Asia Cup 2025: ‘ഓപ്പറേഷൻ സിന്ദൂർ ഇപ്പോഴും നടക്കുകയാണെന്നാണല്ലോ പ്രധാനമന്ത്രി പറയുന്നത്’; ഇന്ത്യ – പാകിസ്താൻ മത്സരത്തിനെതിരെ മനോജ് തിവാരി
Manoj Tiwary Against BCCI: ഏഷ്യാ കപ്പിൽ ഇന്ത്യ - പാകിസ്താൻ മത്സരത്തിനെതിരെ വിമർശനം ശക്തമാവുന്നു. മുൻ ഇന്ത്യൻ താരം മനോജ് തിവാരിയും മത്സരത്തിൽ എതിർപ്പറിയിച്ചു.
ഏഷ്യാ കപ്പിലെ ഇന്ത്യ - പാകിസ്താൻ മത്സരത്തിനെതിരെ മുൻ ക്രിക്കറ്ററും പശ്ചിമ ബംഗാൾ മന്ത്രിയുമായ മനോജ് തിവാരി. ഓപ്പറേഷൻ സിന്ദൂർ ഇപ്പോഴും നടക്കുകയാണെന്നാണല്ലോ പ്രധാനമന്ത്രി പറയുന്നത്. എന്നിട്ടും മത്സരം നടത്താൻ എങ്ങനെയാണ് കഴിയുക എന്നും അദ്ദേഹം ചോദിച്ചു. (Manoj Tiwary X)
"ഞാൻ അതിനെതിരാണ്. ഇന്ത്യ - പാകിസ്താൻ മത്സരം നടക്കാൻ പാടില്ല. പഹൽഗാമിലെ ആക്രമണത്തിന് ശേഷം അത് പാടില്ല. അതിന് ശേഷമാണ് ഓപ്പറേഷൻ സിന്ദൂർ നടന്നു. നമ്മുടെ പ്രധാനമന്ത്രി പറയുന്നത് ഓപ്പറേഷൻ സിന്ദൂർ ഇപ്പോഴും നടക്കുകയാണെന്നാണല്ലോ."- അദ്ദേഹം പറഞ്ഞു.
"അങ്ങനെ ഒരു സാഹചര്യത്തിൽ പാകിസ്താനുമായി എങ്ങനെയാണ് മത്സരം കളിക്കുക. അവസ്ഥ വളരെ മോശമാണ്. എങ്ങനെയാണ് ഈ അവസ്ഥയിൽ നമുക്കൊരു ഇന്ത്യ - പാകിസ്താൻ മത്സരത്തെപ്പറ്റി ചിന്തിക്കാനാവുക. ഈ അവസരത്തിൽ ഇങ്ങനെയൊരു മത്സരം നടക്കരുത്."- തിവാരി കൂട്ടിച്ചേർത്തു.
വാർത്താ ഏജൻസിയായ എഎൻഐയ്ക്ക് നൽകിയ അഭിമുഖത്തിലാണ് അദ്ദേഹത്തിൻ്റെ പ്രതികരണം. ലെജൻഡ്സ് ലീഗിൽ ഇന്ത്യ - പാകിസ്താൻ മത്സരം റദ്ദാക്കിയിരുന്നു. ഇതോടെയാണ് ഏഷ്യാ കപ്പിൽ കളിക്കാനുള്ള ബിസിസിഐയുടെ തീരുമാനത്തിനെതിരെ വിമർശനമുയർന്നത്.
സെപ്തംബർ 14നാണ് ഏഷ്യാ കപ്പിൽ ഇന്ത്യയും പാകിസ്താനും തമ്മിലുള്ള മത്സരം നടക്കുക. നിലവിൽ മത്സരക്രമം തീരുമാനിച്ചിട്ടുണ്ടെങ്കിലും ഇന്ത്യ മത്സരത്തിൽ കളിക്കുമോ ഇല്ലയോ എന്നത് ഇപ്പോഴും വ്യക്തമല്ല. സെപ്തംബർ 9 മുതൽ 28 വരെയാണ് ഏഷ്യാ കപ്പ് നടക്കുക.
