Viral Video: ഗുരുത്വാകർഷണത്തെ വെല്ലുവിളിക്കുന്ന അത്ഭുതം, കാണാത്തവർ കണ്ടോളൂ
Watch viral video of maharashtra reverse waterfall: മഹാരാഷ്ട്രയിലെ നാനേഘട്ട്, സംരാദ് ഗ്രാമം, കവൽഷെത് പോയിന്റ്, അഞ്ജനേരി തുടങ്ങിയ ഇടങ്ങളിലാണ് ഈ പ്രതിഭാസം പ്രധാനമായും കാണപ്പെടുന്നത്.
മുംബൈ : പ്രകൃതി നിയമങ്ങളെ വെല്ലുവിളിക്കുന്ന കാഴ്ചകളാൽ സമ്പന്നമാണ് ഇന്ത്യയിലെ പശ്ചിമഘട്ട മലനിരകൾ. അത്തരത്തിൽ വിനോദസഞ്ചാരികളെയും സോഷ്യൽ മീഡിയയെയും ഒരുപോലെ അമ്പരപ്പിക്കുന്ന ഒന്നാണ് മഹാരാഷ്ട്രയിലെ ‘റിവേഴ്സ് വാട്ടർഫാൾ’ അഥവാ തലതിരിഞ്ഞ വെള്ളച്ചാട്ടം. സാധാരണ വെള്ളച്ചാട്ടങ്ങൾ ഉയരങ്ങളിൽ നിന്ന് താഴേക്ക് പതിക്കുമ്പോൾ, ഇവിടെ വെള്ളം താഴേക്ക് വീഴാതെ ആകാശത്തേക്ക് പറന്നുയരുകയാണ് ചെയ്യുന്നത്.
ഈ അതിശയകരമായ കാഴ്ചയ്ക്ക് പിന്നിൽ പ്രവർത്തിക്കുന്നത് അദൃശ്യമായ ഒരു കരുത്താണ്; അതിശക്തമായ കാറ്റ്. ജൂൺ മുതൽ ഓഗസ്റ്റ് വരെയുള്ള മഴക്കാലത്താണ് ഈ പ്രതിഭാസം അതിന്റെ പൂർണ്ണരൂപത്തിൽ ദൃശ്യമാകുന്നത്. മലയിടുക്കുകളിലൂടെ വീശിയടിക്കുന്ന അതിശക്തമായ കാറ്റ്, താഴേക്ക് പതിക്കേണ്ട വെള്ളത്തെ മുകളിലേക്ക് തള്ളുന്നു. ഇതോടെ വെള്ളച്ചാട്ടം മഞ്ഞുതുള്ളികൾ പോലെ ആകാശത്തേക്ക് ചിതറിത്തെറിക്കുന്നത് കാണാൻ അതിമനോഹരമാണ്.
മഹാരാഷ്ട്രയിലെ നാനേഘട്ട്, സംരാദ് ഗ്രാമം, കവൽഷെത് പോയിന്റ്, അഞ്ജനേരി തുടങ്ങിയ ഇടങ്ങളിലാണ് ഈ പ്രതിഭാസം പ്രധാനമായും കാണപ്പെടുന്നത്. ഇതിൽ നാനേഘട്ടിലെ കാഴ്ചയാണ് ഏറ്റവും പ്രശസ്തം. ഹനുമാൻ സ്വാമിയുടെ ജന്മസ്ഥലമെന്ന് വിശ്വസിക്കപ്പെടുന്ന അഞ്ജനേരിയിലും ഈ മായാജാലം ദൃശ്യമാകാറുണ്ട്.
മഴക്കാലത്തെ ഈ സാഹസിക യാത്രയ്ക്ക് ഒരുങ്ങുന്നവർ സുരക്ഷാ കാര്യങ്ങളിൽ പ്രത്യേകം ശ്രദ്ധിക്കണം. പാറക്കെട്ടുകളിൽ വഴുതാൻ സാധ്യതയുള്ളതിനാൽ മികച്ച ഷൂസുകൾ ധരിക്കാനും പ്രാദേശിക ഗൈഡുകളുടെ നിർദ്ദേശം പാലിക്കാനും ടൂറിസം വകുപ്പ് നിർദ്ദേശിക്കുന്നു. പ്രകൃതിയുടെ ഈ അസാധാരണ ശക്തിയും സൗന്ദര്യവും നേരിട്ട് അനുഭവിക്കുന്നത് ഏതൊരു സഞ്ചാരിക്കും ഒരു മികച്ച തെറാപ്പി പോലെയായിരിക്കും.
View this post on Instagram
