Telangana HC: രാത്രി 11ന് ശേഷം തിയേറ്ററിൽ കുട്ടികൾ പാടില്ല; ഉത്തരവുമായി തെലങ്കാന ഹൈക്കോടതി, കാരണം പുഷ്പ 2?
Restricts Entry For Children In Theatres: രാവിലെ 11 മണിക്ക് മുൻപും രാത്രി 11 മണിക്കുശേഷവും 16 വയസിൽ താഴെയുള്ള കുട്ടികളെ സിനിമാ തിയേറ്ററുകളിൽ പ്രവേശിക്കരുതെന്നാണ് ഉത്തരവ്. കോടതിയുടെ ഉത്തരവ് പാലിക്കുന്നുണ്ടെന്ന് ഉറപ്പുവരുത്തണമെന്ന് സംസ്ഥാന സർക്കാരിനും തിയേറ്റർ ഉടമകൾക്കും നിർദ്ദേശം നൽകിയിട്ടുണ്ട്.
Telangana HC
നിർണായക ഉത്തരവുമായി തെലങ്കാന ഹൈക്കോടതി. ഇനി മുതൽ രാത്രി 11ന് ശേഷവും രാവിലെ 11ന് മുമ്പും കുട്ടികൾക്ക് തിയേറ്ററുകളിൽ പ്രവേശനം അനുവദിക്കില്ല. 16 വയസ്സിൽ താഴെയുള്ള കുട്ടികളെയാണ് ഉത്തരവ് ബാധിക്കുന്നത്. അല്ലു അർജുൻ നായകനായ പുഷ്പ 2 ദി റൂൾ എന്ന ചിത്രത്തിൻ്റെ റിലീസിനിടെയുണ്ടായ അപകടവുമായി ബന്ധപ്പെട്ട സംഭവവും ഉത്തരവ് പുറപ്പെടുവിക്കുമ്പോൾ ജസ്റ്റിസ് വിജയ്സെൻ റെഡ്ഡി ചൂണ്ടികാട്ടി.
രാവിലെ 11 മണിക്ക് മുൻപും രാത്രി 11 മണിക്കുശേഷവും 16 വയസിൽ താഴെയുള്ള കുട്ടികളെ സിനിമാ തിയേറ്ററുകളിൽ പ്രവേശിക്കരുതെന്നാണ് ഉത്തരവ്. കോടതിയുടെ ഉത്തരവ് പാലിക്കുന്നുണ്ടെന്ന് ഉറപ്പുവരുത്തണമെന്ന് സംസ്ഥാന സർക്കാരിനും തിയേറ്റർ ഉടമകൾക്കും നിർദ്ദേശം നൽകിയിട്ടുണ്ട്. തിയേറ്ററിലെ ടിക്കറ്റ് നിരക്കിലുണ്ടായ വർദ്ധനവ്, സിനിമകൾക്ക് പ്രത്യേക പ്രദർശനം അനുവദിക്കൽ, പുഷ്പ 2: ദി റൂൾ, ഗെയിം ചേഞ്ചറി എന്നീ ചിത്രങ്ങളുടെ പ്രദർശനം തുടങ്ങിയവയുമായി ബന്ധപ്പെട്ട ഹർജി പരിഗണിക്കവെയാണ് കോടതിയുടെ സുപ്രധാന ഉത്തരവ്.
“1970 ലെ എപി സിനിമ (റെഗുലേഷൻസ്) റൂൾസ്, സിനിമാട്ടോഗ്രാഫ് എക്സിബിഷനുള്ള ഫോം ബി ലൈസൻസിലെ കണ്ടീഷൻ 12(43) പ്രകാരവും രാവിലെ 8:40 ന് മുമ്പോ പുലർച്ചെ 1:30 ന് ശേഷമോ ഒരു സിനിമയും പ്രദർശിപ്പിക്കാൻ അനുവദിക്കുന്നില്ല. കൂടാതെ ഈ അതിരാവലെയോ രാത്രി വൈകിയോ കുട്ടികളെ തിയേറ്ററിൽ കയറ്റുന്നതിനും വിലക്കേർപ്പേടുത്തുന്നതായി ജസ്റ്റിസ് പറഞ്ഞു.
ആഭ്യന്തര വകുപ്പ് പ്രിൻസിപ്പൽ സെക്രട്ടറിയോട് ഇതുമായി ബന്ധപ്പെട്ട അധികാരികളോട് കൂടിയാലോചിച്ച് ആവശ്യമായ നടപടി സ്വീകരിക്കാനും കോടതി നിർദ്ദേശിച്ചു. നിർദ്ദേശങ്ങൾ നൽകിയ ശേഷം ഫെബ്രുവരി 22 ലേക്ക് കേസ് പരിഗണിക്കുന്നത് ഹൈക്കോടതി മാറ്റി. പുലർച്ചെ ഒരു മണി മുതൽ രാവിലെ എട്ട് മണി വരെ ഷോകൾ അനുവദിക്കേണ്ടതില്ലെന്ന് സംസ്ഥാന സർക്കാർ നേരത്തെ തീരുമാനിച്ചിരുന്നു.
