Chicken Price Hike: പിടിവിട്ട് കോഴി ഇറച്ചി; വില 300നടുത്ത്
Chicken Price Hike in Kerala: ക്രിസ്മസ്, പുതുവത്സരം, ഈസ്റ്റർ മുതലായ സമയങ്ങളിൽ വില ഉയരുന്നത് പതിവാണെങ്കിലും ആദ്യമായാണ് ഇത്രയും കൂടിയത്. അതേസമയം, പക്ഷിപ്പനിയും വില കുറച്ചില്ലാ എന്നതും ശ്രദ്ധേയമാണ്.
പച്ചക്കറി, മുട്ട തുടങ്ങി വിലക്കയറ്റത്തിൽ വലയുന്ന മലയാളികൾക്ക് മറ്റൊരു തിരിച്ചടി കൂടി. സംസ്ഥാനത്ത് പിടിവിട്ട് കോഴിയിറച്ചി വില ഉയരുന്നു. കോഴിക്കോട് ബ്രോയിലര്‍ കോഴി ഇറച്ചി കിലോയ്ക്ക് 290 രൂപ വരെ എത്തിയിട്ടുണ്ട്. രണ്ടാഴ്ച മുമ്പ് വില കിലോയക്ക് ഇരുനൂറ് രൂപയായിരുന്നു.
വരുംദിവസങ്ങളിലും വില ഉയരാനാണ് സാധ്യതയെന്ന് വ്യാപാരികൾ ചൂണ്ടിക്കാട്ടുന്നു. സ്പ്രിങിന് കിലോയ്ക്ക് 340 രൂപായായി കൂടിയിട്ടുണ്ട്, ലഗോൺ കോഴി ഇറച്ചിക്ക് 230 രൂപയാണ് വില. ക്രിസ്മസ്, പുതുവത്സരം, ഈസ്റ്റർ മുതലായ സമയങ്ങളിൽ വില ഉയരുന്നത് പതിവാണെങ്കിലും ആദ്യമായാണ് ഇത്രയും കൂടിയത്.
ന്യൂ ഇയറിന് ശേഷവും വന്‍കിട ഫാമുടമകള്‍ കൃത്രിമ ക്ഷാമം സൃഷ്ടിച്ച് വില വര്‍ദ്ധിപ്പിക്കുകയാണെന്നാണ് വ്യാപാരികളുടെ ആരോപണം. കോഴിയുടെ ദൗർലഭ്യം ചൂണ്ടിക്കാട്ടിയാണ് വില ഉയരുന്നത്. അതേസമയം, പക്ഷിപ്പനിയും വില കുറച്ചില്ലാ എന്നതും ശ്രദ്ധേയമാണ്.
ആലപ്പുഴയിൽ ചില പഞ്ചായത്തുകളിൽ കോഴിയിറച്ചി വിൽപനയ്ക്ക് നിരോധനം ഉണ്ടായിരുന്നു. ഇത്തരത്തിൽ പക്ഷിപ്പനിയുമായി ബന്ധപ്പെട്ട ചില നിയന്ത്രണങ്ങള്‍ ഉണ്ടായിരുന്നെങ്കിലും പുതുവല്‍സര ദിനത്തില്‍ കോഴിയിറച്ചി വില്‍പനയില്‍ വലിയ കുതിച്ചു ചാട്ടമുണ്ടായെന്നാണ് കണക്കുകൾ.
വിലക്കയറ്റം തുടര്‍ന്നാല്‍ വലിയ പ്രതിസന്ധിയാണ് നേരിടുകയെന്ന് ഉപഭോക്താക്കള്‍ പറയുന്നു. സിവില്‍ സപ്ലൈസ് വിഭാഗം കര്‍ശനമായ ഇടപെടല്‍ നടത്തിയില്ലെങ്കില്‍ കട അടപ്പ് സമരത്തിലേക്ക് പോകുമെന്ന് കോഴിക്കോട് ജില്ലയിലെ ചിക്കന്‍ വ്യാപാരി വ്യവസായി സമിതി അറിയിച്ചിട്ടുണ്ട്. (Image Credit: Getty Images)
