Tourist Spots Kerala: അറബിക്കടലിന്റെ കാവലാൾ; 400 വർഷത്തെ ചരിത്രം പേറുന്ന കേരളത്തിലെ ഈ കോട്ട കണ്ടിട്ടുണ്ടോ?
Exploring the 400-Year Old Legacy bekal fort: അതിമനോഹരമായ ഭൂപ്രകൃതിയും കടൽത്തീരവും ബേക്കൽ കോട്ടയെ സിനിമാക്കാരുടെ പ്രിയപ്പെട്ട ലൊക്കേഷനാക്കി മാറ്റുന്നു. നിരവധി സിനിമകൾക്കും വിവാഹ-പരസ്യ ചിത്രീകരണങ്ങൾക്കും ഈ ചെങ്കൽ കോട്ട വേദിയായിട്ടുണ്ട്.
കാസർകോട്: കേരളത്തിലെ ഏറ്റവും വലിയ സംരക്ഷിത സ്മാരകവും ജില്ലയുടെ വിനോദസഞ്ചാര ഭൂപടത്തിലെ പ്രധാന അടയാളവുമായ ബേക്കൽ കോട്ട 400 വർഷത്തിന്റെ ഗരിമയിൽ തലയുയർത്തി നിൽക്കുന്നു. പതിനേഴാം നൂറ്റാണ്ടിൽ പണികഴിപ്പിച്ച ഈ ചരിത്ര നിർമ്മിതി ഇന്ന് ലോകമെമ്പാടുമുള്ള സഞ്ചാരികളെയും സിനിമാപ്രേമികളെയും ഒരുപോലെ ആകർഷിക്കുന്ന കേന്ദ്രമാണ്. പള്ളിക്കര വില്ലേജിൽ അറബിക്കടലിനോട് ചേർന്ന് 35 ഏക്കറിലായി പരന്നു കിടക്കുന്ന ഈ കോട്ട വെട്ടുകല്ലിലാണ് നിർമ്മിച്ചിരിക്കുന്നത്.
ചരിത്രവും നിർമ്മാണവും
പുരാതനമായ കദംബ രാജവംശമാണ് ഈ കോട്ട നിർമ്മിച്ചതെന്നാണ് ചരിത്രകാരന്മാർ കരുതുന്നത്. കാലാകാലങ്ങളിൽ കോലത്തിരി രാജാക്കന്മാരും മൈസൂരു സുൽത്താൻമാരും കൈവശപ്പെടുത്തിയ കോട്ട ഒടുവിൽ ബ്രിട്ടീഷുകാരുടെ അധീനതയിലായി. ആകാശക്കാഴ്ചയിൽ ഒരു ‘താക്കോൽ ദ്വാരത്തിന്റെ’ ആകൃതിയുള്ള ഈ കോട്ടയ്ക്ക് 12 മീറ്ററോളം ഉയരമുള്ള വമ്പൻ മതിലുകളാണുള്ളത്. ഓരോ ഭരണാധികാരിയും കാലാനുസൃതമായി കോട്ടയിൽ വരുത്തിയ പ്രതിരോധ മാറ്റങ്ങളാണ് ഇതിനെ ഇന്നും തനിമയോടെ നിലനിർത്തുന്നത്.
പ്രധാന ആകർഷണങ്ങൾ
കടലിലേക്ക് ഏകദേശം 50 അടിയോളം ഉയരത്തിൽ തള്ളിനിൽക്കുന്ന വാച്ച് ടവർ കോട്ടയിലെ ഏറ്റവും തന്ത്രപ്രധാനമായ ഇടമാണ്. പഴയകാലത്ത് ഭടന്മാർ 24 മണിക്കൂറും കടൽ നിരീക്ഷിക്കാൻ ഉപയോഗിച്ചിരുന്ന ഈ ഗോപുരം ഇന്നും സഞ്ചാരികൾക്ക് മനോഹരമായ കാഴ്ചയാണ് സമ്മാനിക്കുന്നത്. ഇതുകൂടാതെ വലിയ പീരങ്കികൾ ഘടിപ്പിച്ചിരുന്ന നിരീക്ഷണ ഗോപുരങ്ങൾ, പടവുകളോടു കൂടിയ പുരാതന ജലസംഭരണി, രഹസ്യ തുരങ്കങ്ങൾ, സമീപത്തുള്ള ഹനുമാൻ ക്ഷേത്രവും ടിപ്പു സുൽത്താൻ നിർമ്മിച്ചതെന്ന് കരുതപ്പെടുന്ന പള്ളിയും പ്രധാന ആകർഷണങ്ങളാണ്.
ALSO READ: വെറും മലനിരയല്ല, ഇത് കാറ്റുകൾ കുടികൊള്ളുന്ന നഗരം! ; എന്താണ് രാമക്കൽമേടിന് പിന്നിലെ രഹസ്യം?
അതിമനോഹരമായ ഭൂപ്രകൃതിയും കടൽത്തീരവും ബേക്കൽ കോട്ടയെ സിനിമാക്കാരുടെ പ്രിയപ്പെട്ട ലൊക്കേഷനാക്കി മാറ്റുന്നു. നിരവധി സിനിമകൾക്കും വിവാഹ-പരസ്യ ചിത്രീകരണങ്ങൾക്കും ഈ ചെങ്കൽ കോട്ട വേദിയായിട്ടുണ്ട്. കോട്ടയിൽ നിന്നും ഒരു കിലോമീറ്റർ മാത്രം അകലെയുള്ള ബേക്കൽ ബീച്ചും വിനോദസഞ്ചാരികളുടെ പ്രധാന കേന്ദ്രമാണ്.
നിലവിൽ കേന്ദ്ര പുരാവസ്തു വകുപ്പിന്റെ കീഴിലാണ് ഈ ചരിത്ര സ്മാരകം സംരക്ഷിക്കപ്പെടുന്നത്. ചരിത്രവും കടൽക്കാറ്റും ഇഴചേരുന്ന ഈ വിസ്മയം കേരളത്തിലെത്തുന്ന ഏതൊരു സഞ്ചാരിയും കണ്ടിരിക്കേണ്ട കാഴ്ച തന്നെയാണ്.
