നവരാത്രി

ദുർഗാദേവിയെ ഒൻപത് ഭാവങ്ങളിൽ ഒൻപത് രാത്രികളിലും പകലുമായി ആരാധിക്കുന്ന ഉത്സവം കൂടിയാണ് നവരാത്രി. തിന്മയുടെ മേൽ നന്മനേടിയ വിജയം കൂടിയാണ് നവരാത്രിയോർമിപ്പിക്കുന്നത്. ദുർഗ്ഗ, ലക്ഷ്മി, സരസ്വതി ഭാവങ്ങൾക്കൊപ്പം ഒൻപത് ദിവസങ്ങളിലും ഭഗവതിയുടെ ഒൻപത് രൂപങ്ങളെ കൂടിയാണ് ഭജിക്കുന്നത്. അതാത് ദിവസങ്ങളിൽ പൂജകളും ചടങ്ങുകളും വ്യത്യസ്തമാകാറുമുണ്ട്. ഇന്ത്യ മുഴുവൻ നവരാത്രി പ്രധാനപ്പെട്ട ആഘോഷമാണ്. എങ്കിലും കേരളത്തിൽ നവരാത്രി ആഘോഷങ്ങൾക്ക് മഹാനവമിയും, വിജയദശമിയുമാണ് ഏറ്റവും പ്രധാന്യം അന്ന് സരസ്വതീ പൂജയ്ക്കും വിദ്യാരംഭവും നടക്കും. പൂജവെയ്പ്പ് ദിവസം വിദ്യാ ഉപാസകർ തങ്ങളുടെ പുസ്തകങ്ങളും സംഗീതോപകരണങ്ങളും പൂജയ്ക്ക് വെയ്ക്കുമ്പോൾ തൊഴിലാളികളും പണിക്കാരും തങ്ങളുടെ ആയുധങ്ങളും ആയുധ പൂജയ്ക്ക് വെക്കുന്നു. വിജയദശമി ദിനത്തിൽ ഇവയെല്ലാം പൂജിച്ച് തന്നെയാണ് വീണ്ടും ജോലിക്ക് എടുക്കുന്നതും. കേരളത്തിൽ ദേവീ ക്ഷേത്രങ്ങളിലും നവരാത്രി ആഘോഷങ്ങൾക്ക് പ്രധാന്യമുണ്ട്. വിജയദശമി നാളിന് മുന്നെ തന്നെ 10 ദിവസത്തെ ഉത്സവമാണ് കോട്ടയത്ത് പനച്ചിക്കാട് ദശമിയുടെ അന്ന് നിരവധി കുരുന്നുകളാണ് ഇവിടെ വിദ്യാരംഭത്തിനിരിക്കുന്നത്. തിരുവനന്തപുരത്തെ പൂജപ്പുരയിലുള്ള സരസ്വതി മണ്ഡപത്തിലും ഇത് ഉത്സവകാലമാണ്. മാത്രമല്ല തൃശ്ശൂരിൽ തിരുവുള്ളക്കാവിലും, തുഞ്ചൻ പറമ്പിലും, വിവിധ ക്ഷേത്രങ്ങളിലുമെല്ലാം വിദ്യാരംഭ ചടങ്ങുകൾ നടക്കും. ഹരിശ്രീ കുറിച്ച് കുരുന്നുകൾ അന്നേ ദിവസം അക്ഷരങ്ങളുടെ ലോകത്തേക്ക് പിച്ചവെച്ച് തുടങ്ങും.