Special Train Services: ബെംഗളൂരു മലയാളികൾക്ക് നാട്ടിലെത്താം ഈസിയായി; മൂന്ന് പ്രതിവാര സ്പെഷ്യൽ ട്രെയിനുകൾ നീട്ടി
Pooja Diwali Holidays Special Train 2025: ബെംഗളൂരുവിലെ മലയാളികൾക്ക് സുഗമമായി നാട്ടിലെത്താൻ സാധിക്കുന്ന വിധത്തിൽ ട്രെയിനുകൾ അനുവദിച്ചിരിക്കുന്നത്. ബെംഗളൂരുവിൽ നിന്ന് തിരുവനന്തപുരത്തേക്ക് അനുവദിച്ച മൂന്ന് പ്രതിവാര സ്പെഷ്യൽ തീവണ്ടികൾ ഡിസംബർ വരെ നീട്ടിയതായി ദക്ഷിണ-പശ്ചിമ റെയിൽവേ അറിയിച്ചു.
ബെംഗളൂരു: വരാനിരിക്കുന്ന പൂജ ദീപാവലി അവധി കണക്കിലെടുത്ത്, നാട്ടിലെത്താൻ ആഗ്രഹിക്കുന്ന ബെംഗളൂരു മലയാളികൾക്ക് റെയിൽവേയുടെ സമ്മാനം. അവധി ദിവസം നാട്ടിലാഘോഷിക്കാൻ പറ്റുന്ന തരത്തിൽ ട്രെയിൻ സർവീസുകൾ നീട്ടി റെയിൽവേ. വരും മാസങ്ങളിൽ പൂജ അവധി മുതൽ ക്രിസ്തുമസ് അവധി വരെയുള്ളതിനാൽ ട്രെയിനുകളിൽ തിരക്ക് വർദ്ധിക്കാനുള്ള സാധ്യത മുന്നിൽകണ്ടാണ് ഈ നീക്കം.
ഈ ഘട്ടത്തിൽ ബെംഗളൂരുവിലെ മലയാളികൾക്ക് സുഗമമായി നാട്ടിലെത്താൻ സാധിക്കുന്ന വിധത്തിൽ ട്രെയിനുകൾ അനുവദിച്ചിരിക്കുകയാണ് ഇന്ത്യൻ റെയിൽവേ. ബെംഗളൂരുവിൽ നിന്ന് നാട്ടിലേക്ക് പോകാനും തിരിച്ചുവരാനുള്ള ട്രെയിനുകളിലാണ് മാറ്റം വരുത്തിയിരിക്കുന്നത്. ബെംഗളൂരുവിൽ നിന്ന് തിരുവനന്തപുരത്തേക്ക് അനുവദിച്ച മൂന്ന് പ്രതിവാര സ്പെഷ്യൽ തീവണ്ടികൾ ഡിസംബർ വരെ നീട്ടിയതായി ദക്ഷിണ-പശ്ചിമ റെയിൽവേ അറിയിച്ചു.
Also Read: നവരാത്രി അവധി വരുന്നു; സ്പെഷ്യൽ സർവീസുകൾ പ്രഖ്യാപിച്ച് കെഎസ്ആർടിസി
ഏതെല്ലാം ട്രെയിനുകളാണ് നീട്ടിയത്?
എസ്എംവിടി ബെംഗളൂരു-തിരുവനന്തപുരം നോർത്ത് വീക്കിലി എക്സ്പ്രസ് (0655) ആണ് ഡിസംബർ വരെ നീട്ടിയ ഒരു ട്രെയിൻ. ഒക്ടോബർ മൂന്ന് വരെയായിരുന്നു നേരത്തേ അനുവദിച്ചിരുന്നത്. ഇത് ഡിസംബർ 26 വരെ നീട്ടിയതായി റെയിൽവേ അറിയിച്ചു. തിരിച്ച് തിരുവനന്തപുരം നോർത്ത്-എസ്എംവിടി ബെംഗളൂരു വീക്കിലി എക്സ്പ്രസ് സ്പെഷ്യൽ ഡിസംബർ 28 വരെയും നീട്ടിയിട്ടുണ്ട്. സെപ്റ്റംബർ 28 വരെയായിരുന്നു ഇത് നേരത്തേ അനുവദിച്ചിരുന്നത്.
എസ്എംവിടി ബെംഗളൂരു-തിരുവനന്തപുരം നോർത്ത് വീക്കിലി എക്സ്പ്രസ് (06523) ആണ് മറ്റൊരെണ്ണം. സെപ്റ്റംബർ 15 വരെ അനുവദിച്ചിരുന്ന ട്രെയിൻ സർവീസ് ഡിസംബർ 29 വരെയാണ് ഇപ്പോൾ നീട്ടിയിരിക്കുന്നത്. തിരിച്ച് തിരുവനന്തപുരം നോർത്ത്-എസ്എംവിടി ബെംഗളൂരു വീക്കിലി എക്സ്പ്രസ് (06524) ഡിസംബർ 30 വരെയും നീട്ടി.
സെപ്റ്റംബർ മൂന്നു വരെ അനുവദിച്ച എസ്എംവിടി ബെംഗളൂരു-തിരുവനന്തപുരം നോർത്ത് വീക്കിലി എക്സ്പ്രസ് സ്പെഷ്യൽ (06547) ഡിസംബർ 24 വരെ ദീർഘിപ്പിച്ചു. തിരിച്ചുള്ള തിരുവനന്തപുരം നോർത്ത്-എസ്എംവിടി ബെംഗളൂരു വീക്കിലി എക്സ്പ്രസ് സ്പെഷ്യൽ (06548) സെപ്റ്റംബർ നാലു വരെണ് അനുവദിച്ചിരുന്നത്. ഇത് ഡിസംബർ 25 വരെയാക്കിയതായി റെയിൽവേ അറിയിച്ചിട്ടുണ്ട്. വണ്ടികളുടെ സമയ ക്രമവും സ്റ്റോപ്പുകളും ബോഗികളുടെ ക്രമവുമെല്ലാം നിലവിലുള്ളതു പോലെ തുടരും.
