Onam 2025 Weather Update: ഓണം മഴയെടുത്തു; നാളെ മുതല് കേരളത്തില് ശക്തമായ മഴ
Onam Rain Forecast 2025: ബുധനാഴ്ചയോടെ ന്യൂനമര്ദം ഒഡിഷ തീരത്തേക്ക് നീങ്ങുമെന്നാണ് പ്രതീക്ഷ. ഇതിന്റെ അടിസ്ഥാനത്തില് ആറ് ജില്ലകളില് യെല്ലോ അലര്ട്ട് പ്രഖ്യാപിച്ചു. തൃശൂര്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് എന്നീ ജില്ലകളിലാണ് മഴ മുന്നറിയിപ്പുള്ളത്.
അത്തം കറുത്താല് ഓണം വെളുക്കുമെന്ന് ഒരു പഴമൊഴിയുണ്ട്, അത്തത്തിന് മഴ പെയ്താല് ഓണത്തിന് മഴയുണ്ടാകില്ലെന്നാണ് ഇതുകൊണ്ട് അര്ത്ഥമാക്കുന്നത്. എന്നാല് ഇത്തവണ അത്തം കറുത്തു, തിരുവോണവും അതുപോലെ കറുക്കുമെന്ന റിപ്പോര്ട്ടുകളാണ് കാലാവസ്ഥ വകുപ്പ് പുറത്തുവിടുന്നത്.
സംസ്ഥാനത്ത് നാളെ (സെപ്റ്റംബര് 3) മുതല് മഴ വീണ്ടും ശക്തമാകും. ബംഗാള് ഉള്ക്കടലില് പുതിയ ന്യൂനമര്ദം രൂപപ്പെട്ടു. സെപ്റ്റംബര് മാസത്തിലെ ആദ്യത്തെ ന്യൂനമര്ദമാണ് ഉണ്ടായിരിക്കുന്നത്. ഇതുമൂലം കേരളത്തില് മഴ ശക്തമാകുമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കുന്നു.
ബുധനാഴ്ചയോടെ ന്യൂനമര്ദം ഒഡിഷ തീരത്തേക്ക് നീങ്ങുമെന്നാണ് പ്രതീക്ഷ. ഇതിന്റെ അടിസ്ഥാനത്തില് ആറ് ജില്ലകളില് യെല്ലോ അലര്ട്ട് പ്രഖ്യാപിച്ചു. തൃശൂര്, മലപ്പുറം, കോഴിക്കോട്, വയനാട്, കണ്ണൂര്, കാസര്ഗോഡ് എന്നീ ജില്ലകളിലാണ് മഴ മുന്നറിയിപ്പുള്ളത്.
നാളെ മാത്രമല്ല ഉത്രാട ദിനത്തിലും മഴ തുടരും. മൂന്ന് ജില്ലകളില് അന്നേ ദിവസം യെല്ലോ അലര്ട്ട് പുറപ്പെടുവിച്ചു. കോഴിക്കോട്, കണ്ണൂര്, കാസര്ഗോഡ് ജില്ലകള്ക്കാണ് മുന്നറിയിപ്പ്. തിരുവോണത്തിനും മഴയ്ക്ക് സാധ്യതയുണ്ടെന്നാണ് വിവരം.
ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് സംസ്ഥാനത്ത് പ്രവചിക്കപ്പെട്ടത്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നതുകൊണ്ട് കാലാവസ്ഥ വകുപ്പ് അര്ത്ഥമാക്കുന്നത്. തിരുവോണം, അവിട്ടം, ചതയം എന്നീ ദിവസങ്ങളിലും മഴയ്ക്ക് സാധ്യതയുണ്ട്.
ഓണത്തിന് മഴ ശക്തമാകുന്നത് ജനങ്ങളെ മോശമായി തന്നെ ബാധിക്കും. നിലവില് ഉത്രാടം ദിനത്തില് ശക്തമായ മഴയ്ക്കുള്ള സാഹചര്യമാണ് പ്രവചിച്ചത്. ഇത് ഉത്രാടപാച്ചിലിന് വെല്ലുവിളിയാകും. മഴ കനത്തതോടെ പൂവിനും മറ്റ് സാധനങ്ങള്ക്കും വില വര്ധിച്ചിരുന്നു. ഓണം പടിവാതില്ക്കല് എത്തിയപ്പോഴുള്ള മഴ കേരളത്തെയാകെ ദുരിതത്തിലാക്കും.
