Alcohol health Issues : മദ്യത്തിന് സുരക്ഷിതമായ അളവുണ്ടോ? മാസത്തിലൊന്നും വല്ലപ്പോഴും മദ്യപിക്കുന്നവർ ശ്രദ്ധിക്കുക

Alcohol3

ആഘോഷവേളകളിലും വിഷമം മറക്കാനും പലരും മദ്യത്തെ ആശ്രയിക്കാറുണ്ട്. ആഴ്ചയിൽ ഒന്നോ രണ്ടോ തവണ മാത്രം മദ്യപിക്കുന്നത് ശരീരത്തിന് ദോഷകരമല്ലെന്ന ധാരണ പൊതുവേയുണ്ട്. എന്നാൽ ഈ വിശ്വാസം തെറ്റാണെന്നും മദ്യത്തിന്റെ ഓരോ തുള്ളിയും ശരീരത്തിന് ഹാനികരമാണെന്നും ആരോഗ്യവിദഗ്ധർ മുന്നറിയിപ്പ് നൽകുന്നു.

സുരക്ഷിതമായ അളവ് ഉണ്ടോ?

സുരക്ഷിതമായ അളവിൽ മദ്യം കഴിക്കാമെന്ന വാദത്തെ ഡോക്ടർമാർ തള്ളിക്കളയുന്നു. മദ്യം എത്ര കുറഞ്ഞ അളവിൽ കഴിച്ചാലും അത് ശരീരത്തിൽ പ്രതികൂല ഫലങ്ങൾ ഉണ്ടാക്കും. മദ്യപാനത്തിന്റെ ആവൃത്തി അനുസരിച്ച് ദോഷഫലങ്ങളിൽ മാറ്റമുണ്ടാകാം എന്ന് മാത്രം. ദിവസവും മദ്യപിക്കുന്നവരുടെ രോഗപ്രതിരോധ ശേഷി ക്രമേണ നശിക്കുന്നു. ലിവർ സിറോസിസ്, കാൻസർ, ഹൃദയസംബന്ധമായ തകരാറുകൾ, പാൻക്രിയാസ് രോഗങ്ങൾ എന്നിവയ്ക്ക് ഇവർക്ക് സാധ്യത കൂടുതലാണ്.

ALSO READ: ബിരിയാണി മുതൽ ഗുലാബ് ജാമുൻ വരെ! ഈ ട്രെയിനിലെ ഭക്ഷണം കഴിക്കാൻ ആരും ഒന്ന് കൊതിച്ചുപോകും

വല്ലപ്പോഴും മാത്രം കുടിക്കുന്നവരിലും ഫാറ്റി ലിവർ ഉണ്ടാകാനുള്ള സാധ്യതയുണ്ട്. കരളിൽ തുടർച്ചയായി സമ്മർദ്ദം ചെലുത്തുന്നത് മെറ്റബോളിസം മന്ദഗതിയിലാക്കാനും രക്തത്തിലെ പഞ്ചസാരയുടെ അളവ് വർദ്ധിപ്പിക്കാനും കാരണമാകും. മാസത്തിലൊരിക്കൽ മാത്രം കുടിക്കുന്നവരിലും തലച്ചോറിന്റെ പ്രവർത്തനം മന്ദഗതിയിലാവുകയും ശരീരം വലിയ തോതിൽ നിർജ്ജലീകരണത്തിന് വിധേയമാവുകയും ചെയ്യുന്നു. പിറ്റേദിവസമുണ്ടാകുന്ന ഹാംഗ് ഓവർ കരളിന്റെ അമിത കഠിനാധ്വാനത്തിന്റെ ഫലമാണ്.

ലോകമെമ്പാടുമുള്ള മരണങ്ങളിൽ 7 ശതമാനത്തിനും കാരണം മദ്യപാനമാണെന്ന് ലോകാരോഗ്യ സംഘടന ചൂണ്ടിക്കാട്ടുന്നു. ഒരു വ്യക്തിയുടെ പ്രായം, ഭാരം, വയർ ശൂന്യമാണോ അല്ലയോ എന്നത് അനുസരിച്ച് ലഹരിയുടെ ആഘാതം മാറിക്കൊണ്ടിരിക്കും.

മദ്യം ശരീരത്തിൽ നിൽക്കുന്ന സമയം

ഒരു പെഗ് മദ്യത്തിന്റെ ഫലം ഒന്നര മുതൽ മൂന്ന് മണിക്കൂർ വരെ നീണ്ടുനിൽക്കും. എന്നാൽ അഞ്ച് പെഗ്ഗിൽ കൂടുതൽ കഴിച്ചാൽ അതിന്റെ ലഹരിയും പാർശ്വഫലങ്ങളും ഒരു ദിവസം മുഴുവൻ നീണ്ടുനിൽക്കും. വിസ്കി പോലുള്ള കടുപ്പമേറിയ മദ്യം ഒഴിഞ്ഞ വയറ്റിൽ കഴിക്കുന്നത് ലഹരി വർദ്ധിപ്പിക്കുക മാത്രമല്ല, ആന്തരിക അവയവങ്ങൾക്ക് വലിയ നാശമുണ്ടാക്കുകയും ചെയ്യും.