Jammu Kashmir Election Result 2024 Live : ജമ്മു കശ്മീരിൽ മിന്നും വിജയം നേടി കോൺഗ്രസ് -നാഷണൽ കോൺഫറൻസ്; അടിപതറി ബിജെപി

ജമ്മു കശ്മീർ നിയമസഭാ തിരഞ്ഞെടുപ്പിൽ ഏറെക്കുറെ വിജയമുറപ്പിച്ചുകഴിഞ്ഞതിന് പിന്നാലെ ആഘോഷമാരംഭിച്ച് ഇൻഡ്യാ മുന്നണി. തമിഴ്നാട് ട്രിച്ചിയിലെ കോൺഗ്രസ് പ്രസിഡൻ്റ് എൽ റെക്സ് കശ്മീരി ആപ്പിൾ വിതരണം ചെയ്താണ് വിജയം ആഘോഷിച്ചത്. ശ്രീനഗറിലെ പാർട്ടി ഓഫീസിലും ആഘോഷം ആരംഭിച്ചു.

ജമ്മു കശ്മീർ തിരഞ്ഞെടുപ്പിൽ ബിജെപിയെക്കാൾ ഇരട്ടിലധികം സീറ്റുകളിൽ ലീഡുമായി ഇൻഡ്യ സഖ്യം മുന്നേറുന്നു. ഏറ്റവും പുതിയ റിപ്പോർട്ടുകൾ പ്രകാരം 51 സീറ്റുകളിലാണ് ഇൻഡ്യാ സഖ്യം മുന്നിട്ടുനിൽക്കുന്നത്. 25 സീറ്റുകളിൽ ബിജെപി മുന്നിലാണ്.

ജമ്മു കശ്മീർ തിരഞ്ഞെടുപ്പിൽ ജനവിധി മാനിക്കുന്നു എന്ന് ശ്രിഗുഫ്‌വാര – ബിജ്ബെഹറ നിയോജകമണ്ഡലത്തിലെ പിഡിപി സ്ഥാനാർത്ഥിയും മുൻ മുഖ്യമന്ത്രി മഹെബൂബ മുഫ്തിയുടെ മകളുമായ ഇൽതിജ മുഫ്തി. പാർട്ടി പ്രവർത്തകർക്ക് ഇൽതിജ നന്ദി അറിയിച്ചു.

ജമ്മു കശ്മീർ തിരഞ്ഞെടുപ്പിൽ ബിജെപി നേതാവ് രവീന്ദർ റെയ്നയ്ക്ക് ലീഡ് നഷ്ടം. ആദ്യ ഘട്ടത്തിൽ മുന്നിൽ നിന്ന റെയ്നയെ മറികടന്ന് നാഷണൽ കോൺഫറൻസ് നേതാവ് സുരീന്ദർ കുമാർ ചൗധരി മുന്നിലെത്തി.

ജമ്മു കശ്മീരിൽ കേവല ഭൂരിപക്ഷം കടന്ന് കോൺഗ്രസ്. നിലവിൽ 49 സീറ്റുകളിലാണ് കോൺഗ്രസ് – നാഷണൽ കോൺഫറൻസ് സഖ്യം മുന്നിട്ടുനിൽക്കുന്നത്. 46 സീറ്റാണ് കേവല ഭൂരിപക്ഷത്തിന് വേണ്ടത്. 27 സീറ്റുകളിൽ ബിജെപി മുന്നിലാണ്.

അതേസമയം, തിരഞ്ഞെടുപ്പ് തങ്ങൾ തൂത്തുവാരുമെന്ന് ബിജെപി ദേശീയ വക്താവ് സെയ്ദ് സഫർ ഇസ്ലാം പറഞ്ഞു.

അധികാരം ശാശ്വതമല്ലെന്ന് അവാമി ഇത്തിഹാദ് പാർട്ടി പ്രസിഡൻ്റും എംപിയുമായ ഷെയ്ഖ് അബ്ദുൽ റാഷിദ് അഥവാ എഞ്ചിനീയർ റാഷിദ്. കശ്മീരി ജനതയ്ക്ക് അവരുടെ അവകാശങ്ങൾ നൽകണമെന്നും അദ്ദേഹം എഎൻഐയോട് പ്രതികരിച്ചു.

തിരഞ്ഞെടുപ്പ് കമ്മീഷൻ പുറത്ത് വിടുന്ന റിപ്പോർട്ടുകൾ പ്രകാരം ജമ്മു കശ്മീരിൽ നാഷ്ണൽ കോൺഫറൻസിൻ്റെ നേതൃത്വത്തിൽ ഇൻഡ്യ മുന്നണിക്ക് മുന്നേറ്റം. 50 അധികം സീറ്റിലാണ് ജമ്മു കശ്മീരിൽ ഇൻഡ്യ മുന്നണി മുന്നിട്ട് നിൽക്കുന്നത്. 40 സീറ്റിൽ ഒമർ അബ്ദുള്ളയുടെ നാഷ്ണൽ കോൺഫറൻസും എട്ട് സീറ്റുകളിഷ കോൺഗ്രസും ഒരു സീറ്റിൽ സിപിഐയും ലീഡ് ചെയ്യുന്നത്. ബിജെപി 23 സീറ്റുകളിലാണ് ലീഡ് ചെയ്യുന്നത്. പിഡിപയും ഡെപിസിയും മൂന്ന് വീതം സീറ്റുകളിൽ മുന്നിട്ട് നിൽക്കുന്നത്

ജമ്മു കശ്മീർ നിയമസഭാ തിരഞ്ഞെടുപ്പിൽ പാർലമെൻ്റ് ആക്രമണക്കേസ് പ്രതി അഫ്സൽ ഗുരുവിൻ്റെ സഹോദരൻ ഐജാസ് അഹ്മദ് ഗുരു പിന്നിൽ. സോപോറിൽ നിന്നാണ് ഐസാസ് ഗുരു ജനവിധി തേടുന്നത്. ജമ്മു ആൻഡ് കാശ്മീർ നാഷണൽ കോൺഫറൻസ് നേതാവ് ഇർഷാദ് റസൂൽ കർ ആണ് ഇവിടെ മുന്നിൽ.

നാഷണൽ കോൺഫറൻസ് വൈസ് പ്രസിഡൻ്റ് ഒമർ അബ്ദുള്ള മത്സരിക്കുന്ന രണ്ട് സീറ്റിലും മുന്നിലാണ്. ബഡ്ഗാമിലും ഗന്ദെർബാലിലുമാണ് ഒമർ അബ്ദുള്ള മത്സരിക്കുന്നത്.

രാജ്യമൊട്ടാകെ ഉറ്റുനോക്കുന്ന പുൽവാമ നിയമസഭാ മണ്ഡലത്തിൽ പിഡിപി യൂത്ത് വിങ് പ്രസിഡൻ്റ് വഹീദു റഹ്മാൻ പര മുന്നിൽ. കോൺഗ്രസിൻ്റെ മുതിർന്ന നേതാവ് മുഹമ്മദ് ഖലീൽ ബന്ദിനെ രണ്ടാം സ്ഥാനത്തേക്ക് പിന്തള്ളിയാണ് വഹീദിൻ്റെ മുന്നേറ്റം. കശ്മീരിൽ മൂന്ന് സീറ്റുകളിലാണ് നിലവിൽ പിഡിപി ലീഡ് ചെയ്യുന്നത്.

വിധി എതിരായാൽ ബിജെപി ചെപ്പടിവിദ്യകൾ കാണിക്കരുതെന്ന് ജമ്മു കശ്മീർ നാഷണൽ കോൺഫറൻസ് വൈസ് പ്രസിഡൻ്റും സ്ഥാനാർത്ഥിയുമായ ഒമർ അബ്ദുള്ള. എല്ലാത്തിലും സുതാര്യത ഉണ്ടാവണമെന്നും അദ്ദേഹം എഎൻഐയോട് പ്രതികരിച്ചു.

ജമ്മു കശ്മീർ തിരഞ്ഞെടുപ്പുമായി ബന്ധപ്പെട്ട് സംസ്ഥാനത്ത് ഒരുക്കിയിരിക്കുന്നത് ത്രിതല സുരക്ഷ. സിസിടിവി ക്യാമറകളും സായുധ സേനയുമടക്കം സംസ്ഥാനത്തെ 20 കൗണ്ടിംഗ് സെൻ്ററുകൾ ശക്തമായ സുരക്ഷ ഒരുക്കിയിട്ടുണ്ടെന്ന് പോലീസ് അറിയിച്ചു.

ജമ്മു കശ്മീർ നിയമസഭാ തിരഞ്ഞെടുപ്പിൻ്റെ ആദ്യ ഫലസൂചനകളിൽ കോൺഗ്രസിന് നേരിയ മേൽക്കൈ. കോൺഗ്രസ് 27 സീറ്റിലും ബിജെപി 26 സീറ്റിലും മുന്നിട്ട് നിൽക്കുകയാണ്.

ജമ്മു കശ്മീർ നിയമസഭാ തിരഞ്ഞെടുപ്പിൻ്റെ വോട്ടെണ്ണൽ ആരംഭിച്ചു. പോസ്റ്റൽ വോട്ടുകളാണ് ആദ്യം എണ്ണുക. കനത്ത സുരക്ഷയിലാണ് വോട്ടെണ്ണൽ പുരോഗമിക്കുന്നത്.

ജമ്മു കശ്മീരിൽ പഴുതടച്ച സുരക്ഷയൊരുക്കിയിട്ടുണ്ടെന്ന് രജൗരി സീനിയർ സൂപ്രണ്ട് ഓഫ് പൊലീസ് രൺദീപ് കുമാർ. പോളിംഗ് ബൂത്തിലേക്കുള്ള പ്രവേശനം കൃത്യമായ പരിശോധനകൾക്ക് ശേഷ മാത്രമേ അനുവദിക്കൂ എന്നും അദ്ദേഹം അറിയിച്ചു.

പിഡിപി ഇതുവരെ തങ്ങൾക്ക് പിന്തുണ പ്രഖ്യാപിച്ചിട്ടില്ലെന്ന് ജമ്മു കശ്മീർ നാഷണൽ കോൺഫറൻസ് വൈസ് പ്രസിഡൻ്റ് ഒമർ അബ്ദുള്ള. തൻ്റെ എക്സ് ഹാൻഡിലിലൂടെയാണ് ഒമർ അബ്ദുള്ളയുടെ വെളിപ്പെടുത്തൽ.

ജമ്മു കശ്മീർ തിരഞ്ഞെടുപ്പിൽ പാർട്ടി 30-35 സീറ്റുകളിൽ വിജയിക്കുമെന്ന അവകാശവാദവുമായി ബിജെപി നേതാവും നൗഷേരയിൽ നിന്നുള്ള സ്ഥാനാർത്ഥിയുമായ രവീന്ദർ റെയ്ന.

ജമ്മു കശ്മീരിലെ തിരഞ്ഞെടുപ്പ് ഫലം കോൺഗ്രസിന് അനുകൂലമായിരിക്കുമെന്ന് പാർട്ടി നേതാവ് ഗുലാം അഹ്മദ് മിർ. പിടിഐയോട് പ്രതികരിക്കുകയായിരുന്നു അദ്ദേഹം.

ജമ്മു കശ്മീർ നിയമസഭാ തിരഞ്ഞെടുപ്പിൽ ആര് അധികാരത്തിലേറുമെന്ന് ഇന്നറിയാം. രാവിലെ 8 മണിക്ക് വോട്ടെണ്ണൽ ആരംഭിക്കും. ഇന്ത്യാ മുന്നണി അധികാരത്തിലേറുമെന്നായിരുന്നു എക്സിറ്റ് പോളുകളിലെ കണക്കുകൂട്ടൽ. എന്നാൽ, ഇവിടെ തൂക്ക് മന്ത്രിസഭയ്ക്കുള്ള സാധ്യതയുമുണ്ട്. മൂന്ന് ഘട്ടങ്ങളിലായി 63 ശതമാനം പോളിംഗാണ് ജമ്മു കശ്മീരിൽ രേഖപ്പെടുത്തിയത്. കോൺഗ്രസും നാഷണൽ കോൺഫറൻസും ഒരുമിച്ച് തിരഞ്ഞെടുപ്പിനെ നേരിട്ടപ്പോൾ പിഡിപിയും ബിജെപിയും ഒറ്റക്ക് മത്സരിച്ചു.