Sikkim Tunnel Collapse : സിക്കീമിലെ തുരങ്കം തകർന്നുള്ള അപകടത്തിൽ മരണം 20 ആയി, കാണാതായവരിൽ കോട്ടയം സ്വദേശിയും

Sikkim Tunnel Collapse

ഗാങ്ടോക്: സിക്കീമിൽ നിർമ്മാണത്തിലിരുന്ന തുരങ്കം തകർന്നുള്ള അപകടത്തിൽ മരണസംഖ്യ 20 ആയി ഉയർന്നു. തെക്കൻ സിക്കീമിലെ സമർഡൂങ്ങിൽ ടീസ്റ്റ ജലവൈദ്യുത പദ്ധതിക്ക് വേണ്ടി നാഷണൽ ഹൈഡ്രോ പവർ കോർപ്പറേഷൻ (എൻഎച്ച്പിസി) നിർമ്മിക്കുന്ന തുരങ്കമാണ് തിങ്കളാഴ്ച ഉച്ചയോടെ തകർന്നത്. ദാരുണമായ അപകടത്തിൽ മലയാളി ഉൾപ്പെടെ 5 പേരെ കാണാതായിട്ടുണ്ട്. കോട്ടയം പാമ്പാടി കൂരോത്തുപറമ്പിൽ അനീഷ് മോഹനൻ ആണ് ( 44) കാണാതായ മലയാളി. എൻഎച്ച്പിസി സിക്കിം യൂണിറ്റിന്റെ മാനേജർ ആണ് അനീഷ്.

അപകടത്തിൽപ്പെട്ട് തുരങ്കത്തിൽ കുടുങ്ങിക്കിടക്കുന്നവരെ പുറത്തെത്തിക്കാൻ രക്ഷാപ്രവർത്തനം ഊർജ്ജിതമായി തുടരുകയാണ്. അപകട സമയത്ത് 27 പേരാണ് തുരങ്കത്തിൽ ഉണ്ടായിരുന്നത്. ഇതിൽ രണ്ടുപേർ അത്ഭുതകരമായി രക്ഷപ്പെട്ടു. ഇതിനകം കണ്ടെത്തിയ 20 മൃതദേഹങ്ങളിൽ 13 പേരെ തിരിച്ചറിഞ്ഞിട്ടുണ്ട്. മരണപ്പെട്ടവരിൽ 9 പേർ ജൽപെഗുരി ജില്ലയിൽ നിന്നുള്ളവരാണ്, രണ്ട് പേർ അലിപുർധാർ സ്വദേശികളും. അപകടത്തിൽ നിന്ന് രക്ഷപ്പെട്ടവരിൽ ഒരാൾ പഞ്ചാബ് സ്വദേശിയും മറ്റേയാൾ സിക്കിം സ്വദേശിയുമാണ്.

Also Read: യാത്രാസമയം പകുതിയാകും! മെട്രോ ഫേസ് 2 ടണൽ പണികൾ അടുത്ത ഘട്ടത്തിലേക്ക്

അപകടത്തിൽ സിക്കിം മുഖ്യമന്ത്രി പ്രേം സിംഗ് തമാങ് ദുഃഖം രേഖപ്പെടുത്തുകയും ദുരന്തത്തിൽ മരിച്ചവരുടെ കുടുംബങ്ങൾക്ക് എല്ലാവിധ സഹായങ്ങളും ഉറപ്പാക്കുമെന്നും അറിയിച്ചു. മരിച്ചവരുടെ കുടുംബങ്ങൾക്ക് സഹായമായി നാല് ലക്ഷം രൂപ വീതവും പരിക്കേറ്റവർക്ക് 50,000 രൂപയും നേരത്തെ പ്രഖ്യാപിച്ചിരുന്നു. കൂടുതൽ സഹായം ആവശ്യമെങ്കിൽ ദേശീയ ദുരന്ത പ്രതികരണ ഫണ്ടിൽനിന്ന് ഉറപ്പാക്കും എന്നും അദ്ദേഹം പറഞ്ഞു. സർക്കാർ കൃത്യമായി ഏകോപനം തുടരുകയാണെന്നും അപകടത്തിൽപ്പെട്ടവരുടെ കുടുംബത്തിന് പരമാവധി സഹായം ഉറപ്പാക്കുകയാണ് ലക്ഷ്യമെന്നും മുഖ്യമന്ത്രി പറഞ്ഞു. ഇന്നലെ ചേർന്ന സിക്കിം നിയമസഭ ദുരന്തത്തിൽ ജീവൻ നഷ്ടപ്പെട്ടവർക്ക് അനുശോചനം രേഖപ്പെടുത്തുന്നതിന്റെ ഭാഗമായി രണ്ട് മിനിറ്റ് മൗനം ആചരിച്ചു.

ടീസ്റ്റ ജലവൈദ്യുത പദ്ധതിക്ക് വേണ്ടി നിർമ്മിക്കുന്ന തുരങ്കമാണ് നിർമ്മാണം പുരോഗമിക്കവെ തകർന്നത്. അണക്കെട്ടിൽ നിന്ന് വൈദ്യുതോല്പാദനത്തിനായി മലകൾ തുരന്ന് നിർമ്മിക്കുന്ന വലിയ ടണൽ പദ്ധതിയാണിത്. പാറ തുരക്കുന്നതിനിടെ സംഭവിച്ച മീഥൈൻ വാതക ചോർച്ച മൂലം ഉണ്ടായ സ്ഫോടനമാണ് അപകടകാരണമെന്ന് കരുതപ്പെടുന്നു. ഖനി അപകടങ്ങളിൽ രക്ഷാപ്രവർത്തനം നടത്തി പരിചയമുള്ള ബംഗാളിൽ നിന്നുള്ള വിദഗ്ധരുടെ സംഘവും കുടുങ്ങിക്കിടക്കുന്ന വരെ പുറത്തെത്തിക്കാൻ പുരോഗമിക്കുന്ന ദൗത്യത്തിൽ പങ്കു ചേർന്നിട്ടുണ്ട്. അപകട കാരണം പഠിക്കാൻ സിക്കിം സർക്കാർ വിദഗ്ധ സമിതിയെ നിയോഗിച്ചു.

English Summary

The death toll has risen to 20 following the collapse of a tunnel under construction in Sikkim. The tunnel, being built by the National Hydro Power Corporation (NHPC) for the Teesta Hydroelectric Project at Samardung in South Sikkim, collapsed on Monday afternoon. Five people, including a Keralite, are missing following the tragic accident. The missing Keralite is Aneesh Mohanan (44) from Koorothuparambil, Pampady, Kottayam.