Sabarimala Mandala Kalam 2025: നാളെ വൃശ്ചികം ഒന്ന്; മണ്ഡലകാലം തിങ്കളാഴ്ച്ച ആരംഭിക്കും
Sabarimala Mandala Kalam 2025: ഈ വർഷം നവംബർ 16ന് വൈകുന്നേരം തുടങ്ങി തുടങ്ങി ഡിസംബർ 26നാണ് മണ്ഡലകാലം അവസാനിക്കുക. മണ്ഡല മകരവിളക്ക് തീർത്ഥാടനത്തിനായി ഇന്ന് വൈകിട്ട് 5 മണിക്ക് ശബരിമല നട തുറക്കും.
Sabarimala
നാളെ വൃശ്ചികം ഒന്ന്. വ്രതശുദ്ധിയുടെ പുണ്യവുമായി മണ്ഡലകാലം നാളെ ആരംഭിക്കും. വൃശ്ചികം ഒന്നു മുതൽ ധനു 11 വരെ നീണ്ടുനിൽക്കുന്ന 41 ദിവസത്തെ വ്രതാനുഷ്ഠാനമാണ് മണ്ഡലകാലം. ഈ വർഷം നവംബർ 16ന് വൈകുന്നേരം തുടങ്ങി തുടങ്ങി ഡിസംബർ 26നാണ് മണ്ഡലകാലം അവസാനിക്കുക.
മണ്ഡല മകരവിളക്ക് തീർത്ഥാടനത്തിനായി ഇന്ന് വൈകിട്ട് 5 മണിക്ക് ശബരിമല നട തുറക്കും. ഇന്ന് വൈകിട്ട് തന്ത്രി കണ്ഠര് മഹേഷ് മോഹനന്റെ സാന്നിധ്യത്തിൽ നിലവിലുള്ള മേൽശാന്തി അരുൺകുമാർ ആണ് നടതുറക്കുക. ശ്രീകോവിലിൽ ദീപം തെളിയിച്ചതിനു ശേഷം മാളികപ്പുറം ക്ഷേത്രം തുറക്കുന്നതിനായി മേൽശാന്തി വാസുദേവൻ നമ്പൂതിരിക്ക് താക്കോലും ഭസ്മവും നൽകി യാത്രയാക്കും.
ALSO READ: മണ്ഡലകാലത്ത് ചെയ്യേണ്ടതും ചെയ്യാൻ പാടില്ലാത്തതുമായ കാര്യങ്ങൾ
നവംബർ 17ന് വൃശ്ചിക പുലരിയിൽ മണ്ഡലകാല പൂജകൾ ആരംഭിക്കും. ഡിസംബർ 26ന് തങ്ക ചാർത്തി ദീപാരാധനയും കഴിഞ്ഞ് ഡിസംബർ 27ന് മണ്ഡലപൂജയ്ക്ക് ശേഷമാണ് ഇനി ശബരിമല നട അടയ്ക്കുക. ശേഷം ഡിസംബർ 30ന് വൈകിട്ട് 5 മണിക്ക് മകരവിളക്കിനായി നട വീണ്ടും തുറക്കും. ജനുവരി 14നാണ് മകരവിളക്ക്. ശേഷം ജനുവരി 20ന് മണ്ഡലകാലത്തിന് ശേഷം ശബരിമല നട വീണ്ടും അടയ്ക്കും.
അതേസമയം മലകയറുന്ന സ്വാമിമാരുടെ സുരക്ഷ ഉറപ്പാക്കുന്നതിനായി ആരോഗ്യവകുപ്പിലെയും മെഡിക്കൽ കോളേജുകളിലെയും ഡോക്ടർമാരും വിദഗ്ധ സന്നദ്ധ ആരോഗ്യ പ്രവർത്തകരും സജ്ജമാണ്. മലകയറുന്ന സമയത്ത് സ്വാമിമാർക്ക് ഏതെങ്കിലും തരത്തിലുള്ള ബുദ്ധിമുട്ടുകൾ ഉണ്ടാവുകയാണെങ്കിൽ സമീപത്തുള്ള ആരോഗ്യ കേന്ദ്രത്തിൽ ചികിത്സ തേടേണ്ടതാണ്. മലയാളം ഇംഗ്ലീഷ് ഹിന്ദി തമിഴ് തെലുങ്ക് കന്നട തുടങ്ങിയ വിവിധ ഭാഷകളിൽ ഭക്തർക്ക് വേണ്ടി അവബോധവും ഒരുക്കിയിട്ടുണ്ട്. പമ്പ മുതൽ സന്നിധാനം വരെ ദേവസ്വം ബോർഡിന്റെ സഹകരണത്തോടെ എമർജൻസി മെഡിക്കൽ സെന്ററുകളും സജ്ജമാണ്
