V S Achuthanandan: രോഗാവസ്ഥയിലും വീൽചെയറിൽ മുറ്റത്തിരുന്ന് പത്രം ‘കേൾക്കും’; പക്ഷേ ആ ആത്മമിത്രത്തിന്റെ വിയോ​ഗം മാത്രം വിഎസ് അറിഞ്ഞില്ല!

V S Achuthanandan

ആരോഗ്യമുള്ള കാലത്ത് ചിട്ടയായ ശീലം പിന്തുടർന്ന നേതാവാണ് വിഎസ്. പുലർച്ചെ അഞ്ച് മണിക്ക് എഴുന്നേല്‍ക്കുന്നതും പ്രഭാതസവാരിയും അദ്ദേഹത്തിന്റെ ദിനചര്യയുടെ ഭാ​ഗമായിരുന്നു. അനാരോഗ്യം മൂലം വിശ്രമത്തിലായപ്പോഴും ഒരിക്കൽ പോലും മുടക്കാതിരുന്നൊരു ശീലമുണ്ട്! വാർത്തയറിയുകയെന്ന ശീലം. കഴിഞ്ഞ ആറ് വർഷമായി രോഗാവസ്ഥമൂലം മകൻ വി.എ.അരുൺകുമാറിന്റെ വീട്ടിലായിരുന്നു അ​ദ്ദേഹം കഴിഞ്ഞത്. ഈ കാലയളവിലും അദ്ദേഹം ഇതിന് മാത്രം മുടക്കം വരുത്തിയിരുന്നില്ല. എന്നാൽ പത്രം വായിക്കാൻ കഴിയാതെ വന്നതോടെ ദിവസവും രാവിലെയും വൈകിട്ടും ഒരു മണിക്കൂർ വീതം വീൽചെയറിൽ വീട്ടുമുറ്റത്തിരുന്ന് പത്രം ‘കേൾക്കാൻ തുടങ്ങി.

അദ്ദേഹത്തെ പരിചരിക്കാനായി നിയോ​ഗിച്ച രണ്ടു ഹോം നഴ്സുമാരിലൊരാൾ ദിവസവും പത്രം ഉറക്കെ വായിച്ചു കേൾപ്പിക്കും. മനസ്സിനു വിഷമമുണ്ടാക്കുന്ന ചില വാർത്തകൾ ഒഴിവാക്കും. അങ്ങനെ ഒഴിവാക്കിയ വാർത്തയായിരുന്നു വിഎസിന്റെ ആത്മമിത്രമായിരുന്ന സീതാറാം യച്ചൂരിയുടെ മരണം. ആ മരണവാർത്തയിറങ്ങിയ പത്രം വിഎസിനെ വായിച്ചു കേൾപ്പിച്ചില്ല. അവസാന നാൾ വരെ യച്ചൂരിയുടെ വേർപാടും വിഎസ് അറിഞ്ഞിരുന്നില്ല. തിരുവനന്തപുരത്തുള്ളപ്പോൾ യച്ചൂരി വിഎസിനരികിലെത്തുമായിരുന്നു. പ്രിയ കോമ്രേഡിനെ കാണുമ്പോൾ വിഎസ് ഉഷാറാകും. വിഎ്സ് കേരളത്തിന്റെ ഫിദൽ കാസ്ട്രോയാണെന്നാണ് യെച്ചൂരി വിശേഷിപ്പിച്ചത്.

Also Read:വിഎസ് അച്യുതാനന്ദനെ അധിക്ഷേപിച്ച് സോഷ്യൽ മീഡിയയിൽ പോസ്റ്റിട്ടു; അധ്യാപകൻ പോലീസ് കസ്റ്റഡിയിൽ

വാർത്തകൾക്കു പുറമെ പാട്ടുകൾ കേൾക്കാനും അദ്ദേഹം ഇഷ്ടപ്പെട്ടിരുന്നു. ചാനലുകളിൽ കുട്ടികൾ പാടുന്ന പരിപാടികൾ ഏറെ ഇഷ്ടമായിരുന്നു. അരുൺകുമാറിന്റെ ഭാര്യ ഡോ.രജനി ഇഎൻടി സ്പെഷലിസ്റ്റും മകൾ ആശയുടെ ഭർത്താവ് ഡോ.ടി.തങ്കരാജ് ന്യൂറോ സ്പെഷലിസ്റ്റുമാണ്.