Singer Machad Vasanthi: പ്രശസ്ത ഗായിക മച്ചാട്ട് വാസന്തി അന്തരിച്ചു
Singer Machat Vasanthi Passes Away: നമ്മളൊന്ന് എന്ന നാടകത്തിലെ പച്ചപ്പനം തത്തേ എന്ന ഗാനവും ഏറെ ശ്രദ്ധ നേടിയിട്ടുണ്ട്. മണിമാരൻ തന്നത് എന്ന പാട്ടും ഏറെ ശ്രദ്ധിക്കപ്പെട്ടിരുന്നു.
കോഴിക്കോട്: പ്രശസ്ത ഗായിക മച്ചാട്ട് വാസന്തി അന്തരിച്ചു. 81 വയസായിരുന്നു. വാര്ധക്യ സഹജമായ അസുഖങ്ങളെ തുടര്ന്ന് കോഴിക്കോട് മെഡിക്കല് കോളേജിൽ ചികിത്സയിലിരിക്കെയാണ് അന്ത്യം. വർഷങ്ങൾക്ക് മുൻപുണ്ടായ വാഹനാപകത്തിൽ സാരമായി പരിക്കേറ്റ് പൂര്ണ്ണമായും കിടപ്പിലായ വാസന്തി ഏറെ നാളായി ചികിത്സയിലായിരുന്നു. നാടക, സിനിമ ഗാനങ്ങളിലൂടെ മലയാളികളുടെ മനകവര്ന്ന ഗായികയാണ് മച്ചാട്ട് വാസന്തി. ഇതിനുപുറമെ നിരവധി സിനിമകളിലും അഭിനയിച്ചിട്ടുണ്ട്.
ഒന്പതാം വയസിലാണ് മച്ചാട്ട് വാസന്തി സംഗീത ജീവിതം ആരംഭിച്ചത്. സംഗീതജ്ഞന് ബാബുരാജാണ് വാസന്തിയെ സിനിമയിലേക്ക് എത്തിച്ചത്. വിപ്ലവഗായകനും റേഡിയോ കലാകാരനുമായ മച്ചാട്ട് കൃഷ്ണന്റെ മകളാണ് മച്ചാട്ട് വാസന്തി. കണ്ണൂർ കക്കാടാണു ജന്മസ്ഥലം. ആദ്യകാലത്ത് നിരവധി നാടകങ്ങളില് അഭിനയിച്ചിട്ടുണ്ട്. ആകാശ വാണിയിലും നിരവധി പാട്ടുകള് പാടി. നമ്മളൊന്ന് എന്ന നാടകത്തിലെ പച്ചപ്പനം തത്തേ എന്ന ഗാനവും ഏറെ ശ്രദ്ധ നേടിയിട്ടുണ്ട്. മണിമാരൻ തന്നത് എന്ന പാട്ടും ഏറെ ശ്രദ്ധിക്കപ്പെട്ടിരുന്നു.
Also read-Nobuyo Oyama Dies: 26 വർഷം ഡോറെമോണിന് ശബ്ദം നൽകിയ നോബുയോ ഒയാമ വിടവാങ്ങി
ഓളവും തീരവും സിനിമയില് ബാബുരാജിന്റെ സംഗീതത്തില് കെ.ജെ.യേശുദാസിനൊപ്പം പാടിയ ‘മണിമാരന് തന്നത് പണമല്ല പൊന്നല്ലാ..മധുരക്കിനാവിന്റെ കരിമ്പുതോട്ടം..’ എന്ന പാട്ടിലൂടെയാണ് മച്ചാട്ട് വാസന്തിയെ മലയാളികൾക്ക് സുപരിചിതയായത്. രാമു കാര്യാട്ടിന്റെ മിന്നാമിനുങ്ങ് എന്ന ചിത്രത്തില്, ബാബുരാജ് ഈണം പകര്ന്ന ‘തത്തമ്മേ തത്തമ്മേ നീ പാടിയാല് അത്തിപ്പഴം തന്നിടും…’, ‘ആരു ചൊല്ലിടും ആരു ചൊല്ലിടും…’ എന്നീ പാട്ടുകള് പാടി. മീശ മാധവനിലും മച്ചാട്ട് വാസന്തി പാടിയിട്ടുണ്ട്.
