IPL 2025: പുറത്താവൽ ഭീഷണി ഒഴിവാക്കാൻ കൊൽക്കത്തയ്ക്ക് ഇന്ന് ജയം അനിവാര്യം; എതിരാളികൾ ഒന്നാം സ്ഥാനക്കാരായ ഗുജറാത്ത്
KKR vs GT IPL Match Preview: ഐപിഎലിൽ ഇന്ന് കൊൽക്കത്ത നൈറ്റ് റൈഡേഴ്സും ഗുജറാത്ത് ടൈറ്റൻസും തമ്മിൽ ഏറ്റുമുട്ടും. ഗുജറാത്ത് ടൈറ്റൻസ് പട്ടികയിൽ ഒന്നാം സ്ഥാനത്തും കൊൽക്കത്ത നൈറ്റ് റൈഡേഴ്സ് ഏഴാം സ്ഥാനത്തുമാണ്.
കൊൽക്കത്ത - ഗുജറാത്ത്
ഐപിഎലിൽ ഇന്ന് കൊൽക്കത്ത നൈറ്റ് റൈഡേഴ്സ് ഗുജറാത്ത് ടൈറ്റൻസിനെ നേരിടും. പ്ലേഓഫിൽ നിന്ന് പുറത്താവൽ ഭീഷണി നേരിടുന്ന കൊൽക്കത്തയ്ക്ക് ഇന്നത്തെ കളിയിൽ വിജയിച്ചേ മതിയാവൂ. എന്നാൽ, ഇതത്ര എളുപ്പമല്ല. പോയിൻ്റ് പട്ടികയിൽ ഒന്നാം സ്ഥാനത്തുള്ള ഗുജറാത്ത് ടൈറ്റൻസാണ് കൊൽക്കത്തയുടെ എതിരാളികൾ. കൊൽക്കത്തയുടെ ഹോം ഗ്രൗണ്ടായ ഈഡൻ ഗാർഡൻസിൽ രാത്രി 7.30ന് മത്സരം ആരംഭിക്കും. ഏഴ് മത്സരങ്ങളിൽ അഞ്ചെണ്ണം വിജയിച്ച് 10 പോയിൻ്റുമായി ഗുജറാത്ത് ഒന്നാമതും ഇത്ര തന്നെ മത്സരങ്ങളിൽ നിന്ന് മൂന്ന് ജയവുമായി നാല് പോയിൻ്റുമായി കൊൽക്കത്ത ഏഴാമതുമാണ്.
ക്വിൻ്റൺ ഡികോക്കിൻ്റെ മോശം ഫോമൊഴികെ കൊൽക്കത്തയ്ക്ക് സാരമായ പ്രശ്നങ്ങളില്ല. ആർസിബിയ്ക്കെതിരെ തോറ്റ് തുടങ്ങിയ കൊൽക്കത്ത ഇതുവരെ ഒന്നിടവിട്ട മത്സരങ്ങളിൽ വിജയിച്ചു. ഈ പതിവ് തുടർന്നാൽ കഴിഞ്ഞ കളി കൊൽക്കത്ത പരാജയപ്പെട്ടതിനാൽ ഈ കളി വിജയിക്കണം. സുനിൽ നരേനും അജിങ്ക്യ രഹാനെയും എന്ന പേരുകളിൽ നിന്ന് തുടങ്ങി രമൺദീപ് സിംഗ് വരെ നീളുന്ന ബാറ്റിംഗ് നിര മോശമല്ല. ഒറ്റപ്പെട്ട മത്സരങ്ങളിൽ ചില താരങ്ങളിൽ നിന്ന് ഒറ്റപ്പെട്ട ചില മോശം പ്രകടനങ്ങളുണ്ടായതാണ് ടീമിന് തിരിച്ചടിയായത്. ടീമിലെ വിദേശ പേസറായ സ്പെൻസർ ജോൺസൺ അവസരത്തിനൊത്തുയർന്നിട്ടില്ല. പകരം കഴിഞ്ഞ കളിയിൽ ആൻറിച് നോർക്കിയ കളിച്ചു. ഭേദപ്പെട്ട പ്രകടനമാണ് താരം കാഴ്ചവച്ചത്.
റാഷിദ് ഖാൻ്റെ മോശം പ്രകടനങ്ങൾ മാറ്റിനിർത്തിയാൽ ഗുജറാത്തിന് ആശങ്കകളൊന്നുമില്ല. മുൻ സീസണുകളിൽ അത്ര നല്ല പ്രകടനങ്ങൾ നടത്താൻ കഴിയാതിരുന്ന ഷെർഫെയിൻ റതർഫോർഡും പ്രസിദ്ധ് കൃഷ്ണയുമാണ് ഇപ്പോൾ ഗുജറാത്തിൻ്റെ മധ്യനിരയുടെ കരുത്ത്. ഒരാൾ ബാറ്റിംഗിലും മറ്റേയാൾ ബൗളിംഗിലും. നിലവിൽ പ്രസിദ്ധ് കൃഷ്ണ പർപ്പിൾ ക്യാപ്പ് ഹോൾഡറാണ്. ഇവർക്കൊപ്പം ശുഭ്മൻ ഗിൽ, സായ് സുദർശൻ, ജോസ് ബട്ട്ലർ എന്നിവരടങ്ങിയ ടോപ്പ് ഓർഡർ അപാരഫോമിലാണ്. ഷാരൂഖ് ഖാനും രാഹുൽ തെവാട്ടിയയും അടങ്ങുന്ന ഫിനിഷർമാരും തങ്ങളുടെ റോളുകൾ കൃത്യമായി നിർവഹിക്കുന്നു. ആർ സായ് കിഷോറിനെ ശുഭ്മൻ ഗിൽ കൃത്യമായി ഉപയോഗിക്കുന്നില്ലെന്ന വിമർശനങ്ങളുണ്ടെങ്കിലും ടീം കളി വിജയിക്കുന്നുണ്ട്. അത് തന്നെയാണ് ഗുജറാത്ത് ടൈറ്റൻസിൻ്റെ സവിശേഷത. ഒരുപറ്റം അമച്വേഴ്സ് എന്ന തോന്നലുണ്ടാക്കി ഒരു വിന്നിങ് കോമ്പിനേഷൻ.
