറിയേണ്ടതെല്ലാം
India Faces Colder Winter: 2010–11 കാലഘട്ടത്തിലുണ്ടായ ലാ നിനയാണ് ഇതുവരെയുണ്ടായതിൽ വച്ച് ഏറ്റവും ശക്തം.
Weather La Nina
കൊച്ചി: ഡൽഹിയിലും ദേശീയ തലസ്ഥാന മേഖലയിലും ഒക്ടോബറിൽ തന്നെ തണുപ്പ് അനുഭവപ്പെട്ടു തുടങ്ങിയതായി റിപ്പോർട്ട്. ഇതിനിടെ, ജമ്മു കശ്മീരിലെ ഭദ്രവാഹ്, ഗുൽദണ്ഡ, ചറ്റർഗല്ല പാസ്, ആശാപതി ഹിമാനി തുടങ്ങിയ പ്രദേശങ്ങളിൽ ഈ സീസണിലെ ആദ്യ മഞ്ഞുവീഴ്ചയും ആരംഭിച്ചു. കനത്ത മഞ്ഞുവീഴ്ചയെത്തുടർന്ന് കശ്മീരിലെ പ്രധാന ഹൈവേകളെല്ലാം അടച്ചിട്ടിരിക്കുകയാണ്. ഈ വർഷം രാജ്യത്ത് അതിശക്തമായ തണുപ്പുകാലത്തിന് സാധ്യതയുണ്ടെന്ന് ഇന്ത്യൻ കാലാവസ്ഥാ വകുപ്പ് മുന്നറിയിപ്പ് നൽകുന്നു. ഇതിന് കാരണം ശാന്തസമുദ്ര മേഖലയിൽ ലാ നിന (La Niña) പ്രതിഭാസം രൂപപ്പെടുന്നതാണ് എന്നാണ് വിവരം.
‘ലാ നിന’ സാധ്യതയും ശൈത്യകാലവും
ഇത്തവണ ഇന്ത്യയിൽ കടുപ്പമേറിയ തണുപ്പുകാലത്തിന് സാധ്യതയുണ്ടെന്നാണ് കാലാവസ്ഥാ പ്രവചനം.
ഒക്ടോബർ 9-ന് പുറത്തിറക്കിയ ബുള്ളറ്റിനിൽ, ഇന്ത്യൻ കാലാവസ്ഥാ വകുപ്പ് ഉഷ്ണമേഖലാ പസഫിക് മേഖലയിൽ നിലവിൽ നിഷ്പക്ഷമായ എൽ നിനോ-തെക്കൻ ഓസിലേഷൻ സാഹചര്യങ്ങളാണ് നിലനിൽക്കുന്നതെന്ന് അറിയിച്ചു.
എന്നാൽ, മൺസൂൺ മിഷൻ ക്ലൈമറ്റ് ഫോർകാസ്റ്റ് സിസ്റ്റം ഉൾപ്പെടെയുള്ള കാലാവസ്ഥാ മോഡലുകൾ പ്രകാരം, പോസ്റ്റ്-മൺസൂൺ സീസണിൽ ‘ലാ നിന’ സാഹചര്യങ്ങൾ വികസിക്കാനുള്ള സാധ്യത കൂടുതലാണ്.
ഒക്ടോബർ മുതൽ ഡിസംബർ 2025 കാലയളവിൽ ‘ലാ നിന’ രൂപപ്പെടാനുള്ള സാധ്യത 50 ശതമാനത്തിലധികം ഉണ്ടെന്നും ഇത് ഇന്ത്യയിൽ കൂടുതൽ തണുപ്പുള്ള ശൈത്യകാലത്തിന് കാരണമായേക്കുമെന്നും ഒരു IMD ഉദ്യോഗസ്ഥൻ സൂചിപ്പിച്ചു.
എന്താണ് ‘ലാ നിന’?
‘ലാ നിന’ എന്നത് എൽ നിനോ-തെക്കൻ ഓസിലേഷൻ എന്ന കാലാവസ്ഥാ പ്രതിഭാസത്തിൻ്റെ ഒരു ഘട്ടമാണ്. സ്പാനിഷ് ഭാഷയിൽ ‘ചെറിയ പെൺകുട്ടി’ എന്നാണ് ‘ലാ നിന’ എന്ന വാക്കിൻ്റെ അർത്ഥം. ഇത് എൽ നിനോയുടെ നേർ വിപരീതമായകാലാവസ്ഥാ പ്രതിഭാസമായി കണക്കാക്കപ്പെടുന്നു. ഏകദേശം രണ്ടുമുതൽ ഏഴുവർഷം വരെയുള്ള ഇടവേളകളിൽ ക്രമരഹിതമായാണ് ഇത് സംഭവിക്കുന്നത്.
അലാസ്കയുടെയും ഉത്തര അമേരിക്കയുടെയും പടിഞ്ഞാറൻ തീരങ്ങളിൽ കനത്ത മഴയ്ക്കും മഞ്ഞുവീഴ്ചയ്ക്കും കാരണമാകുന്നതുകൂടാതെ അറ്റ്ലാന്റിക് സമുദ്രത്തിലെ ചുഴലിക്കൊടുങ്കാറ്റുകൾക്ക് തീവ്രത കൂട്ടുന്നതും ലാ നിനയുടെ പ്രവർത്തനങ്ങളാണ്. 2010–11 കാലഘട്ടത്തിലുണ്ടായ ലാ നിനയാണ് ഇതുവരെയുണ്ടായതിൽ വച്ച് ഏറ്റവും ശക്തം.
കശ്മീരിൽ മഞ്ഞുവീഴ്ച, ഹൈവേകൾ അടച്ചു
ജമ്മു കശ്മീരിലെ ഭദ്രവാഹിൽ ഒക്ടോബർ 7-ന് കനത്ത മഞ്ഞുവീഴ്ചയാണ് അനുഭവപ്പെട്ടത്. ഇതോടെ ഡൽഹിയിൽ നിന്നും ഹരിയാനയിൽ നിന്നും നിരവധി വിനോദസഞ്ചാരികളാണ് ഭദ്രവാഹിലെ ഗുൽദണ്ഡ പുൽമേട്ടിലേക്ക് ഒഴുകിയെത്തിയത്. എന്നാൽ, മഞ്ഞുവീഴ്ചയും മോശം കാലാവസ്ഥയെത്തുടർന്നുണ്ടായ മണ്ണിടിച്ചിലുകളും കാരണം ശ്രീനഗർ-ജമ്മു, ശ്രീനഗർ-ലേ, മുഗൾ റോഡ് ഉൾപ്പെടെയുള്ള പ്രധാന ഹൈവേകൾ ഗതാഗതത്തിനായി അടച്ചിട്ടിരിക്കുകയാണ്.
