മട്ടൺ കറിവെച്ച് നൽകിയില്ല; ഭർത്താവ് ഭാര്യയെ തല്ലിക്കൊന്നു

Representative Image

ഹൈദരാബാദ് : രാത്രിയിൽ ആട്ടിറച്ചി കറി വെച്ച് നൽകാത്തതിന് ഭർത്താവ് ഭാര്യയെ തല്ലിക്കൊന്നു. മട്ടൺ കറി വെച്ച് നൽകാത്തതിനെ തുടർന്നുണ്ടായ വാക്ക് തർക്കമാണ് കൊലപാതാകത്തിലേക്ക് നയിച്ചത്. തെലങ്കാനയിലെ മഹബൂബാബാദ് ജില്ലയിലെ സിറോളിലാണ് കൊലപാതകം റിപ്പോർട്ട് ചെയ്തിരിക്കുന്നത്. സിറോൾ സ്വദേശി മാലോത്ത് ബാലു ആണ് ഭാര്യ മാലോത്ത് കലാവതിയെ (35) വടികൊണ്ട് അടിച്ച് കൊലപ്പെടുത്തിയത്. കൊല നടത്തിയതിന് ശേഷം ഭർത്താവ് ഓടി രക്ഷപ്പെടുകയും ചെയ്തു.

ബാലുവിൻ്റെ ആക്രമണത്തിൽ കലാവതിക്ക് തലയ്ക്കും കഴുത്തിനും ഗുരുതരമായി പരിക്കേറ്റത്. നാട്ടുകാരെത്തിയാണ് യുവതിയെ ആശുപത്രിയിൽ എത്തിച്ചത്, എങ്കിലും ജീവൻ രക്ഷിക്കാനായില്ല. തുടർന്ന് ഇൻക്വെസ്റ്റ് നടപടികൾ സ്വീകരിച്ചതിന് ശേഷം മൃതദേഹം പോസ്റ്റ്മോർട്ടിത്തിനായി ജില്ല ആശുപത്രിയിലേക്ക് മാറ്റി. യുവതിയുടെ അമ്മയുടെ പരാതിയിൽ പോലീസ് കേസെടുത്തിരിക്കുന്നത്. ഒളിവിൽ പോയ പ്രതിക്കായിട്ടുള്ള തിരച്ചിൽ തുടരുകയാണ്. നിസാര കാരണത്തിന് പേരിൽ നടന്ന കൊലപാതകത്തിൻ്റെ ഞെട്ടലിലാണ് പ്രദേശവാസികൾ.