Ranveer Allahbadia: റൺവീർ അല്ലാഹ്‌ബാദിയയെ കറുത്ത ചായം പൂശി കഴുതപ്പുറത്ത് രാജ്യം ചുറ്റിക്കണം; മുഖേഷ് ഖന്ന

മുഖേഷ് ഖന്ന, രൺവീർ അല്ലാഹ്‌ബാദിയ

ന്യൂഡൽഹി: അശ്ലീല പരാമർശത്തിൻ്റെ പേരിൽ കടുത്ത വിമർശനങ്ങൾ ഉയരുന്നതിനിടെ യൂട്യൂബർ രൺവീർ അല്ലാഹ്‌ബാദിയയ്ക്കെതിരെ ആഞ്ഞടിച്ച് നടൻ മുകേഷ് ഖന്ന. ശക്തിമാൻ, മഹാഭാരത് തുടങ്ങിയ ടെലിവിഷൻ സീരിയലുകളിലൂടെ പ്രശസ്തനായ നടനാണ് മുകേഷ് ഖന്ന. ചെയ്തിരിക്കുന്നത് ​ഗുരുതരമായ കുറ്റമാണെന്നും അതിനെ നിസാരമായി കണക്കാക്കാൻ കഴിയില്ലെന്നുമാണ് മുകേഷ് ഖന്ന പറഞ്ഞിരിക്കുന്നത്.

യൂട്യൂബ് ഷോ ആയ ‘ഇന്ത്യാസ് ഗോട്ട് ലേറ്റന്റി’ലെ അശ്ലീല പരാമർശമാണ് യൂട്യൂബർ രൺവീർ അല്ലാഹ്‌ബാദിയയെ ഇപ്പോൾ വിവാദത്തിലാഴ്ത്തിയിരിക്കുന്നത്. ഷോയ്ക്കിടെ ഒരു മത്സരാർഥിയോട് മാതാപിതാക്കളുടെ ലൈംഗിക ബന്ധത്തെ പരാമർശിച്ച് രൺവീർ ചോദിച്ച ചോദ്യമാണ് വിവാദത്തിന് തുടക്കം കുറിച്ചത്. തുടർന്ന് വ്യക്തിപരമായും സമൂഹ മാധ്യമങ്ങളിലൂടെയും വലിയ വിമർശനങ്ങളും വിവാദങ്ങളുമാണ് രൺവീറിനെതിരെ ഉയരുന്നത്.

” അയാൾ ചെയ്തിരിക്കുന്നത് ഗുരുതരമായ കുറ്റകൃത്യമാണ്. സംഭവത്തെ നിസ്സാരമായി കാണാൻ കഴിയില്ല. ഈ വിഷയത്തിൽ എന്തു ചെയ്യണമെന്ന് ഒരാൾ എന്നോട് ചോദിച്ചു. അവനെ പിടിച്ച് അടിക്കണമെന്നാണ് ഞാൻ പറഞ്ഞത്. എന്നിട്ട് മുഖത്ത് കറുത്ത ചായം പൂശി കഴുതപ്പുറത്ത് ഇരുത്തി രാജ്യം ചുറ്റിക്കണം. ആവിഷ്‌കാര സ്വാതന്ത്ര്യത്തിന്റെ പേരിൽ ഇന്നത്തെ തലമുറയിലെ യുവാക്കൾക്ക് സ്വാതന്ത്ര്യം നൽകിയതാണ് പ്രശ്‌നം,” മുഖേഷ് ഖന്ന പറഞ്ഞു.

”എന്തിനും ഒരു പരിധി വേണം, അത് ആവിഷ്‌കാര സ്വാതന്ത്ര്യത്തിനായാൽ പോലും. ഞാൻ ആ വീഡിയോ കണ്ടിരുന്നു. അയാൾ ഒരു അശ്ലീല പ്രസ്താവനയാണ് നടത്തിയത്. ചുറ്റുമുണ്ടായിരുന്ന എല്ലാവരും ചിരിച്ചു. ആരും അയാളെ എതിർക്കാൻ നിന്നില്ല. എനിക്ക് ശക്തിമൻ്റെ കഴിവുണ്ടായിരുന്നുവെങ്കിൽ അവനെ വലിച്ചിഴച്ച് മുകളിലേക്കെറിയുമായിരുന്നു,” മുകേഷ് ഖന്ന കൂട്ടിച്ചേർത്തു.

ഷോയിൽ അശ്ലീലം പ്രോത്സാഹിപ്പിക്കുകയും ലൈംഗികത പ്രകടമാക്കുന്നതും അശ്ലീലവുമായ ചർച്ചകളിൽ ഏർപ്പെടുകയും ചെയ്തതിന് രൺവീറിനെതിരെ പോലീസ് കേസെടുത്തിട്ടുണ്ട്. ‘ഇന്ത്യാസ് ഗോട്ട് ലേറ്റന്റ്’ എന്ന ഷോയ്ക്കിടയിൽ നടത്തിയ അശ്ലീല വിവാദ പരാമർശത്തിന് ശേഷം രൺവീർ അല്ഹാബാദിയയ്ക്ക് 8000 ഫോളോവേഴ്‌സിനെയാണ് യൂട്യൂബിൽ നിന്ന് നഷ്ടപ്പട്ടത്. നിരവധി പേരാണ് ഇവരുടെ പരാമർശത്തെ എതിർത്തുകൊണ്ട് രം​ഗത്തെത്തിയിരിക്കുന്നത്.