Kerala Secretariat Employees Association: മുഖ്യമന്ത്രി സ്തുതി തുടരാന് സെക്രട്ടേറിയറ്റ് എംപ്ലോയിസ് അസോസിയേഷന്; ഇത്തവണ ചെലവ് 40 ലക്ഷം
Kerala Secretariat Employees Association KSEA: അസോസിയേഷന് തയ്യാറാക്കിയ ഡോക്യുമെന്ററിയുടെ പ്രകാശനം മെയ് 21നാണ് നടക്കുന്നത്. തിരുവനന്തപുരം സെന്ട്രല് സ്റ്റേഡിയത്തിലാണ് പരിപാടി. സിപിഎം നിയന്ത്രണത്തിലുള്ള സംഘടന നേരത്തെ പിണറായിയെ സ്തുതിക്കുന്ന പാട്ട് തയ്യാറാക്കിയത് ചര്ച്ചയായിരുന്നു
തിരുവനന്തപുരം: മുഖ്യമന്ത്രി പിണറായി വിജയനെ പുകഴ്ത്തുന്ന ചടങ്ങ് സംഘടിപ്പിക്കാന് കേരള സെക്രട്ടേറിയറ്റ് എംപ്ലോയീസ് അസോസിയേഷൻ ചെലവഴിക്കുന്നത് 40 ലക്ഷം രൂപയെന്ന് റിപ്പോര്ട്ട്. മാതൃഭൂമിയാണ് ഇക്കാര്യം റിപ്പോര്ട്ട് ചെയ്തത്. പിണറായിയുടെ ജീവിതത്തെക്കുറിച്ച് പ്രതിപാദിക്കുന്ന ‘ദി ലെജന്ഡ്’ എന്ന ഡോക്യുമെന്ററിയുടെ പ്രകാശനത്തിനായാണ് ഇത്രയധികം രൂപ ചെലവഴിക്കുന്നത്. 15 ലക്ഷം രൂപയാണ് ഡോക്യുമെന്ററിക്ക് ചെലവായത്. സംഗീതവിരുന്നടക്കം ചടങ്ങിലുണ്ട്. ഇതടക്കമുള്ള ചടങ്ങിന് അസോസിയേഷന് കണക്കാക്കുന്നത് 40 ലക്ഷം രൂപയാണെന്നും മാതൃഭൂമി റിപ്പോര്ട്ട് ചെയ്തു.
അസോസിയേഷന് തയ്യാറാക്കിയ ഡോക്യുമെന്ററിയുടെ പ്രകാശനം മെയ് 21നാണ് നടക്കുന്നത്. തിരുവനന്തപുരം സെന്ട്രല് സ്റ്റേഡിയത്തിലാണ് പരിപാടി. സെക്രട്ടേറിയറ്റിലെ ജീവനക്കാരില് നിന്നാണ് തുക പിരിക്കുന്നതെന്നും, ശമ്പളം അടിസ്ഥാനമാക്കി 600-13000 രൂപ വരെയാണ് പിരിക്കുന്നതിനുള്ള ക്വാട്ടയെന്നും റിപ്പോര്ട്ടില് പറയുന്നു. അസോസിയേഷന്റെ വാര്ഷിക സമ്മേളനത്തിന്റെ പേരിലാണ് പണം പിരിക്കുന്നതെന്നും റിപ്പോര്ട്ടില് പറയുന്നു.
സിപിഎം നിയന്ത്രണത്തിലുള്ള സംഘടന നേരത്തെ പിണറായിയെ സ്തുതിക്കുന്ന പാട്ട് തയ്യാറാക്കിയത് ചര്ച്ചയായിരുന്നു. ‘ചെങ്കൊടിക്ക് കാവലായി ചെങ്കനല് കണക്കൊരാള്’ എന്ന ഗാനം അസോസിയേഷന്റെ സുവര്ണ ജൂബിലി മന്ദിര ഉദ്ഘാടന വേദിയിലാണ് ആലപിച്ചത്. നിരവധി ജീവനക്കാര് ചേര്ന്നാണ് അന്ന് ഗാനം ആലപിച്ചത്. തന്നെ സ്തുതിക്കുന്ന പാട്ട് കേട്ടുകൊണ്ടാണ് അന്ന് മുഖ്യമന്ത്രി ഉദ്ഘാടന വേദിയിലെത്തിയത്.
