Sabarimala : ശബരിമല തീർത്ഥാടകർ സഞ്ചരിച്ച മിനി ബസ് മറിഞ്ഞു; ഏഴ് പേർക്ക് പരിക്ക്
Sabarimala Seven Pilgrims Injured In Mini Bus Accident : എരുമേലിയിൽ ശബരിമല തീർത്ഥാടകർ സഞ്ചരിച്ച ബസ് മറിഞ്ഞ് ഏഴ് പേർക്ക് പരിക്ക്. കുട്ടികളടക്കം 22 പേരാണ് ബസിലുണ്ടായിരുന്നത്. ഞായറാഴ്ച രാത്രിയായിരുന്നു അപകടം.
പ്രതീകാത്മക ചിത്രം
ശബരിമല തീർത്ഥാടകർ സഞ്ചരിച്ച മിനി ബസ് മറിഞ്ഞ് ഏഴ് പേർക്ക് പരിക്ക്. ഞായറാഴ്ച രാത്രി എരുമേലി കണമല ഇറക്കത്തിൽ വച്ചാണ് അപകടമുണ്ടായത്. ആരുടെയും പരിക്ക് ഗുരുതരമല്ല. പരിക്കേറ്റവരെ കോട്ടയം മെഡിക്കൽ കോളജിലും എരുമേലി സർക്കാർ ആശുപത്രിയിലും പ്രവേശിപ്പിച്ചു.
തമിഴ്നാട്ടിലെ നാമക്കൽ സ്വദേശികളാണ് അപകടത്തിൽ പെട്ട മിനി ബസിൽ ഉണ്ടായിരുന്നത്. കുട്ടികൾ ഉൾപ്പെടെ 22 ഭക്തർ വാഹനത്തിലുണ്ടായിരുന്നു. കണമല ഇറക്കത്തിൽ അട്ടി വളവിന് സമീപത്തുവച്ച് നിയന്ത്രണം തെറ്റിയ വാഹനം മൺതിട്ടയിലിടിച്ച് റോഡിൽ മറിയുകയായിരുന്നു. പരിക്കേറ്റവരിൽ മൂന്ന് പേരെ കോട്ടയം മെഡിക്കൽ കോളജിലും നാല് പേരെ എരുമേലി സർക്കാർ ആശുപത്രിയിലും പ്രവേശിപ്പിച്ചു. മോട്ടോർ വാഹന വകുപ്പിന്റെ പട്രോളിങ് സംഘമാണ് രക്ഷാ പ്രവര്ത്തനം നടത്തി ഭക്തരെ ആശുപത്രികളിലെത്തിച്ചത്. ഈ പ്രദേശത്ത് മുൻപും അപകടങ്ങളുണ്ടായിട്ടുണ്ട്.
ഈ മാസം 16നാണ് ശബരിമല നട തുറന്നത്. തന്ത്രി കണ്ഠര് രാജീവരുടെ കാർമികത്വത്തിൽ പുതുതായി ചുമതലയേറ്റ മേൽ ശാന്തി അരുൺ നമ്പൂതിരി പുലർച്ചെ മുന്നു മണിക്ക് നട തുറന്നു. ആദ്യ ദിനം 70,000 പേരാണ് ഓൺ ലൈൻ വഴി ശബരിമല ദർശനത്തിനായി ബുക്ക് ചെയ്തത്. മൂന്ന് മണിക്ക് തുറന്ന നട ഉച്ചയ്ക്ക് ഒരു മണിക്ക് അടയ്ക്കും. ഉച്ചകഴിഞ്ഞ് മൂന്ന് മണിക്ക് വീണ്ടും തുറന്ന് രാത്രി 11ന് അടയ്ക്കും. എല്ലാ ദിവസവും രാവിലെ നെയ്യഭിഷേകം നടക്കും. ഉഷഃപൂജ രാവിലെ 7.30നാണ്. ഉച്ചപൂജ 12.30ന്. വൈകിട്ട് 6.30ന് ദീപാരാധനയും രാത്രി 9.30ന് അത്താഴപൂജയും നടക്കും. 11ന് ഹരിവരാസനം പാടിയാണ് നട അടയ്ക്കുന്നത്. ഇത്തവണ 18 മണിക്കൂറാണ് ദർശന സൗകര്യം. വെർച്വൽ ക്യൂ വഴി ഒരു ദിവസം 70,000 പേർക്ക് ദർശനം നടത്താം. സ്പോട്ട് ബുക്കിംഗിലൂടെ 10,000 പേർക്കും അവസരം ലഭിക്കും.
ശബരിമലയിലെ തിരക്കുണ്ടാകാനുള്ള സാധ്യത കണക്കിലെടുത്ത് പമ്പയിലും സന്നിധാനത്തും കൂടുതൽ പോലീസിനെ വിന്യസിച്ചിട്ടുണ്ട്. തീർഥാടനകാലം പരിഗണിച്ച് റെയിൽവേ ഒമ്പത് സ്പെഷൽ ട്രെയിനുകൾ അനുവദിച്ചു. ശബരിമല സർവീസ് നടത്തുന്ന കെഎസ്ആർടിസി ബസുകളിൽ തീർത്ഥാടകരെ നിർത്തിയുള്ള യാത്ര വേണ്ടെന്ന് ഹൈക്കോടതി ഉത്തരവിട്ടിരുന്നു. സർവീസ് നടത്തുന്നതിൽ ഫിറ്റ്നസ് ഇല്ലാത്ത ഒരു ബസ് പോലും ഉണ്ടാവരുത്തെന്നും നിർദ്ദേശങ്ങൾ ലംഘിച്ചാൽ കർശന നടപടി സ്വീകരിക്കുമെന്നും ജസ്റ്റിസ് അനില് കെ നരേന്ദ്രന്, എസ് മുരളീകൃഷ്ണ എന്നിവരടങ്ങിയ ദേവസ്വം ബെഞ്ച് വ്യക്തമാക്കി.
