Kanji, Payar and Pickle : ചൂട് കഞ്ഞിയും പയറും അച്ചാറും…. എന്താകും ഈ രുചിക്കൂട് മലയാളിയുടെ പനിക്കാല ഭക്ഷണമാകാൻ കാരണം?
Kerala's Go-To Fever Food: ഈ മൂന്ന് ചേരുവകളും ചേരുമ്പോൾ, ലഘുവായ ദഹനം, അത്യാവശ്യ പോഷകങ്ങൾ, രുചി എന്നീ ഘടകങ്ങൾ സമന്വയിക്കുന്നു.
ചന്നം പിന്നം മഴ പെയ്യുന്ന… ഇടിയും മിന്നലും പേടിപ്പിക്കുന്ന ജൂൺ ജൂലൈ മാസങ്ങളിൽ ക്ലാസിലെ ആരെങ്കിലും പനിപിടിച്ചു വന്നാൽ പിറ്റേന്ന് തുമ്മലും ചീറ്റലുമായി കിടപ്പാകും. മേലാസകലം കുളിരുമ്പോൾ ഒരു പുതപ്പുമെടുത്ത് കട്ടിലിൽ ചുരുളും. ചുക്കുകാപ്പിയും ആവി പിടിക്കലും വിക്സ്മെെ മണവും ആകെ പിന്നെ മുറിയിൽ ഒരു പനിമണം നിറയും. വിശപ്പ് തീരെ കുറവ്… നാവിലാണെങ്കിൽ രുചിയുമില്ല. രസമുകുളങ്ങൾ മരിച്ചുകിടക്കുന്ന സമയത്ത് ചൂട് കഞ്ഞിയും ചുട്ടരച്ച ചമ്മന്തിയും പയറുതോരനും എരിവും ഉപ്പും പുളിയും ഒപ്പം കായമണവുമുള്ള അച്ചാറുമെല്ലാം കൂട്ടി ഭക്ഷണം കഴിച്ച ഓർമ്മയുണ്ടോ? ആർക്കും അത്ര ഇഷ്ടമല്ല ആ സമയത്ത് കഞ്ഞി. പക്ഷെ ഇന്ന് ആ രുചിക്കൂട്ട് പലർക്കും ഗൃഹാതുരത്വമുണർത്തും. എന്താവും പനിക്കാല ഭക്ഷണമായി ഈ കഞ്ഞിയും മറ്റ് തൊടുകറികളും മാറാനുള്ള കാരണമെന്നു നോക്കാം.
കഞ്ഞി-പയർ-അച്ചാർ: ആരോഗ്യ രഹസ്യം
ഈ ലളിതമായ കോമ്പിനേഷൻ പനിയുള്ളപ്പോൾ തിരഞ്ഞെടുക്കുന്നതിന് പിന്നിൽ പോഷകപരമായും ദഹനപരമായും കൃത്യമായ കാരണങ്ങളുണ്ട്.
പനി വരുമ്പോൾ ദഹനവ്യവസ്ഥ ദുർബലമായിരിക്കും. കഞ്ഞി വളരെ ലഘുവായ ഭക്ഷണമായതുകൊണ്ട് ദഹനം എളുപ്പമാക്കുകയും ആമാശയത്തിന് അധികഭാരം നൽകാതിരിക്കുകയും ചെയ്യുന്നു. ധാരാളം വെള്ളം ചേർത്ത് പാകം ചെയ്യുന്നതിനാൽ, കഞ്ഞി ശരീരത്തിൽ ജലാംശം നിലനിർത്താൻ സഹായിക്കുന്നു, ഇത് പനി സമയത്ത് നിർജ്ജലീകരണം തടയാൻ അത്യാവശ്യമാണ്. അരിയിലെ കാർബോഹൈഡ്രേറ്റ്സ് പെട്ടെന്ന് ആഗിരണം ചെയ്യപ്പെടുന്ന ഊർജ്ജം നൽകുന്നു, ഇത് ക്ഷീണം കുറയ്ക്കാൻ സഹായിക്കും.
Also read – എരിവ് ഒരു രുചിയല്ല…. പിന്നെ ഇത് തോന്നുന്നത് എങ്ങനെ?
പയർ വർഗ്ഗങ്ങൾ പ്രോട്ടീൻ കൊണ്ട് സമ്പുഷ്ടമാണ്. രോഗാവസ്ഥയിൽ കോശങ്ങളുടെ കേടുപാടുകൾ പരിഹരിക്കുന്നതിനും രോഗപ്രതിരോധ ശേഷി വർദ്ധിപ്പിക്കുന്നതിനും പ്രോട്ടീൻ അത്യന്താപേക്ഷിതമാണ്. നാരുകൾ, വിറ്റാമിനുകൾ, ധാതുക്കൾ എന്നിവയും പയറിൽ അടങ്ങിയിരിക്കുന്നു. കഞ്ഞിക്ക് ആവശ്യമായ പോഷകമൂല്യം നൽകാൻ പയറിന് സാധിക്കും. ഇറച്ചി പോലുള്ള പ്രോട്ടീനുകൾ ദഹിക്കാൻ പ്രയാസമുള്ളപ്പോൾ, നന്നായി വേവിച്ച പയർ എളുപ്പത്തിൽ ദഹിക്കുന്ന പ്രോട്ടീൻ നൽകുന്നു.
പനി വരുമ്പോൾ പലർക്കും വായിൽ രുചിയില്ലായ്മ അനുഭവപ്പെടാറുണ്ട്. അച്ചാറിൻ്റെ പുളിയും എരിവും ഉപ്പും രുചി മുകുളങ്ങളെ ഉത്തേജിപ്പിക്കുകയും വിശപ്പ് കൂട്ടാൻ സഹായിക്കുകയും ചെയ്യും. നാരങ്ങ അല്ലെങ്കിൽ നെല്ലിക്ക അച്ചാറുകൾ പോലുള്ള ചിലയിനങ്ങളിൽ രോഗപ്രതിരോധ ശേഷിക്ക് പ്രധാനമായ വിറ്റാമിൻ C അടങ്ങിയിട്ടുണ്ട്. പരമ്പരാഗത രീതിയിൽ ഉണ്ടാക്കുന്ന അച്ചാറുകളിൽ ദഹനത്തെ സഹായിക്കുന്ന നല്ല ബാക്ടീരിയകൾ (പ്രോബയോട്ടിക്കുകൾ) ഉണ്ടാകാൻ സാധ്യതയുണ്ട്.
ഈ മൂന്ന് ചേരുവകളും ചേരുമ്പോൾ, ലഘുവായ ദഹനം, അത്യാവശ്യ പോഷകങ്ങൾ, രുചി എന്നീ ഘടകങ്ങൾ സമന്വയിക്കുന്നു. ഇത് രോഗം മാറിയ ശേഷം സാധാരണ ഭക്ഷണത്തിലേക്ക് മാറുന്നതിനുള്ള ഒരു സുരക്ഷിതവും പോഷകസമൃദ്ധവുമായ വഴിയാണ്.
