UAE Grand Tour: യു.എ,ഇയുടെ സകല സൗന്ദര്യവും അടുത്തറിയാൻ ഇതിലും മികച്ചൊരു യാത്ര വേറെയില്ല!
From Beaches to Mountains: Discover the Whole UAE: യു.എ.ഇയിലെ ഏഴ് എമിറേറ്റുകളിലൂടെയും സുഗമമായി യാത്ര ചെയ്യാൻ അവസരമൊരുക്കുന്ന 'യു.എ.ഇ ഗ്രാൻഡ് ടൂർ’ എന്ന പുതിയ വിനോദസഞ്ചാര പദ്ധതി ആരംഭിച്ചത് നിങ്ങൾ അറിഞ്ഞിരുന്നോ? ഒറ്റ നഗരത്തിലെ കാഴ്ചകളിൽ മാത്രം ഒതുങ്ങിനിൽക്കാതെ യു.എ.ഇയെ പരസ്പരം ബന്ധിപ്പിക്കപ്പെട്ട ഒരൊറ്റ വിനോദസഞ്ചാര കേന്ദ്രമായി മാറ്റുകയാണ് ഈ പദ്ധതിയുടെ പ്രധാന ലക്ഷ്യം.
മരുഭൂമിയിലെ മികച്ച സാഹസിക വിനോദങ്ങൾ, പർവ്വതങ്ങളിലൂടെയുള്ള യാത്രകൾ, പൈതൃക കേന്ദ്രങ്ങൾ, സാംസ്കാരിക ഇടങ്ങൾ എന്നിവയെല്ലാം ഉൾക്കൊള്ളുന്നതാണ് പുതിയ പദ്ധതി. അബുദാബിയുടെ പൈതൃകവും വാസ്തുവിദ്യയും, ദുബായിയുടെ ആധുനികതയും, ഷാർജയുടെ സംസ്കാരവും, റാസൽഖൈമയുടെ പർവ്വതനിരകളും, ഫുജൈറയുടെ മനോഹരമായ തീരപ്രദേശങ്ങളുമെല്ലാം വിനോദസഞ്ചാരികൾക്ക് ഈ ഒരൊറ്റ യാത്രയിലൂടെ നേരിട്ട് കണ്ട് പൂർണ്ണമായി ആസ്വദിക്കാൻ സാധിക്കും. (Image Credit source: Getty Images)
ഏഴ് വ്യത്യസ്ത എമിറേറ്റുകളെയും കോർത്തിണക്കി നിലവിൽ പ്രധാനമായും ഏഴ് വ്യത്യസ്ത യാത്രാ പാക്കേജുകളാണ് ഗ്രാൻഡ് ടൂർ വാഗ്ദാനം ചെയ്യുന്നത്. ഇതിലെ ഗ്രാൻഡ് ക്ലാസിക്, ഗ്രാൻഡ് അഡ്വഞ്ചർ എന്നീ രണ്ട് പാക്കേജുകൾ പതിനൊന്ന് പകലും പത്ത് രാത്രിയും നീളുന്നതാണ്. ദുബായ്, ഷാർജ, അജ്മാൻ, ഫുജൈറ, റാസൽഖൈമ, അബുദാബി, അൽ ഐൻ എന്നിവയെല്ലാം ഇതിൽ ഉൾപ്പെടുന്നു.
പ്രകൃതി സംരക്ഷണത്തിന് മുൻഗണന നൽകിക്കൊണ്ട് ഒരുക്കിയിട്ടുള്ള ഗ്രാൻഡ് ഇക്കോ ഫ്രണ്ട്ലി പാക്കേജാണ് മറ്റൊരു പ്രധാനപ്പെട്ട ആകർഷണം. ഈ യാത്രയിലൂടെ ദുബായ്, ജുബൈൽ കണ്ടൽക്കാടുകൾ, അൽ സോറ റിസർവ്, കൽബ ഇക്കോ സാങ്ച്വറി, അൽ മർമൂം, സർ ബാനി യാസ് ഐലൻഡ് തുടങ്ങിയ അതിമനോഹരമായ പ്രകൃതിദത്ത കേന്ദ്രങ്ങൾ സഞ്ചാരികൾക്ക് സന്ദർശിക്കാനും പ്രകൃതിയോട് ചേർന്ന് നിൽക്കാനും സാധിക്കും.
ആരോഗ്യത്തിനും വിശ്രമത്തിനും പ്രത്യേക പ്രാധാന്യം നൽകുന്ന ഗ്രാൻഡ് വെൽനെസ് ടൂർ ആണ് സഞ്ചാരികൾക്കുള്ള മറ്റൊരു ഓപ്ഷൻ. ഇതിന് പുറമെ കുട്ടികൾക്കും മുതിർന്നവർക്കും അടക്കം കുടുംബസമേതം ആസ്വദിക്കാൻ കഴിയുന്ന ഗ്രാൻഡ് ഫാമിലി ടൂറും ലഭ്യമാണ്. ഈ രണ്ട് മികച്ച പാക്കേജുകളും വിനോദസഞ്ചാരികൾക്കായി പതിനൊന്ന് പകലും പത്ത് രാത്രിയും നീണ്ടുനിൽക്കുന്ന വലിയ യാത്രാ അനുഭവമാണ് നൽകുന്നത്.
രാജ്യത്തിൻ്റെ ചരിത്രമറിയാൻ എട്ട് പകലും ഏഴ് രാത്രിയും ഉൾക്കൊള്ളുന്ന ഗ്രാൻഡ് കൾച്ചർ ആൻഡ് ഹെറിറ്റേജ് ടൂറും ലഭ്യമാണ്. എന്നാൽ ഈ പദ്ധതിയിലെ ഏറ്റവും ദൈർഘ്യമേറിയ പാക്കേജ് പന്ത്രണ്ട് പകലും പതിനൊന്ന് രാത്രിയുമുള്ള ഗ്രാൻഡ് ബീച്ച് ടൂറാണ്. ഓരോ വിനോദസഞ്ചാരിയുടെയും അഭിരുചിക്കനുസരിച്ച് തിരഞ്ഞെടുക്കാവുന്ന രീതിയിലാണ് ഈ പാക്കേജുകളെല്ലാം രൂപകൽപ്പന ചെയ്തിരിക്കുന്നത്.
