New Rubber Board Chairman: റബർ ബോർഡ് തലപ്പത്ത് ചരിത്രപരമായ മാറ്റം; ബിജെപി നേതാവ് എൻ. ഹരി പുതിയ ചെയർമാൻ

ന്യൂഡൽഹി: കോട്ടയം ആസ്ഥാനമായി പ്രവർത്തിക്കുന്ന കേന്ദ്ര സർക്കാർ സ്ഥാപനമായ റബർ ബോർഡിന്റെ പുതിയ ചെയർമാനായി ബിജെപി നേതാവും നിലവിലെ ബോർഡ് അംഗവുമായ എൻ. ഹരിയെ നിയമിച്ചു. കേന്ദ്ര വാണിജ്യ-വ്യവസായ മന്ത്രാലയമാണ് മൂന്ന് വർഷത്തെ കാലാവധിയിലേക്ക് ഇദ്ദേഹത്തെ നിയമിച്ചുകൊണ്ട് ഔദ്യോഗിക ഉത്തരവിറക്കിയത്.

റബർ ബോർഡിന്റെ ചരിത്രത്തിൽ ഇതാദ്യമായാണ് സജീവ രാഷ്ട്രീയ രംഗത്തുനിന്നുള്ള ഒരു നേതാവിനെ ഈ ഉന്നത പദവിയിൽ നേരിട്ട് നിയമിക്കുന്നത്.

18 മാസത്തെ അനിശ്ചിതത്വത്തിന് വിരാമം

കഴിഞ്ഞ 18 മാസമായി റബർ ബോർഡിന് സ്ഥിരം ചെയർമാൻ ഉണ്ടായിരുന്നില്ല. മുൻ ചെയർമാൻ ഡോ. സവാർ ധനാനിയ സ്ഥാനമൊഴിഞ്ഞതിനെ തുടർന്ന് കേന്ദ്ര വാണിജ്യ മന്ത്രാലയത്തിലെ ഉന്നത ഉദ്യോഗസ്ഥരായിരുന്നു താത്കാലികമായി റബർ ബോർഡിന്റെ ചുമതല വഹിച്ചിരുന്നത്. എൻ. ഹരിയുടെ നിയമനത്തോടെ ബോർഡിന്റെ ഭരണപരമായ അനിശ്ചിതത്വങ്ങൾക്കാണ് ഇപ്പോൾ വിരാമമായിരിക്കുന്നത്.

കർഷക പ്രതിനിധിയായി എൻ. ഹരി

നിലവിൽ ബിജെപി കേരള മധ്യമേഖലാ പ്രസിഡന്റായി പ്രവർത്തിച്ചു വരികയാണ് കോട്ടയം പള്ളിക്കത്തോട് സ്വദേശിയായ എൻ. ഹരി. മുൻപ് ബിജെപി കോട്ടയം ജില്ലാ പ്രസിഡന്റായും അദ്ദേഹം ദീർഘകാലം സേവനമനുഷ്ഠിച്ചിട്ടുണ്ട്. കഴിഞ്ഞ രണ്ട് വർഷമായി റബർ ബോർഡിലെ സജീവ അംഗമെന്ന നിലയിൽ കർഷകരുടെ പ്രശ്നങ്ങളിൽ ഇടപെട്ടുവരുന്ന വ്യക്തി കൂടിയാണ് അദ്ദേഹം.

ഉൽപ്പാദനച്ചെലവിലെ വർദ്ധനവും വിലയിലെ അസ്ഥിരതയും ഉൾപ്പെടെ കേരളത്തിലെ റബർ കർഷകർ കടുത്ത പ്രതിസന്ധി നേരിടുന്ന സാഹചര്യത്തിലാണ് ഒരു രാഷ്ട്രീയ നേതാവ് ബോർഡിന്റെ തലപ്പത്തേക്ക് എത്തുന്നത്. റബർ ബോർഡിലെ മുൻപരിചയം കർഷകരുടെ ആവശ്യങ്ങൾ കേന്ദ്ര സർക്കാരിന് മുന്നിൽ കൃത്യമായി എത്തിക്കാൻ സഹായിക്കുമെന്ന പ്രതീക്ഷയിലാണ് കർഷക സംഘടനകൾ.

English summary

The Central Government has appointed N. Hari, the BJP Central Region President and sitting board member, as the new Chairman of the Rubber Board, marking the first time a political leader has been chosen to head the institution. This decision concludes an 18-month vacancy period during which Commerce Ministry officials held temporary charge following the departure of the former chairman, Dr. Sawar Dhanania.