Kerala Weather Update: വേനൽചൂടിന് ആശ്വാസം: കേരളത്തിൽ വരും ദിവസങ്ങളിൽ ശക്തമായ മഴ, അലർട്ടുള്ള ജില്ലകൾ ഇതാ
IMD Alert, Heavy Rain Likely in Kerala Till May 1: ഉയർന്ന താപനില സൂര്യതാപത്തിനും ഹീറ്റ്സ്ട്രോക്കിനും കാരണമായേക്കാം. പൊതുജനങ്ങൾക്കായി ആരോഗ്യവകുപ്പ് പുറപ്പെടുവിച്ച പ്രധാന നിർദ്ദേശങ്ങൾ കൃത്യമായി പാലിക്കണം. ഉച്ചയ്ക്ക് 11 മണി മുതൽ 3 മണി വരെ നേരിട്ട് വെയിൽ ഏൽക്കുന്നത് ഒഴിവാക്കുക എന്നതാണ് പ്രധാന നിർദ്ദേശം. ദാഹം തോന്നിയില്ലെങ്കിലും ധാരാളം വെള്ളം കുടിക്കുക എന്നതും ഏറെ പ്രധാനമാണ്.
തിരുവനന്തപുരം: സംസ്ഥാനത്തെ കാലാവസ്ഥാ പ്രവചനത്തിൽ മാറ്റം. അടുത്ത അഞ്ച് ദിവസം കേരളത്തിൽ പരക്കെ മഴ ലഭിക്കുമെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ബുധൻ, വ്യാഴം, വെള്ളി ദിവസങ്ങളിൽ വിവിധ ജില്ലകളിൽ ശക്തമായ മഴയ്ക്ക് സാധ്യതയുള്ളതിനാൽ യെല്ലോ അലർട്ട് പ്രഖ്യാപിച്ചു. ഒറ്റപ്പെട്ടയിടങ്ങളിൽ ശക്തമായ മഴയ്ക്കാണ് സാധ്യത. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കാവുന്ന സാഹചര്യമാണിത്. വൈകുന്നേരങ്ങളിൽ ഇടിമിന്നലോടു കൂടിയ മഴയ്ക്കും സാധ്യതയുണ്ട്.
ജില്ലകളിലെ ജാഗ്രതാ നിർദ്ദേശം
വിവിധ ജില്ലകളിൽ കേന്ദ്ര കാലാവസ്ഥാ വകുപ്പ് യെല്ലോ അലർട്ട് പ്രഖ്യാപിച്ചിട്ടുണ്ട്. പത്തനംതിട്ട, ഇടുക്കി ജില്ലകളിൽ ഏപ്രിൽ 29 നും കണ്ണൂർ, കാസർകോട് ജില്ലകളിൽ ഏപ്രിൽ 30നും പത്തനംതിട്ട, ഇടുക്കി, വയനാട് ജില്ലകളിൽ മെയ് 1 നും ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്. മലയോര മേഖലകളിൽ താമസിക്കുന്നവർ ജാഗ്രത പാലിക്കണമെന്ന് ദുരന്തനിവാരണ അതോറിറ്റി നിർദ്ദേശിച്ചു. കഴിഞ്ഞ കുറച്ചു ദിവസങ്ങളായി സംസ്ഥാനത്ത് അനുഭവപ്പെട്ട കടുത്ത ഉഷ്ണതരംഗത്തിന് ഈ വേനൽമഴ വലിയ ആശ്വാസമാകുമെന്നാണ് കരുതുന്നത്.
Also Read – കൊടുംചൂടിന് ആശ്വാസമായി വേനൽ മഴ, ശ്രദ്ധിക്കേണ്ടത് ഈ ജില്ലക്കാർ, ഇന്നത്തെ കാലാവസ്ഥ
കടൽക്ഷോഭ ജാഗ്രത
ശക്തമായ കാറ്റിനും കടൽ പ്രക്ഷുബ്ധമാകാനും സാധ്യതയുള്ളതിനാൽ മത്സ്യത്തൊഴിലാളികൾ കാലാവസ്ഥാ നിർദ്ദേശങ്ങൾ ശ്രദ്ധിക്കണം. പെട്ടെന്നുണ്ടാകുന്ന കാറ്റിലും ഇടിമിന്നലിലും അപകടങ്ങൾ ഒഴിവാക്കാൻ പൊതുജനങ്ങൾ തുറസ്സായ സ്ഥലങ്ങളിൽ നിൽക്കുന്നത് ഒഴിവാക്കണമെന്നും നിർദ്ദേശമുണ്ട്.
സംസ്ഥാനത്ത് ഏറ്റവും ഉയർന്ന ചൂട് രേഖപ്പെടുത്തുന്നത് പാലക്കാട് ജില്ലയിലാണ്. കഴിഞ്ഞ ദിവസം പാലക്കാടും മലമ്പുഴയിലും 40.1 ഡിഗ്രി സെൽഷ്യസ് ചൂട് രേഖപ്പെടുത്തി. പുനലൂർ ( 39.5°C ), കൊല്ലം ( 39°C ) എന്നിവിടങ്ങളിലും താപനില ഉയർന്നു നിൽക്കുകയാണ്. വരും ദിവസങ്ങളിലും പാലക്കാട് ജില്ലയിൽ താപനില 40 ഡിഗ്രിക്ക് സമീപം തന്നെ തുടരാനാണ് സാധ്യത.
ആരോഗ്യ ജാഗ്രത : ഹീറ്റ്സ്ട്രോക്ക് ഭീഷണി
ഉയർന്ന താപനില സൂര്യതാപത്തിനും ഹീറ്റ്സ്ട്രോക്കിനും കാരണമായേക്കാം. പൊതുജനങ്ങൾക്കായി ആരോഗ്യവകുപ്പ് പുറപ്പെടുവിച്ച പ്രധാന നിർദ്ദേശങ്ങൾ കൃത്യമായി പാലിക്കണം. ഉച്ചയ്ക്ക് 11 മണി മുതൽ 3 മണി വരെ നേരിട്ട് വെയിൽ ഏൽക്കുന്നത് ഒഴിവാക്കുക എന്നതാണ് പ്രധാന നിർദ്ദേശം. ദാഹം തോന്നിയില്ലെങ്കിലും ധാരാളം വെള്ളം കുടിക്കുക എന്നതും ഏറെ പ്രധാനമാണ്. ഇത് നിർജ്ജലീകരണം ഒഴിവാക്കാൻ സഹായിക്കും. കട്ടി കുറഞ്ഞതും ഇളം നിറത്തിലുള്ളതുമായ പരുത്തി വസ്ത്രങ്ങൾ ധരിക്കുക എന്നതാണ് മറ്റൊരു കാര്യം.
കുട്ടികൾക്കും മുതിർന്നവർക്കും പ്രത്യേക ശ്രദ്ധ നൽകണം. കുട്ടികളെ വെയിലത്ത് കളിക്കാൻ വിടരുത്. മുതിർന്നവർക്കും ഗർഭിണികൾക്കും പ്രത്യേക കരുതൽ നൽകണം. പകൽ കത്തുന്ന വെയിലും വൈകിട്ട് മഴയും എന്ന ഈ വേറിട്ട കാലാവസ്ഥാ രീതി തുടരുന്നതിനാൽ പകർച്ചവ്യാധികൾക്കെതിരെയും ജനങ്ങൾ ജാഗ്രത പാലിക്കണമെന്ന് അധികൃതർ ഓർമ്മിപ്പിച്ചു.
