International Yoga Day 2025: ‘ഏക ലോകത്തിനും ആരോഗ്യത്തിനും യോഗ’; ഇന്ന് അന്താരാഷ്‌ട്ര യോ​ഗ ദിനം

International Yoga Day 2025

എല്ലാ വർഷവും ജൂൺ 21-ന് അന്താരാഷ്ട്ര യോ​ഗ ദിനമായി ആചരിക്കുന്നു. 11-ാമത് അന്താരാഷ്ട്ര യോ​ഗ ദിനമാണ് ഈ വർഷം ആചരിക്കുന്നത്. ‘ഏക ലോകത്തിനും ആരോഗ്യത്തിനും യോഗ’ എന്ന ആശയമാണ് ഈ വര്‍ഷം യോഗ ദിനം മുന്നോട്ട് വെക്കുന്നത്. ഇന്നത്തെ ഈ ദിവസം വിവിധ പരിപാടികളാണ് രാജ്യവ്യാപകമായി സര്‍ക്കാര്‍ സംഘടിപ്പിക്കുന്നത്. വിശാഖപട്ടണത്തിൽ പ്രധാനമന്ത്രിയുടെ നേതൃത്വത്തിൽ 3 ലക്ഷത്തിലധികം ആളുകൾ പങ്കെടുക്കുന്ന യോഗാ സംഗമ പരിപാടി നടക്കും.

മനസ്സ്, ശരീരം, പ്രകൃതി എന്നിവയെ ഒരുമിപ്പിക്കാൻ ശ്രമിക്കുന്ന യോഗാഭ്യാസത്തിന്റെ ഗുണഗണങ്ങൾ ജനങ്ങളിലേക്കെത്തിക്കുകയാണ് ഈ ദിനം കൊണ്ട് ലക്ഷ്യം വെക്കുന്നത്. 2014 സെപ്റ്റംബർ 27 ന് ഐക്യരാഷ്ട്രസഭയുടെ 69-ാമത് പൊതുസഭയുടെ ഉദ്ഘാടന പ്രസംഗത്തിൽ പ്രധാനമന്ത്രി നരേന്ദ്ര മോദിയാണ് അന്താരാഷ്ട്ര യോഗ ദിനം എന്ന ആശയം മുന്നോട്ടുവച്ചത്.

യോ​​ഗയുടെ പ്രാധാന്യത്തെ കുറിച്ചും അതിന്റെ ആരോ​ഗ്യ ​ഗുണങ്ങളെ കുറിച്ചും ലോകമെമ്പാടുമുള്ള ജനങ്ങളെ ബോധവൽക്കരിക്കുക എന്നതാണ് ഈ ദിനം കൊണ്ട് ഉദ്ദേശിക്കുന്നത്. ഓരോരുത്തരുടെയും ദിനചര്യയിൽ യോ​ഗ ഉൾപ്പെടുത്താൻ ഇന്നത്തെ ദിവസം പ്രോത്സാഹിപ്പിക്കും. നടുവേദന, ഹൃദയ സംബന്ധമായ പ്രശ്നങ്ങൾ എന്നിവയുൾപ്പെടെയുള്ള വിവിധ ശാരീരിക രോഗങ്ങൾ തടയാനും നിയന്ത്രിക്കാനും യോ​ഗയ്‌ക്ക് സാധിക്കും. യോഗ ആസനങ്ങൾ ചെയ്യുന്നത് മൊത്തത്തിലുള്ള ക്ഷേമത്തിന് ഗുണം ചെയ്യും.

Also Read: അന്താരാഷ്ട്ര യോഗ ദിനം; വിശാഖപട്ടണത്ത് 3 ലക്ഷം പേരുടെ മഹാസംഗമം, പ്രധാനമന്ത്രി നേതൃത്വം നൽകും

ശാരീരിക ക്ഷേമത്തിനു പുറമെ മാനസിക ആരോ​ഗ്യത്തിനും യോ​ഗ ഉത്തമമാണ്. വിഷാദവും ഉത്കണ്ഠയും ഉൾപ്പെടെയുള്ള ആരോഗ്യപ്രശ്നങ്ങൾ ഇതിലൂടെ പരിഹരിക്കാം. രോഗപ്രതിരോധ സംവിധാനം കൂടുതൽ ശക്തമാക്കാൻ യോ​ഗ സഹായിക്കുമെന്ന് പഠനങ്ങൾ വ്യക്തമാക്കുന്നു. വിഷാദരോഗം, ശ്വസനസംബന്ധമായ രോ​ഗം. ഹൃദ്രോഗം എന്നീവയെ നിയന്ത്രിക്കാൻ യോ​ഗ സഹായിക്കുമെന്ന് പഠനങ്ങൾ വ്യക്തമാക്കുന്നു.