ഇസ്രായേലിന് 2.8 ബില്യണ് ഡോളറിന്റെ ആയുധങ്ങള് കൈമാറാനൊരുങ്ങി യുഎസ്; വമ്പന് നീക്കവുമായി ട്രംപ്
US Moves to Approve 2.8 Billion Dollar Military Package for Israel: ഏകദേശം 40,000 എണ്ണം 2,000 പൗണ്ട് ഭാരമുള്ള ബോംബുകള് ഈ പാക്കേജില് ഉള്പ്പെടുന്നുണ്ടെന്ന് റിപ്പോര്ട്ട് സൂചിപ്പിക്കുന്നു. ഇതില് 20,000 എംകെ-84 ബോംബുകളും 20,000 ബിഎല്യു-117 ബോംബുകളും ഉള്പ്പെടും. കൂടാതെ ഐ-2000 പെനട്രേറ്റര് വാര്ഹെഡുകളും ഇടപാടിന്റെ ഭാഗമായേക്കുമെന്നാണ് വിവരം.
ബെഞ്ചമിന് നെതന്യാഹു, ഡൊണാള്ഡ് ട്രംപ്
വാഷിങ്ടണ്: ഇസ്രയേലിന് 2.8 ബില്യണ് ഡോളറിന്റെ ആയുധങ്ങള് കൈമാറാനുള്ള നീക്കവുമായി യുഎസ്. ഇസ്രായേലുമായി വന് ആയുധ ഇടപാടിന് അമേരിക്കന് ഭരണകൂടം അനുമതി നല്കാന് ഒരുങ്ങുന്നതായി റിപ്പോര്ട്ടുകള് വ്യക്തമാക്കുന്നു. ഇടപാടില് പ്രധാനമായും വന്ശേഷിയുള്ള ബോംബുകളും മറ്റ് യുദ്ധോപകരണങ്ങളും ഉള്പ്പെടുമെന്നാണ് വിവരം. വാഷിങ്ടണ് പോസ്റ്റിനെ ഉദ്ധരിച്ചാണ് റിപ്പോര്ട്ടുകള് പുറത്തുവരുന്നത്. ആയുധ കൈമാറ്റം പലസ്തീനിനും ഇറാനുമെതിരെ യുദ്ധം നടത്താന് ഇസ്രായേലിന് ഊര്ജ്ജം പകര്ന്നേക്കും.
ഏകദേശം 40,000 എണ്ണം 2,000 പൗണ്ട് ഭാരമുള്ള ബോംബുകള് ഈ പാക്കേജില് ഉള്പ്പെടുന്നുണ്ടെന്ന് റിപ്പോര്ട്ട് സൂചിപ്പിക്കുന്നു. ഇതില് 20,000 എംകെ-84 ബോംബുകളും 20,000 ബിഎല്യു-117 ബോംബുകളും ഉള്പ്പെടും. കൂടാതെ ഐ-2000 പെനട്രേറ്റര് വാര്ഹെഡുകളും ഇടപാടിന്റെ ഭാഗമായേക്കുമെന്നാണ് വിവരം.
അമേരിക്കന് സൈനിക ശേഖരത്തിലുള്ള ഏറ്റവും ശക്തമായ പരമ്പരാഗത ആയുധങ്ങളില് ചിലത് കരാറില് ഉള്പ്പെട്ടേക്കാം. ഭൂമിക്കടിയിലുള്ളതും ശക്തമായി സംരക്ഷിക്കപ്പെട്ടതുമായ ലക്ഷ്യങ്ങളെ ആക്രമിക്കാന് ശേഷിയുള്ള ആയുധങ്ങളാണ് ഇവയില് മിക്കതും. അതേസമയം, ജനവാസ മേഖലകളില് ഇത്തരം വന്ശേഷിയുള്ള ബോംബുകളുടെ ഉപയോഗം സംബന്ധിച്ച് വിദഗ്ധര് ആശങ്കകള് ഉന്നയിച്ചിട്ടുമുണ്ട്.
അമേരിക്കന് ഭരണകൂടം ആയുധ വില്പ്പനയ്ക്ക് ആവശ്യമായ നടപടിക്രമങ്ങള് സ്വീകരിച്ച് വരികയാണെന്ന് ഒരു മുതിര്ന്ന ഭരണകൂട ഉദ്യോഗസ്ഥന് എഎഫ്പിയോട് പറഞ്ഞു. എന്നാല് നിലവില് പരിഗണനയിലുള്ള ഇടപാടിനെക്കുറിച്ച് കൂടുതല് വിശദാംശങ്ങള് നല്കാന് ഉദ്യോഗസ്ഥന് തയാറായില്ല. അതേസമയം, ഇടപാടിന് ഔദ്യോഗികമായി അന്തിമ അനുമതി ലഭിച്ചിട്ടുണ്ടോ എന്ന കാര്യവും വ്യക്തമല്ല. വരുംദിവസങ്ങളില് ഇതുമായി ബന്ധപ്പെട്ട കൂടുതല് വിവരങ്ങള് പുറത്തുവന്നേക്കാം.
ന്യൂയോര്ക്ക് ടൈംസ് റിപ്പോര്ട്ട് പ്രകാരം, ഭരണകൂടം ആയുധ വില്പ്പനയ്ക്ക് അനുമതി നല്കിയതായി ഒരു അമേരിക്കന് ഉദ്യോഗസ്ഥന് സ്ഥിരീകരിച്ചിട്ടുണ്ട്. യുഎസ് കോണ്ഗ്രസിലെ ബന്ധപ്പെട്ട സമിതികളുമായി ഇടപാടിന്റെ വിവരങ്ങള് അനൗപചാരികമായി പങ്കുവച്ചതായും റിപ്പോര്ട്ടുകള് സൂചിപ്പിക്കുന്നു. ഗാസയിലെ സംഘര്ഷത്തിന്റെ പശ്ചാത്തലത്തിലാണ് പുതിയ ആയുധ ഇടപാട്.
Also Read: ട്രംപിന്റെ മെയില് ബാലറ്റ് നിയന്ത്രണങ്ങള്ക്ക് തിരിച്ചടി; ആവശ്യം തള്ളി സുപ്രീംകോടതി
ഇസ്രയേല് സൈന്യം അമേരിക്കന് നിര്മിത ആയുധങ്ങള് നേരത്തെയും ഉപയോഗിച്ചിട്ടുണ്ട്. വലിയ ശേഷിയുള്ള ബോംബുകളുടെ ഉപയോഗം ജനസാന്ദ്രമായ മേഖലകളില് സാധാരണ ജനങ്ങള്ക്ക് ഉണ്ടാക്കാവുന്ന അപകടത്തെക്കുറിച്ച് മനുഷ്യാവകാശ സംഘടനകളും വിദഗ്ധരും ആശങ്ക പങ്കുവെക്കുന്നു.
അതേസമയം, ഇസ്രയേലിന്റെ സൈനിക ശേഷി ശക്തിപ്പെടുത്തുന്നതിനുള്ള അമേരിക്കന് പിന്തുണ തുടര്ന്നുകൊണ്ടിരിക്കുന്നതിന്റെ ഭാഗമായാണ് പുതിയ ആയുധ ഇടപാട്. ആയുധശേഖര കൈമാറ്റത്തിന് പണം കണ്ടെത്തുന്നതിനായി അമേരിക്കന് വിദേശ സൈനിക ധനസഹായം ഉപയോഗിക്കപ്പെടുമെന്നാണ് വിവരം. അന്തിമ അനുമതിയും ആയുധങ്ങള് കൈമാറുന്ന സമയക്രമവും സംബന്ധിച്ച കൂടുതല് വിവരങ്ങള് ഔദ്യോഗിക പ്രഖ്യാപനങ്ങള്ക്ക് ശേഷമേ വ്യക്തമാകൂ.
English Summary
The US is reportedly preparing to approve a 2.8 billion dollar arms package for Israel. The proposed deal is expected to include large quantities of heavy bombs and other military equipment amid the ongoing Gaza conflict.
