Gold: ഒരു പവന് 75,376 രൂപ, സ്വർണം വാങ്ങാൻ പുത്തൻ തലമുറ തന്നെ മിടുക്കർ

പ്രതീകാത്മക ചിത്രം

സംസ്ഥാനത്ത് സ്വർണവില പ്രവചനാതീതമായി മുന്നേറുകയാണ്. നീണ്ട നാളത്തെ കുതിപ്പിന് ശേഷം ചെറിയൊരു ബ്രേക്കെടുത്തിരിക്കുകയാണ് പൊന്ന്. നിലവിൽ ഒരു പവൻ സ്വർണത്തിന് 92,120 രൂപയാണ് വില. 97,360 രൂപ വരെ ഉയർന്നയിടത്ത് നിന്നാണ് ഈ പടിയിറക്കം. വരും ​ദിവസങ്ങളിൽ വില ഉയരുമോ കുറയുമോ എന്ന ആകാംക്ഷയിലാണ് സാധാരണക്കാരും ആഭരണപ്രേമികളും.

എന്നാൽ ഈ കുതിപ്പിലും താരമാകുന്നത് മറ്റൊരു കൂട്ടരാണ്. പ്രത്യേകിച്ച് പുതിയ തലമുറയിലെ കുട്ടികൾക്കും പ്രിയം ഇവരെ തന്നെ. 18 കാരറ്റ് സ്വർണമാണ് ഇന്ന് താരം. സ്വർണത്തിന്റെ ശുദ്ധത അളക്കാനുപയോ​ഗിക്കുന്ന സൂചകമാണ് കാരറ്റ്. പൂജ്യം മുതല്‍ 24 വരെയുള്ള സ്‌കെയിലായാണ് കാരറ്റ് അളക്കുന്നത്.

നാം പൊതുവെ ഉപയോ​ഗിക്കുന്ന സ്വർണാഭരണങ്ങൾ 22 കാരറ്റിലുള്ളവയാണ്. പണിക്കൂലിയും ജിഎസ്ടിയും കൂടി ചേരുമ്പോൾ ഒരു പവന് ഒരു ലക്ഷത്തിലധികമാണ് വില. എന്നാൽ 18 കാരറ്റ് സ്വർണത്തിന് ഇന്ന് 75,376 രൂപ മാത്രമാണ് വില. അതായത്, 16,744 രൂപ ലാഭം. ഒരു ​ഗ്രാം 9,422 രൂപ നിരക്കിലാണ് വ്യാപാരം നടക്കുന്നത്.

18 കാരറ്റ് സ്വർണ്ണത്തിൽ 75% ശുദ്ധസ്വർണ്ണവും 25% മറ്റ് ലോഹങ്ങളുമാണ് (കാപ്പർ, സിൽവർ, നിക്കൽ മുതലായവ) അടങ്ങിയിട്ടുള്ളത്. എന്നാൽ ദിവസേന ഉപയോ​ഗിക്കാൻ ഇവ 22 കാരറ്റിനേക്കാൾ നല്ലതാണ്. കണക്കുകൾ പ്രകാരം,  2023-നെ അപേക്ഷിച്ച് 25% വർദ്ധനവാണ് 18 കാരറ്റ് സ്വർണ്ണത്തിൽ ഉണ്ടായിരിക്കുന്നത്.