Onam 2025 : ഓണം വൈബ് ഇങ്ങെത്തി; സംസ്ഥാനതല ഓണാഘോഷ പരിപാടികൾ ഈ ദിവസങ്ങളിൽ
State onam celebration 2025: തിരുവനന്തപുരം കവടിയാർ മുതൽ മണക്കാട് വരെയുള്ള പ്രദേശം ഉത്സവ മേഖലയായി പ്രഖ്യാപിക്കും. വൈദ്യുത ദീപാലങ്കാരം ഏറ്റവും മികച്ച രീതിയിൽ ഒരുക്കാനും തീരുമാനിച്ചു.
തിരുവനന്തപുരം: ഇക്കൊല്ലത്തെ സംസ്ഥാനതല ഓണാഘോഷ പരിപാടികൾ സെപ്റ്റംബർ 3 മുതൽ 9 വരെ വിപുലമായി സംഘടിപ്പിക്കാൻ തീരുമാനിച്ചു. മുഖ്യമന്ത്രി പിണറായി വിജയന്റെ അധ്യക്ഷതയിൽ ചേർന്ന ഉന്നതതല യോഗത്തിലാണ് ഓണാഘോഷ നടത്തിപ്പുമായി ബന്ധപ്പെട്ട സുപ്രധാന തീരുമാനങ്ങൾ കൈക്കൊണ്ടത്. സെപ്റ്റംബർ 9-ന് വർണാഭമായ ഘോഷയാത്രയോടെ തിരുവനന്തപുരത്ത് ആഘോഷങ്ങൾക്ക് സമാപനമാകും. ജില്ലാതലത്തിൽ ഡിടിപിസിയുടെ നേതൃത്വത്തിലും ഓണാഘോഷ പരിപാടികൾ സംഘടിപ്പിക്കും.
ഓണാഘോഷം കൂടുതൽ ആകർഷകവും വിപുലവുമാക്കാൻ വിവിധ സർക്കാർ വകുപ്പുകൾ ഏകോപിതമായി പ്രവർത്തിക്കണമെന്ന് മുഖ്യമന്ത്രി നിർദ്ദേശം നൽകി. തിരുവനന്തപുരം കവടിയാർ മുതൽ മണക്കാട് വരെയുള്ള പ്രദേശം ഉത്സവ മേഖലയായി പ്രഖ്യാപിക്കും. വൈദ്യുത ദീപാലങ്കാരം ഏറ്റവും മികച്ച രീതിയിൽ ഒരുക്കാനും തീരുമാനിച്ചു. ഹരിത ചട്ടം പൂർണ്ണമായി പാലിച്ച്, ഹരിത ഓണം എന്ന ആശയത്തിലായിരിക്കും ഇത്തവണത്തെ ആഘോഷ പരിപാടികൾ.
കുടുംബശ്രീയുടെ നേതൃത്വത്തിൽ ജില്ലാ, സിഡിഎസ്, എ.ഡി.എസ് തലങ്ങളിൽ ഓണം മേളകൾ സംഘടിപ്പിക്കും. കുടുംബശ്രീ യൂണിറ്റുകൾ നടത്തിയ പച്ചക്കറി, പൂ കൃഷികളുടെ വിളവെടുപ്പ് ഓണത്തിന് മുമ്പായി പൂർത്തിയാക്കും. ഓണത്തിന് ആവശ്യമായ എല്ലാ വിഭവങ്ങളും അടങ്ങുന്ന കിറ്റുകൾ നേരിട്ടും ഓൺലൈനായും ലഭ്യമാക്കാൻ സർക്കാർ പദ്ധതിയിടുന്നുണ്ട്. സപ്ലൈകോ ഓണച്ചന്തകൾ ജില്ലാ, താലൂക്ക്, മണ്ഡലം കേന്ദ്രങ്ങളിൽ തുറന്നു പ്രവർത്തിക്കും.
സാംസ്കാരിക മേഖലയിലെ സ്ഥാപനങ്ങൾ വഴി വിവിധ കൾച്ചറൽ പ്രോഗ്രാമുകൾ സംഘടിപ്പിക്കുന്നതിനും, ഫിഷറീസ് വകുപ്പ് വള്ളങ്ങൾ ഉൾപ്പെടുത്തി ആളുകളെ ആകർഷിക്കുന്ന പരിപാടികൾ നടത്തുന്ന കാര്യവും പരിഗണനയിലുണ്ട്. കൺസ്യൂമർഫെഡ് വഴിയും പ്രാഥമിക സഹകരണ സംഘങ്ങൾ വഴിയും പച്ചക്കറികളും നിത്യോപയോഗ സാധനങ്ങളും വിതരണം ചെയ്യുന്നത് ഇതിനകം ആരംഭിച്ചിട്ടുണ്ട്. കൂടുതൽ പ്രാഥമിക സംഘങ്ങൾ പച്ചക്കറി കൃഷി ചെയ്ത് ഓണം വിപണിയിലേക്ക് എത്തിക്കാൻ ശ്രമിക്കുന്നുണ്ട്. ഹോർട്ടി കോർപ്പിന്റെ പച്ചക്കറി ചന്തകളും കൃഷി വകുപ്പിന്റെ മറ്റ് സംവിധാനങ്ങളും സജീവമാക്കി കൂടുതൽ ഉത്പന്നങ്ങൾ വിപണിയിലെത്തിക്കാനും ലക്ഷ്യമിടുന്നു.
