Virat Kohli: ബിസിസിഐ ആവശ്യപ്പെട്ടിട്ടും രക്ഷയില്ല; ടെസ്റ്റ് വിരമിക്കലിൽ ഉറച്ച് കോലി: റിപ്പോർട്ട്
Virat Kohli Is Firm On His Test Retirement: ബിസിസിഐ ആവശ്യപ്പെട്ടിട്ടും വിരാട് കോലിയുടെ ടെസ്റ്റ് വിരമിക്കൽ തീരുമാനത്തിന് മാറ്റമില്ലെന്ന് റിപ്പോർട്ട്. ഇംഗ്ലണ്ടിനെതിരായ ടെസ്റ്റ് പരമ്പരയിൽ കളിക്കില്ലെന്ന് കോലി നിലപാടെടുത്തു എന്നാണ് റിപ്പോർട്ടുകൾ.
ടെസ്റ്റ് മത്സരങ്ങളിൽ നിന്ന് വിരമിക്കാനുള്ള വിരാട് കോലിയുടെ തീരുമാനത്തിന് മാറ്റമില്ലെന്ന് റിപ്പോർട്ട്. ബിസിസിഐ ആവശ്യപ്പെട്ടിട്ടും കോലി തീരുമാനത്തിൽ നിന്ന് പിന്നോട്ടില്ലെന്നാണ് റിപ്പോർട്ടുകൾ സൂചിപ്പിക്കുന്നത്. രോഹിത് ശർമ്മ ടെസ്റ്റ് വിരമിക്കൽ പ്രഖ്യാപിച്ചതിന് പിന്നാലെയാണ് കോലിയും ടെസ്റ്റ് മത്സരങ്ങളിൽ നിന്ന് വിരമിക്കുന്നു എന്ന സൂചനകൾ പുറത്തുവന്നത്. (Image Credits - PTI)
ടൈംസ് ഓഫ് ഇന്ത്യയുടെ റിപ്പോർട്ട് പ്രകാരം രണ്ടാഴ്ച മുൻപാണ് കോലി ടെസ്റ്റ് മത്സരങ്ങളിൽ നിന്ന് വിരമിക്കുകയാണെന്ന് സെലക്ടർമാരെ അറിയിച്ചത്. ഇംഗ്ലണ്ടിനെതിരായ ടെസ്റ്റ് പരമ്പരയിൽ കളിക്കണമെന്ന് അദ്ദേഹത്തെ തങ്ങൾ നിർബന്ധിച്ചെങ്കിലും വഴങ്ങിയില്ല എന്ന് സെലക്ടർമാർ പറഞ്ഞതായി റിപ്പോർട്ടിൽ പറയുന്നു.
ഓസ്ട്രേലിയക്കെതിരായ ബോർഡർ - ഗവാസ്കർ ട്രോഫിയിൽ കോലി മോശം ഫോമിലായിരുന്നു. എങ്കിലും ഇംഗ്ലണ്ടിനെതിരെ നടക്കാനിരിക്കുന്ന പരമ്പരയിൽ കോലി കളിക്കുമെന്നായിരുന്നു സൂചനകൾ. ഈ കളിയാവും കോലിയുടെ അവസാന ടെസ്റ്റ് പരമ്പരയെന്നും റിപ്പോർട്ടുകളുണ്ടായിരുന്നു.
എന്നാൽ, ടെസ്റ്റ് മത്സരങ്ങളിൽ നിന്ന് ക്യാപ്റ്റൻ രോഹിത് ശർമ്മ വിരമിച്ചതോടെ കോലിയും വിരമിക്കൽ തീരുമാനമെടുക്കുകയായിരുന്നു എന്നാണ് വിവരം. രോഹിതും ഇംഗ്ലണ്ടിനെതിരെ കളിക്കുമെന്നായിരുന്നു വിവരം. വിരമിക്കലിന് രണ്ട് ദിവസം മുൻപ് നൽകിയ ഒരു അഭിമുഖത്തിൽ ഇക്കാര്യം രോഹിത് പറയുകയും ചെയ്തു.
ഇംഗ്ലണ്ടിനെതിരായ പരമ്പരയിൽ ടീമിനെ നന്നായി നയിക്കുമെന്നായിരുന്നു രോഹിത് പറഞ്ഞത്. പിന്നാലെ, ഇംഗ്ലണ്ടിനെതിരെ രോഹിതിന് പകരം പുതിയ ക്യാപ്റ്റനെ തീരുമാനിക്കുമെന്ന് റിപ്പോർട്ടുകൾ വന്നു. തൊട്ടുപിന്നാലെയാണ് രോഹിത് ടെസ്റ്റ് മത്സരങ്ങളിൽ നിന്ന് വിരമിക്കൽ പ്രഖ്യാപിച്ചത്. ഇതിന് പിന്നാലെയായിരുന്നു കോലിയുമായി ബന്ധപ്പെട്ട വാർത്തകൾ.
