IPL 2025: ട്രാവിസ് ഹെഡിന് കൊവിഡ്; ലഖ്നൗവിനെതിരെ കളിക്കില്ല
Travis Head Tests Positive For Covid: സൺറൈസേഴ്സ് ഹൈദരാബാദ് ഓപ്പണർ ട്രാവിസ് ഹെഡിന് കൊവിഡ് ബാധ സ്ഥിരീകരിച്ചു. പരിശീലകൻ ഡാനിയൽ വെട്ടോറി തന്നെയാണ് ഇക്കാര്യം അറിയിച്ചത്.
സൺറൈസേഴ്സിൻ്റെ ഓസ്ട്രേലിയൻ ഓപ്പണർ ട്രാവിസ് ഹെഡിന് കൊവിഡ് ബാധ സ്ഥിരീകരിച്ചു. ഇതോടെ താരം ഈ മാസം 19ന് രാത്രി ലഖ്നൗ സൂപ്പർ ജയൻ്റ്സിനെതിരെ നടക്കുന്ന മത്സരത്തിൽ കളിക്കില്ല. ഹൈദരാബാദ് ഇതിനകം പ്ലേ ഓഫ് യോഗ്യത നേടാതെ പുറത്തായിക്കഴിഞ്ഞു. (Image Credits - PTI)
"ട്രാവിസ് നാളെ രാവിലെ വരും. വൈകിയാണ് വരുന്നത്. അദ്ദേഹത്തിന് കൊവിഡ് സ്ഥിരീകരിച്ചിരുന്നതിനാൽ യാത്ര ചെയ്യാൻ കഴിഞ്ഞില്ല. അതുകൊണ്ട് നാളെ രാവിലെ അദ്ദേഹം വരും. വന്നിട്ട് അദ്ദേഹത്തിൻ്റെ ആരോഗ്യം പരിശോധിച്ച് തീരുമാനമെടുക്കും."- ഹൈദരാബാദ് പരിശീലകൻ ഡാനിയൽ വെട്ടോറി പറഞ്ഞു.
11 മത്സരങ്ങളിൽ മൂന്ന് ജയം സഹിതം ആറ് പോയിൻ്റുമായി സൺറൈസേഴ്സ് ഹൈദരാബാദ് പോയിൻ്റ് പട്ടികയിൽ എട്ടാം സ്ഥാനത്താണ്. ലഖ്നൗ സൂപ്പർ ജയൻ്റ്സിന് ശേഷം റോയൽ ചലഞ്ചേഴ്സ് ബെംഗളൂരു, കൊൽക്കത്ത നൈറ്റ് റൈഡേഴ്സ് എന്നീ ടീമുകളുമായാണ് ഹൈദരാബാദിൻ്റെ മത്സരങ്ങൾ.
സീസണിൽ മോശം പ്രകടനം തുടരുന്ന സൺറൈസേഴ്സ് നിരയിൽ ട്രാവിസ് ഹെഡും അത്ര നല്ല ഫോമിലല്ല. കഴിഞ്ഞ സീസണിൽ അവരുടെ കുതിപ്പ് നയിച്ച ഓപ്പണർമാരാണ് ട്രാവിസ് ഹെഡും അഭിഷേക് ശർമ്മയും. എന്നാൽ, ഈ സീസണിൽ ഇരുവരും നിരാശപ്പെടുത്തുന്ന പ്രകടനങ്ങളാണ് നടത്തുന്നത്.
സീസണിൽ ഇതുവരെ മൂന്ന് ടീമുകളാണ് പ്ലേ ഓഫ് യോഗ്യത നേടിയത്. ഗുജറാത്ത് ടൈറ്റൻസ്, റോയൽ ചലഞ്ചേഴ്സ് ബെംഗളൂരു, പഞ്ചാബ് കിംഗ്സ്. സൺറൈസേഴ്സിനൊപ്പം രാജസ്ഥാൻ റോയൽസ്, ചെന്നൈ സൂപ്പർ കിംഗ്സ് എന്നീ ടീമുകളും ഇത്തവണ പ്ലേ ഓഫ് കളിക്കില്ല.
