T20 World Cup 2026: ‘നോക്കട്ടെ, ഇവന്മാർക്ക് ധൈര്യമുണ്ടോ എന്ന്’; പിസിബിയുടെ ബഹിഷ്കരണ ഭീഷണിയിൽ പ്രതികരിച്ച് ഹർഭജൻ സിംഗ്
Harbhajan Singh Against PCB: പാകിസ്താൻ ക്രിക്കറ്റ് ബോർഡിനെതിരെ ഹർഭജൻ സിംഗ്. ശരിക്കും കളി ബഹിഷ്കരിക്കാൻ ഇവർക്ക് ധൈര്യമുണ്ടോ എന്ന് നോക്കട്ടെ എന്ന് ഹർഭജൻ പറഞ്ഞു.
ഇന്ത്യക്കെതിരായ ടി20 ലോകകപ്പ് മത്സരം ബഹിഷ്കരിക്കുമെന്ന പാകിസ്താൻ ക്രിക്കറ്റ് ബോർഡിൻ്റെ ഭീഷണിയിൽ പ്രതികരിച്ച് ഇന്ത്യയുടെ മുൻ താരവും കമൻ്റേറ്ററുമായ ഹർഭജൻ സിംഗ്. കളി ബഹിഷ്കരിക്കാൻ ഇവർക്ക് ധൈര്യമുണ്ടോ എന്ന് നോക്കട്ടെ എന്ന് ഹർഭജൻ പറഞ്ഞു. (Image Credits- PTI)
തൻ്റെ യൂട്യൂബ് ചാനലിലൂടെയാണ് ഹർഭജൻ്റെ പ്രതികരണം. "നിങ്ങൾക്ക് ഇതിൽ നിന്ന് എന്ത് ലാഭമാണ് ലഭിക്കുന്നത്. ഇത് വെറുതേ ധാർഷ്ട്യം കാണിക്കാനാണ്. നമുക്ക് നോക്കാം, ഇവർക്ക് ശരിക്കും ധൈര്യമുണ്ടോ എന്ന്. തങ്ങൾ ബംഗ്ലാദേശിനൊപ്പമാണെന്ന് മറ്റുള്ളവരെ തെറ്റിദ്ധരിപ്പിക്കുകയാണ്."
"അതിലൊന്നും പ്രശ്നമില്ല. പക്ഷേ, ഇന്ത്യ - പാകിസ്താൻ മത്സരം നടക്കണമെന്നാഗ്രഹിക്കുന്ന നിങ്ങളുടെ രാജ്യത്തുള്ള ജനങ്ങളെപ്പറ്റി ആലോചിച്ചോ? കളി നടക്കേണ്ടിയിരുന്നത് ഒരു നിക്ഷ്പക്ഷ വേദിയിലായിരുന്നു. യുദ്ധത്തിൻ്റെ സമയത്ത് നിങ്ങൾ ഏഷ്യാ കപ്പ് മത്സരം കളിച്ചതാണ്."
"നിങ്ങൾ അത്ര വലിയ രാജ്യസ്നേഹികളാണെങ്കിൽ ഏഷ്യാ കപ്പിൻ്റെ സമയത്ത് അതെവിടെപ്പോയി? നിങ്ങൾക്ക് സ്വന്തം രാജ്യത്തിനായി യാതൊരു വികാരങ്ങളുമില്ല. പക്ഷേ, മറ്റൊരു രാജ്യത്തിനൊപ്പം നിൽക്കുന്നു എന്നാണോ? ഐസിസിയുടെ തീരുമാനത്തിനായി കാത്തിരിക്കൂ."- താരം തുടർന്നു.
ഈ മാസം ഏഴിനാണ് ടി20 ലോകകപ്പ് ആരംഭിക്കുക. ഇന്ത്യക്കൊപ്പം ഗ്രൂപ്പ് എയിലായിരുന്നു പാകിസ്താൻ. യുഎസ്എ, നമീബിയ, നെതർലൻഡ്സ് എന്നീ ടീമുകളും ഗ്രൂപ്പ് എയിലുണ്ട്. ഫെബ്രുവരി 15ന് ശ്രീലങ്കയിലെ കൊളംബോയിൽ വച്ചാണ് ഇന്ത്യ - പാകിസ്താൻ മത്സരം തീരുമാനിച്ചിരുന്നത്.
