Israel-Iran Conflict: ഇന്ത്യയില്‍ നിന്ന് മടങ്ങിയ ഇറാന്‍ കപ്പല്‍ യുഎസ് മുക്കി; 87 മരണം
Iranian Warship Attacked in Indian Ocean: അന്താരാഷ്ട്ര ജലാശയത്തില്‍ സുരക്ഷിതമെന്ന് കരുതിയ ഒരു ഇറാനിയന്‍ യുദ്ധക്കപ്പലിനെ അമേരിക്കന്‍ അന്തര്‍വാഹിനി മുക്കി, ടോര്‍പ്പിഡോ ഉപയോഗിച്ചാണ് മുക്കിയതെന്ന് ഹെഗ്‌സെത്ത് മാധ്യമങ്ങളോട് പ്രതികരിച്ചു.
പ്രതീകാത്മക ചിത്രം
ടെഹ്‌റാന്‍: ഇന്ത്യന്‍ മഹാസമുദ്രത്തില്‍ വെച്ച് ഇറാനിയന്‍ യുദ്ധക്കപ്പലിന് നേരെ ആക്രമണം അഴിച്ചുവിട്ട് യുഎസ്. ഇന്ത്യയില്‍ നാവികാഭ്യാസം നടത്തി മടങ്ങുകയായിരുന്ന കപ്പല്‍, യുഎസ് ഇന്ത്യന്‍ മഹാസുദ്രത്തില്‍ മുക്കുകയായിരുന്നു. സംഭവത്തില്‍ ഇതുവരെ 87 പേരുടെ മരണം രേഖപ്പെടുത്തി. ഐറിസ് ദേന എന്ന കപ്പലാണ് ആക്രമണത്തിന് ഇരയായത്. മരണസംഖ്യ ഇനിയും ഉയരുമെന്നാണ് വിവരം.
2024ലും മൗഡ്ജ് ക്ലാസ് ഫ്രിഗേറ്റായ ഐറിസ് ദേന, മിലാന്‍ എന്ന പേരില്‍ നടത്തുന്ന ബഹുമുഖ നാവികാഭ്യാസത്തില്‍ പങ്കെടുക്കാന്‍ ഇന്ത്യയിലെത്തിയിരുന്നു. അതിന്റെ 2026ലെ പതിപ്പാണ് കഴിഞ്ഞ ദിവസം നടന്നത്. ഇറാന്‍ കപ്പലിനെതിരെ നടന്ന ആക്രമണം യുഎസ് പ്രതിരോധ സെക്രട്ടറി പീറ്റ് ഹെഗ്‌സെത്ത് സ്ഥിരീകരിച്ചു. ഇറാനെതിരായി നടക്കുന്ന യുദ്ധത്തിന്റെ ആഗോള വ്യാപ്തിയുടെ തെളിവാണിതെന്നാണ് പ്രതികരണം.
അന്താരാഷ്ട്ര ജലാശയത്തില്‍ സുരക്ഷിതമെന്ന് കരുതിയ ഒരു ഇറാനിയന്‍ യുദ്ധക്കപ്പലിനെ അമേരിക്കന്‍ അന്തര്‍വാഹിനി മുക്കി, ടോര്‍പ്പിഡോ ഉപയോഗിച്ചാണ് മുക്കിയതെന്ന് ഹെഗ്‌സെത്ത് മാധ്യമങ്ങളോട് പ്രതികരിച്ചു.
അതേസമയം, യുഎസ് യുദ്ധക്കപ്പല്‍ ആക്രമിക്കുന്നതിന്റെ ദൃശ്യങ്ങള്‍ പുറത്തുവന്നിട്ടുണ്ട്. അന്തര്‍വാഹിനി പെരിസ്‌കോപ്പ് പോലെ തോന്നിക്കുന്നതും സ്‌ഫോടനം നടക്കുന്നതും കാണിക്കുന്ന ബ്ലാക്ക് ആന്‍ഡ് വൈറ്റ് വീഡിയോ യുഎസ് യുദ്ധവകുപ്പാണ് പുറത്തുവിട്ടത്. ഒരു അന്തര്‍വാഹനി കപ്പല്‍ ആക്രമണം നടത്തുന്നതിന്റെ വീഡിയോ ഇതാദ്യമായാണ് യുദ്ധവകുപ്പ് പുറത്തുവിടുന്നത്. പെരിസ്‌കോപ്പ് ആഴത്തില്‍ പോലും ഇറാനിയന്‍ കപ്പലുകള്‍ക്ക് യുഎസ് അന്തര്‍വാഹിനികളെ കണ്ടെത്താന്‍ സാധിച്ചില്ലെന്ന വിമര്‍ശനവും ഇതോടൊപ്പം ഉയരുന്നുണ്ട്.
അതേസമയം, ഇന്തോ-പസഫിക് മേഖലയിലെ ഏറ്റവും വലിയ ബഹുമുഖ നാവിക അഭ്യാസങ്ങളിലൊന്നാണ് മിലാന്‍ 2026. പ്രവര്‍ത്തനക്ഷമത, സമുദ്ര മേഖല അവബോധം, കൂട്ടായ പ്രവര്‍ത്തനം എന്നിവ ശക്തിപ്പെടുത്തുന്നതിനായി ലോകമെമ്പാടുമുള്ള നാവികസേനകളെ ഒരുമിച്ച് കൊണ്ടുവന്ന് നടത്തുന്ന അഭ്യാസമാണിത്.
